ЯҢАЛЫКЛАР

Татарстан Республикасы Сәнәгать һәм сәүдә министрлыгында бүген "ЭНИКС" АҖ предприятиесе җитештерә торган граждан продукциясе презентацияләнде. Компания табигый һәм техник фәннәр өлкәсендә фәнни тикшеренүләр һәм эшләнмәләр өлкәсендә махсуслаша.

"ЭНИКС" төрле билгеләнештәге пилотсыз авиация комплекслары җитештерә. Эшчәнлекнең төп юнәлеше – пилотсыз очкыч аппаратлар һәм төрле билгеләнештәге һәм катлаулылыктагы мишень комплекслары белән серияле рәвештә тәэмин итү, аларны эшләп чыгару, җитештерү.

Киңәшмәдә тәэсир итүе буенча "Элерон" гаиләлегенә якын һәм уртача радиуслы пилотсыз авиация комплекслары тәкъдим ителде. Алар тәүлек буе һава оптик-электрон разведкасы алып бару өчен билгеләнгән, очыш күрсәткечләрен динамик фаразлау системасына ия, контейнерларны төшереп калдыра ала һ.б.

Автомобиль һәм тимер юл магистральләренең, нефть-газ үткәргечләренең һәм электр тапшыру линияләренең торышын контрольдә тоту, экологик контроль, картографияләү һәм аэрофотога төшерү, балык промыселы разведкалары, элемтә системалары мониторингы һ.б. бик күп функцияләрне башкара ала.

Киңәшмәдә катнашучылар – республиканың тармак министрлыклары һәм ведомстволары вәкилләре "Элерон" гаиләсенең пилотсыз авиация комплексларын куллануга кызыксыну белдерде.

ТР сәнәгать һәм сәүдә министры Альберт Кәримов, мондый хезмәттәшлекнең мөһимлеген билгеләп, болай диде:

"Безнең алда газ белән эшләүче предприятиеләр продукциясен диверсификацияләү буенча Россия Президенты куйган бурыч тора. Граждани продукция чыгару дәрәҗәсе 50%ка кадәр җитәргә тиеш. Шуңа күрә бу эшләнмә һәм тәкъдим карау өчен аеруча актуаль булып тора".

Форд Соллерс һөнәри белем бирү оешмаларында "Мехатроника" белгечлеге буенча дуаль белем бирү системасын гамәлгә кертү проектының өченче этабына йомгак ясаган. Соңгы чаралар кысаларында Казанда Алгарышлы һөнәри әзерлек үзәгендә проектта катнашучыларга квалификация күтәрү турында таныклыклар һәм Зеленодольск механика һәм Казан авиация-техник көллиятләренә "Мехатроника" буенча җиһазлар сатып алуга сертификат тапшырылган.

Проект Татарстанда 2017 елның декабреннән гамәлгә ашырыла. Агымдагы елның октябрендә старт алган өченче этап һөнәри белем бирү системасында практик юнәлештә эшләүгә һәм предприятиеләрдә остазлыкка багышланган. Проектта барлыгы 26 һөнәри белем бирү оешмалары вәкилләре һәм аларның җитештерү партнерлары – Татарстан Республикасының машина төзелеше комплексы предприятиеләре катнашкан.

Проект башында катнашучылар тарафыннан яңа кирәкле белгечлек буенча практик юнәлешле якын килүне гамәлгә кертү буенча чакырулар билгеләнгән һәм ачыкланган проблемалар өчен чишелешләр тәкъдим ителгән. Беренче очрашу нәтиҗәләре буенча "Заманча автоматлаштырылган җитештерүнең эш принциплары. Мехатроника һәм сәнәгать робот техникасы", "Заманча белем бирү технологияләре", "Предприятиеләрдә остазлык" юнәлешләре буенча тренинглар эшләнгән һәм оештырылган.

Тренинглардан соң һөнәри белем бирү оешмалары вәкилләре үз партнерлары белән берлектә алга таба предприятиеләрдә гамәлгә кертү өчен җитештерү практикасы программаларын эшләгән.

