ЯҢАЛЫКЛАР
Сәнәгатьне үстерү фондының Экспертлар советы Татарстандагы "РИАТ" ААҖ предприятиесенә "Хезмәт җитештерүчәнлеге" программасы буенча 300 млн. сумлык кредит хуплаган. Компания җиһазлар сатып ала, җитештерү процессларын сакчыл җитештерү принципларын һәм методларын исәпкә алып оештыра һәм яңа модернизацияләнгән корпуста елына 2 меңгә кадәр махсус автомобиль җитештерә башлаячак. Үткәрелгән чаралар нәтиҗәсендә предприятиедә хезмәт җитештерүчәнлеге 2024 елга 40%ка артачак.
Алынган акчага төрле юлларда һәм климат шартларында файңадалану өчен өстәмә эшләп бетерелгән КАМАЗ автомобильләрен җитештерү өчен әзерләү, механик эшкәртү, эретеп ябыштыру, җыю һәм буяу җайланмалары комплекслары, махсус җиһазлар, үзбушаткыч һәм борт платформалары (тагылмалар), автоцистерналар һәм вакуум төягечләре өчен күп күчәрле шассилар сатып алыначак.
Производствоны җиһазлар белән тәэмин итү белән параллель рәвештә, предприятиедә канбан-системаларны, визуализация системаларын һ.б. сакчыл җитештерү принциплары һәм методлары нигезендә технологик чишелешләр җыелмасын гамәлгә кертү планлаштырыла. Моннан тыш, предприятие, CAD/CAM/CAE/ERP/APS/MES/WMS/PLM программа тәэминатын кулланып, продукция эшләү һәм чыгару процессларын "цифрлаштырырга" ниятли. Бу бердәм мәгълүмат киңлеген булдырып, аның ярдәмендә предприятиедәге идарә итүнең барлык автоматлаштырылган системалары, шулай ук сәнәгать җиһазлары (IoT - әйберләр интернеты) оператив рәвештә мәгълүмат алмаша алачак, бу исә җиһазларның һәм персоналның эш нәтиҗәлелеген бәяләргә мөмкинлек бирәчәк.
Проектның гомуми бюджеты 422,3 млн. сум тәшкил итә.
РФ Сәнәгатьне үстерү фонды матбугат хезмәте материаллары буенча
"Түбән Кама нефть химиясе" ГАҖ хезмәткәре – 3601нче цехның химия анализы лаборанты Рената Асылгәрәева "Яшь профессионаллар" (Ворлдскиллс Россия) төбәк чемпионатында беренче урын яулаган. Ярышларның чираттагы этабы 11-16 ноябрь көннәрендә Түбән Каманың Н.В.Лемаев исемендәге нефть химиясе һәм нефть эшкәртү көллиятендә узган.
Рената Асылгәрәева 22 яшькә кадәрге категорияләрдә "Лаборатор химия анализы" компетенциясендә катнашкан. Җиңүче исеме өчен Түбән Кама, Бөгелмә, Алабуга һәм Казаннан барлыгы 7 яшь белгеч көрәшкән. Ярышның беренче ике көнендә катнашучылар һәм экспертлар җиһазлар белән танышкан, матдәләр составын билгеләү методикасын өйрәнгәннәр.
Чемпионат эксперты сыйфатында "Нижнекамскнефтехим" ГАҖ 3601 нче цехының әйдәүче белгече Мария Ильина чыгыш ясаган.
Экспертның тырыш хезмәте һәм чемпионатка әзерлек барышында катнашучының нәтиҗәле һәм көйле эше нәтиҗәсендә, Асылгәрәева Рената, 548 балл җыеп, I урынны яулаган.
Нәтиҗәләр ясаганда биремне үтәүгә сарыф ителгән вакыт, аны үтәү сыйфаты, куркынычсызлык техникасын үтәү исәпкә алынган.
"Яшь профессионаллар" илкүләм чемпионатының финалы 2020 елда Кемерово өлкәсендә узачак.
"Нижнекамскнефтехим" ГАҖ матбугат хезмәте материаллары буенча
Казан милли тикшеренү технология университеты нефть-газ химиясе предприятиеләре хезмәткәрләренең һәм югары уку йортлары укытучыларының квалификациясен күтәрү буенча өстәмә һөнәри программаларны гамәлгә ашыра башлаячак.
Тыңлаучылар өчен проектлар бушлай – алынган грантлар кысаларында программаларны гамәлгә ашыру чыгымнарын дәүләт субсидияли.
Проектларның берсе – тармак предприятиеләре хезмәткәрләренең, шулай ук 17 өстәмә һөнәри программаның берсе яки берничәсе буенча мәнфәгатьле гражданнарның квалификациясен күтәрүгә юнәлдерелгән. Алар ихтыяҗ булган программалардан гыйбарәт, әйтик:
- "Нефть-газ эше нигезләре";
- "Технологик процессларны һәм җитештерүне автоматлаштыру";
- "Заманча предприятиедә (оешмада) хезмәтне саклау белән идарә итү системасында нәтиҗәле корал буларак профессиональ хәвеф-хәтәрләрне бәяләү";
- "Яшь белгечләрне адаптацияләү һәм аларның һөнәри күнекмәләрен камилләштерү";
- "Газ эшкәртү һәм җитештерелә торган продукциянең сыйфатын арттыру";
- "Нефть химиясе производстволары технологиясе";
- "Нефть-газ җитештерү җиһазлары";
- "Нефть һәм газ продукциясенең сыйфаты";
- "Юынты суларны чистарту процессларында нанотехнологияләрне куллану";
- "Лак-буяу өчен яңа материаллар һәм технологияләр" һ.б.
