ЯҢАЛЫКЛАР
Бүген, 15 нче гыйнварда, Мәскәү шәһәрендә "АММОНИЙ" АҖ директорлар советы рәисе, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов акционерларның чираттан тыш җыелышын үткәрде. Төп кредитор (Внешэкономбанк) һәм финанс эшчәнлеген алга таба савыктыру һәм җитештерүне саклап калу буенча гамәлләр программасының потенциаль инвесторы белән килешенгән кысаларда акционерлар бертавыштан компаниянең генераль директоры итеп Макаров Дмитрий Юрьевичны раслау өчен тавыш бирде.
Өстәмә:
Макаров Дмитрий Юрьевич 1972 елда туган. Предприятиеләрдә минераль ашламалар җитештерү буенча идарә итү тәҗрибәсе бар, шул исәптән "АЗОТ" КАҖ генераль директорының үсеш буенча урынбасары булып эшләгән.
2010 нчы елда электрон сәүдә операторы сыйфатында оештырылган "ТЗП Татнефть" бүген "Татнефть" төркеме предприятиеләрен генә түгел, Татарстанның "Нефтеконсорциум" кече нефть компанияләрен дә, "ТАГРАС-Холдинг" сервис предприятиеләрен дә, подряд оешмаларын да бердәм сатып алу системасына берләштерә. "Татнефть" сәүдә-сатып алу мәйданчыгында нефть-газ тармагы товарларын җитештерүчеләрнең һәм дилерларның киң даирәсе катнаша. Хәзерге вакытта Компаниянең сәүдә-сатып алу мәйданчыгында 44 000 контрагент теркәлгән.
2019 нчы елда химия продукциясе тендерына кергән тәкъдимнәрнең максималь саны 57 коммерция тәкъдиме тәшкил иткән, узган ел 59 000 көндәшлекле тәкъдим алынган.
10 ел эчендә "ТЗП ТАТНЕФТЬ" операторлары тарафыннан 150дән артык сатып алучы оешма өчен 117 меңнән артык электрон сәүдә процедурасы уздырылган, сәүдә әйләнеше 460 млрд. сумнан артып киткән.
2012 нче елдан башлап "Татнефть" ГАҖ сәүдә-сатып алу мәйданчыгы" инглиз телендә дә эшли. Бүген "ТЗП ТАТНЕФТЬ" — РФдә көндәшлекле процедураларда катнашу өчен бердәнбер түләүсез мәйданчык. "Татнефть" сәүдә-сатып алу мәйданчыгының киң функционалы, контроль һәм аналитик инструментларның уңайлылыгы һәм мөмкинлекләре, өстәмә сервисларның киң һәм сыйфатлы булуы, техник тотрыклылыгы һәм эштәге тизлеге, клиентлар һәм техник ярдәм сыйфаты, сайт буенча навигация уңайлылыгы белән аерылып тора. Платформа төрле компанияләрнең төп процессларын үз эченә ала, шул исәптән сатып алулар, контрагентлар эзләү, гамәлгә ашыру, ТТУ базасы, контрагентлар белән хезмәттәшлек тарихы һәм тикшереп торучы хезмәтләр кабинеты.
"Татнефть" сәүдә-сатып алу мәйданчыгы операторлары электрон сатулар үткәрү процессы дәвамында квалификацияле техник ярдәм күрсәтә. Җентеклерәк: https://etp.tatneft.ru
"Татнефть" ГАҖ матбугат хезмәте материаллары буенча
Татарстан Республикасы Сәнәгать һәм сәүдә министрлыгында Татарстан Республикасы Халыкара медицина кластеры концепциясе проектын карау буенча киңәшмә узды.
Мондый проектны гамәлгә ашыру фәнни-тикшеренү клиник һәм белем бирү мәйданчыгы булдырудан гыйбарәт, анда инновацион медицина технологияләре кертеләчәк.
Татарстанда потенциаль медицина кластеры мәгариф, фән, шулай ук республика потенциалын исәпкә алып, медицина хезмәтләрен иң яхшы инновацион дөнья тәҗрибәләренә таянып киңәйтү мөмкинлеген бирәчәк.
Киңәшмәне К(И)ФУ ректоры Илшат Гафуров, ТР сәламәтлек саклау министрының беренче урынбасары Әлмир Абашев, "ФармМедПолис РТ" вәкилләре һәм башкалар катнашында министр урынбасары Алексей Савельчев үткәрде.
"Хезмәт җитештерүчәнлеге һәм эш белән тәэмин итүгә ярдәм" илкүләм проектында катнашучы предприятиеләр өчен "Татарстан Республикасында остазлыкның иң яхшы практикалары – 2019" конкурсында катнашу мөмкинлеге бар.