Әзерләнгән программаларны яклау 2019 елның 26 декабрендә Алгарышлы һөнәри әзерлек үзәгендә узган. Проектта катнашучылардан барлыгы 6 проект тәкъдим ителгән. Эшләнгән программаларны бәяләүдә Татарстан Республикасы Мәгариф һәм фән министрлыгы, Татарстан Республикасы Сәнәгать һәм сәүдә министрлыгы, Форд Соллерс техник белгечләре һәм Алгарышлы һөнәри әзерлек үзәге вәкилләре катнашты. Тәкъдим ителгән эш нәтиҗәләре буенча җиһазларны сатып алу өчен җиңүчеләр сыйфатында Зеленодольск механика һәм Казан авиация-техник көллиятләре билгеләнгән.

Ford Sollers матбугат хезмәте материаллары буенча

Татарстан Республикасы Сәнәгать һәм сәүдә министрлыгы белгечләре SICPA Швейцария компаниясе вәкилләре белән очрашу уздырды. Көн тәртибендәге төп мәсьәлә "Алабуга" МИЗ территориясендә компания производствосын гамәлгә ашыру проекты булды.

SICPA гомуми куллану товарлары (тәмәке һәм алкоголь), фармацевтика препаратлары, нефть эшкәртү продуктлары һәм азык-төлек товарлары кебек тармаклар өчен продукцияне маркировкалау, аутентификацияләү һәм күзәтеп тору буенча үз эшчәнлеген башкара.

Татарстан Республикасында SICPA хәләл продукцияне маркировкалау һәм ягулыкны маркировкалау юнәлешләре буенча "Продукцияне Маркировкалау һәм Мониторинглау буенча Экспертиза Үзәге" белән партнерлык килешүен гамәлгә ашыра.

Компания вәкилләре билгеләп үткәнчә, Татарстан территориясендә маркировкалау җиһазлары җитештерүне оештырырга планлаштыралар, бу киләчәктә җирле җитештерүчеләргә хәләл продукция белән экспортка чыгуны җиңеләйтәчәк.

Россиядә SICPA Стратегик үсеш буенча директоры Бари Мортазин фикеренчә, хәләл продукцияне маркировкалау проекты IT-проект булып тора, ул продукцияне җитештерүчедән кулланучыга кадәр күзәтеп торырга мөмкинлек бирәчәк.

Очрашу нәтиҗәләре буенча яклар уртак гамәлләрне координацияләү өчен эш төркеме төзергә, киләчәктә проектны гамәлгә ашыру буенча конкрет адымнарны күрсәтеп, юл картасын имзаларга дигән карар кабул итте.

Сәнәгатьне үстерү фонды Эксперт советының йомгаклау утырышында Татарстан Республикасында проектларны гамәлгә ашыру өчен кредитлар хупланды.

"Джошкуноз Алабуга" 500 млн. сумлык займ ярдәмендә "Алабуга" МИЗ территориясендә "АвтоВАЗ" һәм башка автоҗитештерүчеләр өчен автомобиль шассиларының штампланган детальләрен импортлауны алмаштыручы прогрессив һәм трансфер пресслары цехын эшләтеп җибәрәчәк.

Детальләр Лада һәм Рено автомобильләренең унификацияләнгән платформалары өчен билгеләнгән. Проект шасси, күпер һәм подвеска детальләрен штамповкалауның яңа технологияләрен прогрессив һәм трансфер пресс линияләрендә һәм дугалы сыгылмаларда кертүне күздә тота.

Яр Чаллыдан "Тормоз механизмнары заводы" КҖО 104,5 млн. сум күләмендәге заем ярдәмендә йөк автотранспорты өчен туктату колодкаларын җитештерүне киңәйтәчәк. Предприятие тормоз колодкаларын махсус катафорез өслекле итеп ясау мөмкинлеген бирәчәк җиһаз сатып алачак. Ул физик һәм химик йогынтыларга бирешми һәм эшләнмәләрдә традицион грунтовкалар белән чагыштырганда сигез тапкыр озаграк тора.

Предприятие Европаның йөк автомобильләре өчен комплектлы деталь җитештерүчеләргә 15% продукцияне экспортларга, шулай ук аларны икенчел базарда запас өлеш сыйфатында сатарга ниятли. Калган продукцияне Россия базарында сату планлаштырыла.

Сәнәгатьне үстерү фонды матбугат хезмәте материаллары буенча

"Комсомольская Правда-Казань" газетасы "Татарстан Республикасының 100 легендар бренды" проектын эшләтеп җибәргән.

Бу – республиканың 100 еллык тарихын чагылдыра торган брендлар, компанияләр һәм сәүдә маркалары турындагы проект.

Проектның максаты – Татарстан җитештерүчеләренең массакүләм куллану продукциясе үсеше тарихы турында сөйләү. Проектта икътисадның төрле тармакларыннан һәм төрле масштабтагы – районныкыннан алып дөньякүләм масштабтагы производстволарга, товарларга һәм брендларга игътибар биреләчәк.

Татарстанда узган елда производствога ия булган предприятие-оешмаларның чын брендка әверелүенә мисаллар күп.

Һәм иң мөһиме – Татарстанның йөз халык брендын сайлау республика һәм ил халкы катнашында башкарылачак. Тавыш бирүдә теләге булган һәркем катнаша ала!

БРЕНДНЫ ТӘКЪДИМ ИТӘРГӘ ЯКИ ТАВЫШ БИРҮДӘ КАТНАШУ ӨЧЕН ГАРИЗАНЫ ӘЛЕГЕ СЫЛТАМА БУЕНЧА БИРЕРГӘ МӨМКИН

2019 елның 31 декабренә кадәр республика халкыннан сәнәгать, транспорт, авыл хуҗалыгы, сәүдә, азык-төлек, югары уку йортлары, элемтә, ММЧ, сәнгать, спорт һ.б. тармаклардан брендлар буенча тавыш бирүгә тәкъдимнәр көтәбез.

 "Комсомольская правда-Казань" редакциясе материаллары

Казан Ратушасында "Татарстан Республикасының иң яхшы товарлары һәм хезмәт күрсәтүләре - 2019" конкурсы лауреатларын бүләкләү тантанасы узды.

Конкурс лауреатларына дипломнарны Татарстан Республикасы Премьер-министрының беренче урынбасары Рөстәм Нигъмәтуллин, Татарстан Республикасы сәнәгать һәм сәүдә министры Альберт Кәримов, Татарстан Республикасы Мәдәният министрлыгы, Татарстан Республикасы Сәламәтлек саклау министрлыгы вәкилләре һәм башка рәсми затлар тапшырды.

Бәйге Татарстан Республикасында "Россиянең иң яхшы 100 товары" программасы кысаларында инде беренче ел гына үткәрелми. Конкурста катнашу үз товарыңны яки хезмәт күрсәтүне генә түгел, ә аларны иң яхшы яктан күрсәтергә дә уникаль мөмкинлек бирә.

2019 елда конкурста Татарстанның 230 предприятиесе һәм оешмасыннан 453 товар һәм хезмәт күрсәтү тәкъдим ителгән. Шуларның 135се – лауреат, 138е – I дәрәҗә дипломант, 162се – II дәрәҗә дипломант.

Конкурс нәтиҗәләре шуны раслый: республикада импортны алыштыру буенча актив эш алып барыла, инновацион проектлар гамәлгә кертелә, югары сыйфатлы продукциянең яңа төрләрен җитештерү үзләштерелә, кирәкле хезмәт күрсәтү өлкәсе үсә.

Казан Ратушасында Татарстанның алдынгы сәнәгать предприятиеләре – "Татнефть", "Нижнекамскнефтехим", "Казаноргсинтез", "Казан гипронииавиапромы", "А.М.Горький исемендәге Зеленодольск заводы" һәм башкалар катнашты.

Республиканың өч предприятиесе 2019 елда "Россиянең иң яхшы 100 товары" Бөтенроссия конкурсының югары бүләкләренә лаек булган:

• "Импортны алыштырудагы уңышлар өчен" призы - "ТМС групп" ҖЧҖ ИК – 80 ℃ температурада файдалану өчен металл пластмасса торбалар һәм патрубкалары;
• "Инновация" призы – "Инновацияле технологияләр" ҖЧҖ – "Re-Flame" уттан яклаучы состав;
• "Сыйфат тәме" призы – "Казан шәһәренең Азык-төлек һәм социаль туклану департаменты" АҖ – дәвалау һәм профилактик туклануның әчетелгән сөт продукты Бифилайф, шикәрле Бифилайф.