Конкурсның максаты – хезмәт җитештерүчәнлеген арттыру, остазлыкны үстерүгә һәм Татарстан Республикасында нәтиҗәле остазлык тәҗрибәсен таратуга һәм үстерүгә шактый өлеш керткән остазларны ачыклау, тану һәм бүләкләү.
Конкурс түбәндәге номинацияләрдә үткәрелә:
- "Хезмәт җитештерүчәнлеген арттыру өлкәсендә остазлык";
- "Һөнәри үзбилгеләнештә остазлык";
- "Яшьләрнең һөнәри үсешендә остазлык";
- "Алдынгы технологияләр өлкәсендә остазлык".
Конкурста катнашу өчен 2020 елның 17 гыйнварына кадәр Татарстан Республикасы Сәнәгать һәм сәүдә министрлыгына шәхси мәгълүматларны эшкәртүгә гариза һәм ризалык җибәрергә кирәк. Гаризаны электрон почта адресына электрон рәвештә тапшырырга мөмкин: mpt@tatar.ru яки басма рәвештә әлеге адрес буенча: 420111, ТР, Казан шәһәре, Островский урамы, 4 нче йорт.
Конкурста җиңүчеләрне бүләкләү тантанасы Татарстан Республикасының югары вазыйфаи затлары катнашында тантаналы шартларда уздырылачак.
Игътибар итегез, шәхси мәгълүматларны эшкәртүгә ризалык конкурста катнашучы оешманың һәр катнашучысына һәм элемтә өчен җаваплы затына тутырыла.
Конкурс турында тулырак мәгълүмат һәм гариза формасы сылтама буенча урнаштырылган
2020 елның 17-19 март көннәрендә Казанда энергия һәм ресурслар нәтиҗәлелеге һәм экология буенча Татарстан халыкара форумы-2020 кысаларында Татарстан предприятиеләре матбугат хезмәтләре һәм массакүләм мәгълүмат чаралары арасында энергияне сак тоту һәм энергетика нәтиҗәлелеген арттыру буенча республика конкурсы узачак.
Конкурска 2019 елның 1 февраленнән 31 декабренә кадәр басылып чыккан эшләр кабул ителә.
Республика массакүләм мәгълүмат чаралары һәм республика предприятиеләренең җәмәгатьчелек белән элемтә бүлекләре конкурста катнашу өчен чакырыла.
Җиңүчеләрне бүләкләү 2020 елның 17 мартында Татарстан Республикасы Хөкүмәтенең "2019 ел йомгаклары һәм 2020 елга бурычлар буенча "Татарстан Республикасында энергияне сак тоту һәм энергетика нәтиҗәлелеген арттыру" дәүләт программасын гамәлгә ашыруның барышы турында"гы утырышы кысаларында узачак.
Эшләрне әлеге электрон адреска җибәрергә кирәк: cetrt@mail.ru, җибәрүнең соңгы көне – 2020 елның 5 феврале.
Барлык сораулар буенча конкурсның мәгълүмат хезмәтенә мөрәҗәгать итегез: "Татарстан Республикасы Министрлар Кабинеты каршындагы Татарстан Республикасының Энергияне сак тоту технологияләре үзәге" дәүләт автоном учреждениесенең мәгълүмат-нәшрият һәм мәгариф эшчәнлеге бүлеге, тел/факс: (84-32) 72-99-43, 272-19-21.
Конкурс нигезләмәсе белән сылтама буенча танышырга мөмкин.
"Татар-информ" МА материаллары буенча
Татарстан Республикасы Сәнәгать һәм сәүдә министрлыгы Сезне Яңа ел белән котлый!
Узып баручы ел республика сәнәгате өчен мөһим вакыйгаларга бай булды. Без республиканың барлык предприятиеләренә һөнәри оста, җаваплы булганнары һәм үз эшләренә бирелгәнлеге өчен рәхмәт белдерәбез.
Күңел түрендә иң якты теләкләр кабул булсын һәм иң изге ниятләр тормышка ашсын, гаилә бөтенлеге, муллык һәм бәхет һәрберебезгә юлдаш булсын!
Яңа 2020 нче ел белән!
"Россия вертолетлары" холдингының Казан вертолет заводында (Ростех дәүләт корпорациясенә керә) яшьләр арасында "Һөнәре буенча иң яхшысы" исеменә һөнәри осталык конкурсына йомгак ясалды. 32 хезмәткәр бүләк алды.
КВЗның теләге булган һәр хезмәткәре үз көчен 7 компетенциядә сынап карый алган: "Авиация техникасы эшләнмәләрен җитештерү һәм җыю", "Электромонтаж", "Инженер-технолог", "Хезмәтне саклау", "Очу аппаратлары электр җиһазларын монтажлау", "Төркемле җитештерү" һәм "CAD инженер графикасы".
Экспертлар булып WorldSkills Hi-Tech сәнәгатенең югары технологияле тармакларының үтәли эшче һөнәрләре илкүләм чемпионатында катнашучылар катнашкан. Завод ярышлары өчен конкурс биремнәрен эшләгәндә WorldSkills стандартлары таләпләре исәпкә алынган, КВЗ даими рәвештә конкурсны камилләштерә, аны халыкара нормаларга яраклаштыра.
Конкурс нәтиҗәләре буенча беренче урыннарны Денис Сазыков ("Авиация техникасы эшләнмәләрен җитештерү һәм җыю"), Олег Солдатов ("Электромонтаж"), Руслан Кәримов ("Хезмәтне саклау"), Дарья Осокина ("Очу аппаратлары электр җайланмаларын монтажлау"), Азат Хисмәтуллин ("CAD инженер графикасы") яулаган.
"Төркемле җитештерү" компетенциясендә Илнур Фәхертдинов, Фәнис Гыйльмуллин, Владимир Григорьев һәм Сергей Егоров командасы җиңгән. "Инженер-технолог" компетенциясендә Руслан Гатауллин, Илнур Таналин, Ильяс Тимеров составындагы команда иң яхшысы дип табылган.
КВЗ, гадәттәгечә, кадрлар әзерләү дәрәҗәсен күтәрүгә, эшче һөнәрләрне һәм инженер белгечлекләрен популярлаштыруга юнәлдерелгән күп кенә чараларда катнаша. Завод белгечләре Казанда узган WorldSkills дөнья чемпионатында югары дәрәҗәдә әзерлек күрсәтте: 8 катнашучыдан һәм 1 эксперттан торган команда "Тормыш циклы белән идарә итү" компетенциясендәге ярышларда җиңү яулады.
"Вертолеты России" холдингы матбугат хезмәте материаллары буенча
"Ел җитәкчесе - 2019" республика иҗтимагый конкурсы лауреатларын бүләкләү тантанасы Казанда Татарстан Республикасы Президенты Рөстәм Миңнеханов катнашында узды. Чарада шулай ук министр Алберт Кәримов та катнашты.
Быел конкурс лауреаты исеменә икътисадның төрле тармакларындагы һәм өлкәләрендәге 83 предприятие һәм оешма җитәкчесе дәгъва белдергән.
"Ел җитәкчесе-2019" республика иҗтимагый конкурсы лауреатлары:
"Югары конкуренциягә сәләтлелек өчен" номинациясендә:
Антон Вячеславович Туркин – "ОИЛ" ҖЧҖ генераль директоры, Казан шәһәре;
Рәис Салих улы Хисамов — баш геолог – В.Д.Шашин исемендәге "Татнефть" ГАҖ генераль директоры урынбасары, Әлмәт шәһәре;
Сергей Анатольевич Трифонов – "Тулпар Эйр" авиакомпаниясе" ҖЧҖ генераль директоры, Лаеш муниципаль районы;
"Инвестицион активлык өчен" номинациясендә:
Октем Эджевит — "Джошкуноз Алабуга" ҖЧҖ генераль директоры, Алабуга шәһәре, "Алабуга" МИЗ территориясе;
Фердинанд Нургаян улы Хәйруллин – "Кызыл юл" АХҖК рәисе, Балтач муниципаль районы;
Илдус Зәки улы Исламов – "Татэлектромаш" фәнни-җитештерү берләшмәсе" ААҖ генераль директоры, Яр Чаллы шәһәре;
"Инновацион эшчәнлектәге казанышлар өчен" номинациясендә:
Роза Фатыйх кызы Гатина – "Химия продуктлары дәүләт фәнни-тикшеренү институты" ФКП директоры, Казан шәһәре;
Евгений Рәшит улы Ибраһимов – "В. Б. Шнепп исемендәге НИИтурбокомпрессор", Казан шәһәре;
"Югары социаль җаваплылык өчен" номинациясендә:
Николай Михайлович Николаев – "Лукойл" ГАҖ вице-президенты – "РИТЭК" ҖЧҖ генераль директоры, Самара шәһәре;
Әнвәр Габделмәҗит улы Яруллин – "ТМС групп" ИК ҖЧҖ директоры, Әлмәт шәһәре;
"Кадрлар потенциалын актив үстерү" номинациясендә:
Александр Борисович Лившиц – "Казан дәүләт казна дары заводы" ФКП генераль директоры, Казан шәһәре;
"Кече (урта) бизнес предприятиесе белән уңышлы идарә иткән өчен" номинациясендә:
Равил Фаил улы Идиятулин – "РУ-Инжиниринг" ФҖП ҖЧҖ директоры, Яр Чаллы шәһәре;
Алексей Иванович Леонтьев — "Восток" ҖЧҖ директоры, Кукмара муниципаль районы;
Мөнир Шаһзадә улы Шәяхмәтов "ПЖКХ-17" ИК ҖЧҖ директоры, Түбән Кама шәһәре;
"Предприятиене цифрлы трансформацияләү өчен" номинациясендә:
Зөфәр Фәнил улы Гәрәев – "Ак Барс" Банк ГАҖ идарәсе рәисе, Казан шәһәре;
Екатерина Юрьевна Никонова "ТатПром-Холдинг" ҖЧҖ компанияләр төркеменең коммерция директоры – "Яр Чаллы торба заводы" ҖЧҖ генераль директоры урынбасары, Яр Чаллы шәһәре.