Мотор төзүчеләр мәйданында "КМПО" АҖ кышкы шәһәрчеген ачу тантанасы булды, биредә күпсанлы кунаклар җыела. Әлеге чарага, традиция буенча, яңа ел атмосферасын тою өчен, завод хезмәткәрләре үз балалары белән генә түгел, ә Авиатөзелеш районында яшәүчеләр, Казан кунаклары да килә.

"КМПО" АҖ Хезмәт мөнәсәбәтләре департаменты директоры Сергей Зимин бәйрәм кунакларын якынлашып килүче Яңа ел белән котлады. Бәйрәм программасын заводның "Мотор төзүче" мәдәни-ял итү үзәге коллективы әзерләгән иде. Кыш Бабай һәм Кар Кызы белән очрашу сабыйларны да, өлкәннәрне дә битараф калдырмады, барысына да якты хисләр һәм яхшы кәеф бүләк итте.

Кышкы шәһәрчек көн саен эшли һәм Казанның Авиатөзелеш районында традицион бизәк булып тора.

"КМПО" АҖ матбугат хезмәте материаллары буенча

Альберт Кәримов Төрекмәнстан делегациясе вәкилләре белән очрашты.

Төрекмәнстан делегациясе әгъзалары арасында – "Туркмендениздериайолары" агентлыгы, Төркмәнстанның Су хуҗалыгы буенча дәүләт комитеты һәм "Балкан «суднолар төзү һәм судно ремонтлау заводы" АҖ белгечләре.

Татарстан һәм Төрекмәнстан арасындагы партнерлык мөнәсәбәтләренә нәтиҗә ясап, министр билгеләп үткәнчә, 2019 елның 9 ае нәтиҗәләре буенча ике төбәкнең тышкы сәүдә әйләнеше АКШ доллары белән 65 млн. тәшкил иткән.

Шулай ук очрашу кысаларында яклар "Ак Барс" суднолар төзелеше корпорациясе белән Төрекмәнстан арасындагы хезмәттәшлекнең төп аспектлары турында фикер алышты. Төрекмәнстан делегациясе 2019 елның 23 декабрендә "А.М. Горький исемендәге Зеленодольск заводы"нда булды, анда кунакларга берничә җитештерү цехларын күрсәттеләр.

Дүртенче экология программасы кысаларында "Нижнекамскнефтехим" ГАҖ агынты суларның сыйфатына автоматлаштырылган контроль керткән.

Беренче чиратта газоаналитик контроль датчиклары турында сүз бара. Аларны бу елның көзендә сәнәгать зонасы территориясендә урнашкан химик пычранган коллектор (ХЗК) системасының 27 кое төбенә урнаштырганнар. Әлеге приборлар коеларда газлануның торышын контрольдә тоту өчен кирәк. Зарарлы матдәләр концентрациясе арткан очракта, датчиклардан алынган мәгълүмат, алга таба оператив җавап бирү өчен, бердәм диспетчерлык хезмәтенә тапшырыла.

ХЗК системасына ташландыкларның сыйфатын контрольдә тотуны көчәйтү өчен предприятиедә шулай ук углеводородларны контрольдә тоту өчен ШКУВ дип атала торган шкафлар кертелгән. Бу җиһазлар пычраткыч матдәләрнең эчтәлеген билгеләү өчен кулланылган.

Шкаф заманча үлчәү приборлары белән җиһазландырылган һәм автомат режимда эшли. Сынап карау һәм әзер анализ алу һәр 8 минут саен алып барыла. Беренче сәнәгать зонасында гомуми агынты коеларында шундый өч шкаф урнаштырылган.

Пычраклык датчикларына охшаш рәвештә, ШКУВ ярдәмендә алынган мәгълүмат диспетчерлык хезмәтенә җибәрелә. Бирегә шулай ук предприятие периметры буенча һәм биологик чистарту корылмаларында урнашкан стационар постлардан мәгълүмат килә. Киләчәктә компания I категорияле пычраткыч матдәләрне ташлау чыганакларына пычраткыч матдә чыгару күрсәткечләрен исәпкә алу буенча автоматлаштырылган системаларны урнаштырырга планлаштыра.