Җиңүчеләрне котлыйбыз!
Роскачество үзебездә чыгарыла торган чемердәп торучы шәрабны тикшергән һәм иң яхшы эчемлекләр исемлеген төзегән. Россиядә җитештерелә торган, чемердәп торган эчемлекләрнең сыйфаты начар, дигән уйдырма расланмаган.
Тикшеренү "Россия шәраб гиды" кысаларында уздырылган, ул Россиянең Сәнәгать һәм Авыл хуҗалыгы министрлыклары белән берлектә Роскачество тарафыннан оештырылган. 2019 елда дегустация нигезендә бәяләү өчен Россия виноградыннан чемердәп торган 129 шәраб үрнәге сатып алынган.
Шулай итеп, Роскачестводан чемердәп торган шәрабләр категориясендә "Россиянең шәраб гиды" исемлегенә эләккән эчемлекләр:
- I урын – Краснодар крае территориясендә үстерелгән, виноградның Пино Нуар дигән сортыннан җитештерелгән "Мысхако" ярымтатлы шәрабе (100 дән 83,7 балл);
- II урын – Шардоне, Рислинг, Совиньон Блан сортлы виноградтан җитештерелгән ак "Дербентской винодельской компания" Россия шәмпан брюты;
- III урын – Ак мускат, Гәрәбә мускат сортлы виноградлардан ясалган, "Золотая балка"дан ярымтатлы, ак Кырым шәрабе.
Артык кыйммәтле булмаган һәм дегустация барышында яхшы бәя алып, рейтингка эләккән эчемлекләр: "Леонсия" шәмпан шәрабе, "Кубань-Вино" ҖЧҖдән ак брют һәм ярымтатлы ак шәраб. Әлеге үрнәкләр бер берәмлек товар өчен 164 сумнан сатып алынган.
Тикшеренүләрнең нәтиҗәләрен һәм нечкәлекләрен Роскачество порталында карагыз.
Роскачество искәрткәнчә, яңа ел табынына чемердәп торган шәраб сайлаган вакытта үзеңә кирәкле шәрабне сайлап алу өчен тышлыкны яхшылап укырга кирәк.
Тышлыкның алгы өлешендә "чемердәп торган шәраб" ("игристое вино") яки "Россия шәмпан шәрабе" дигән сүзләр булмаса, шешәне әйләнедереп, контрэтикеткадагы вак хәрефле текстны укыгыз. Сез алган эчемлек "газландырылган шәраб эчемлеге" булырга мөмкин, андый очракта шешәдәге сыеклыкның иң яхшысы дигәндә яртысы шәрабтан, ә калганы су һәм хушландыргычлардан торачак.
Әгәр "игристое вино" яки "жемчужное вино" сүзләренә "защищенного географического указания (ЗГУ)" яки "защищенного наименования места происхождения (ЗНМП)" дигән сүзләр язылган булса, димәк әлеге шәраб Россия Федерациясе чикләрендә билгеле бер төбәктә виноградтан әзерләнгән дигән сүз.
Якынлашып килүче Яңа ел белән!
"Россия сыйфат системасы" АКО материаллары буенча
ТР сәнәгать һәм сәүдә министры Альберт Кәримов Татарстан Республикасының Россия төбәкләрендәге һәм чит илләрдәге вәкилләре белән йомгаклау видеоконференциясен үткәрде.
Чарада республика министрлыклары һәм ведомстволары, оешмалар, шулай ук ТР Дәүләт Советы вәкилләре катнашты.
Альберт Кәримов узган елгы эш йомгаклары турында сөйләде һәм яңа 2020 елга уртак эшчәнлек өчен төп бурычлар билгеләде.