Хәзерге вакытта "Нижнекамскнефтехим" яңа табигать саклау проектларын гамәлгә кертә. Аерым алганда, соңгы эшләнмә атмосфера һавасы торышына автоматлаштырылган мониторингның яңа системасыннан гыйбарәт. Ул предприятиедән барлык ташландыкларны да исәпкә алып, бер-өч көнгә кадәр чорга калдыклар буенча вәзгыятьне фаразлый. Система, шул исәптән, һәркем ала алырлык геомәгълүмат ресурсларын үстерергә мөмкинлек бирә: җил юнәлеше, тизлек, дымлылык һәм башкалар буенча. Бу мәгълүмат нигезендә калдыклар белән бәйле вәзгыятьне фаразларга була.

"Нижнекамскнефтехим" ГАҖ матбугат хезмәте материаллары буенча

Бүген Казан йорт төзелеше комбинатының җитештерү мәйданчыгында "Хезмәт җитештерүчәнлеге һәм эш белән тәэмин итүгә ярдәм итү" илкүләм проекты кысаларында җитештерү процессларын оптимальләштерү буенча сынау проектын гамәлгә ашыруга йомгак ясалды.

Нәкъ менә Казан йорт төзелеше комбинаты илкүләм проект кысаларында җитештерү процессларын оптимальләштерү буенча республиканың төзелеш тармагындагы "пионерларның" берсе булган. Предприятие бетон, цемент һәм гипстан эшләнмәләр җитештерү белән шөгыльләнә. Илкүләм проектны гамәлгә ашыру предприятиедә 2019 елның июлендә башланган, эшләр  федераль компетенцияләр үзәге экспертлары ярдәмендә алып барылган.

Нәтиҗәләр тантаналы җыелыш форматында ясалды. Чарада Татарстан Республикасы сәнәгать һәм сәүдә министры урынбасары Алмаз Хөсәенов, "Ак барс девелопмент" генераль директоры Марат Шәһитов, Татарстан Республикасы төзелеш, архитектура һәм ТКХ министры урынбасары Илшат Гыймаев, предприятие хезмәткәрләре һәм башка рәсми затлар катнашты.

Аерым алганда, төгәлләнмәгән җитештерү запаслары 5 тапкыр кимегән һәм җитештерү дәрәҗәсе 60%ка арткан.

Транспортировканы рациональ оештыру, яңадан планлаштыру, складлау системасын оптимальләштерү, эш урыннарында 5С системасын кертү һәм планлаштыруның яңа формаларын һәм контроль-мәгълүмат үзәкләрне гамәлгә кертү эш вакытын 3 тапкыр кыскартырга мөмкинлек биргән.

Моннан тыш, проект компаниягә операторларга хезмәт хакын арттырырга, физик йөкләнешне киметергә һәм хезмәт шартларын яхшыртырга, аш урынын оештырырга, эш урыннарында куркынычсызлыкны тәэмин итәргә мөмкинлек биргән.

Сакчыл җитештерү инструментларын кертү өчен Федераль компетенцияләр үзәге белгечләре компаниянең төп агымнарының берсе – биналар төзегәндә кулланыла торган тимер-бетон дивар панельләре җитештерү агымы сайлап алынган. Бу предприятиенең финанс яктан отышлы агымнарының берсе – ул җитештерелә торган продукция күләменең 49%ын тәшкил итә. Предприятие хезмәткәрләреннән торган эшче төркем җитештерү югалтуларын ачыклый алган: линия бары тик 32%ка гына җәлеп ителгән, эшсез торган очраклар ачыкланган, әзерләнгән эшләр үз вакытында тапшырылмаган, операторларның йөкләнеше тигез булмаган. Бу җитештерү нәтиҗәлелеген сизелерлек киметкән.

Чара ахырында җитештерү процессларын оптимальләштерүдә актив катнашкан завод хезмәткәрләре арасыннан үзгәрешләрдәге лидерларны бүләкләү булды.