Тәкъдим ителгән барлык программалар буенча укыту көндезге һәм дистанцион форматта оештырылачак: укытуның ярты вакытын тыңлаучылар турыдан-туры белем алачак, тагын ярты вакытын читтән торып белем бирү технологияләре ярдәмендә белем алачак. Дәресләрне югары квалификацияле укытучылар – профессорлар, доцентлар һәм предприятие һәм оешмаларның гамәлдәге белгечләре үткәрәчәк. Программалар КНИТУ да, заказчы территориясендә дә гамәлгә ашырылачак.
Нефть химиясе өлкәсендәге программаларны тыңлаучылар арасында шулай ук үз компетенцияләрен киңәйтергә, яңа өлкәдә база белемнәрен алырга, карьера үсешен тәэмин итәргә яки эшне алыштырырга теләгән югары һәм урта һөнәри белемле затлар да катнаша ала.
Программаларда катнашу өчен заявканы 2019 елның 25 ноябреннән 20 декабренә кадәр тапшырырга мөмкин. Дәресләр төркемнәр туплануга карап башланачак. Барлык программалар да квалификация турында документ – билгеләнгән үрнәктәге таныклыклар бирү белән тәмамланачак.
Тулырак мәгълүмат алу өчен:
8 (843) 279-40-49, 231-41-02
idpoknitu@mail.ru
Программалар турында тулырак:
http://www.kstu.ru/article.jsp?id=0&id_e=105512
http://www.kstu.ru/event.jsp?id_a=24247&id=105514
Казан милли тикшеренү технология университетының матбугат хезмәте материаллары буенча
"Вертолеты России" холдингының (Ростех дәүләт корпорациясенә керә) Казан вертолет заводы Һава транспорты федераль агентлыгыннан (Росавиация) Ми-38 серияле иң яңа граждан вертолетын күпләп чыгару өчен җитештерүче сертификаты алган. Беренче машина заказчыга бу ел ахырына кадәр җибәреләчәк.
Кулланылган техник чишелешләр нәтиҗәсендә вертолет йөк күтәрүчәнлеге, пассажирларны сыйдыру һәм төп очу-техник характеристикалары буенча үз классына караган башка машиналарны уздыра. Максималь очып китү массасы 15,6 тонна булган вертолет бортка яки тышкы элмә җайланмасына 5 тонна файдалы йөк алырга сәләтле. Пассажирлар өчен Ми-38 очкычы бортка 30га якын кешене алырга мөмкин.
Вертолетның өстәмә ягулык баклары белән транспорт конфигурациясендәге очышы 1000 чакрымга кадәр озайтыла. Ми-38 очкычы илдә җитештерелгән яңа двигательләр, аварияле ягулык системасы, йомшак грунтка һәм карга утырту өчен шассига өстәмә терәкләр белән җиһазландырылган.
"Казан вертолет заводы" ГАҖ матбугат хезмәте материаллары буенча
Бөтендөнья сыйфат көнендә "Казан ярминкәсе"ндә Татарстан Республикасының иң яхшы метрологларын һәм стандартизаторларын игълан иттеләр. Бүләкләү тантанасында министр урынбасары Герман Лернер катнашты.
2015 елда "Татарстан Республикасының иң яхшы товарлары һәм хезмәт күрсәтүләре" конкурсында "Сыйфатлы продукция һәм хезмәт күрсәтүләр үсешенә зур өлеш керткән өчен" номинациясе барлыкка килде. Ул "Иң яхшы метролог", "Иң яхшы стандартизатор", "Иң яхшы сынау лабораториясе" һәм "Югары уку йортларын тәмамлаучыларның иң яхшы диплом эше" номинацияләреннән тора.
Республиканың иң яхшы метрологлары арасында — "КАМАЗ", "ТАНЕКО", "Татарстан Республикасы РТПЦ" хезмәткәрләре һәм башкалар. "ТРның иң яхшы стандартизаторы" номинациясендә – җиде кеше, шул исәптән КМПО, КВЗ һәм "Нижнекамскнефтехим"нан да, җиңүчеләр бар.
Конкурс нәтиҗәләре буенча, иң яхшы сынау лабораторияләре – "Белый Кремль" сыра кайнату заводы, "Татнефть", "Татинвестгражданпроект" лабораторияләре һәм башкалар. КНИТУ, КФУ һәм НИТУ-КАИ тәмамлаучылар "Иң яхшы диплом эшләре" номинациясендә дипломнар алды.
"Татарстан Республикасында Стандартлаштыру, метрология һәм сынаулар дәүләт төбәк үзәге" ФБУ директоры Фәрит Туктаров коллегаларын лаеклы бүләкләре белән котлады.
"Татарстан Республикасында Стандартлаштыру, метрология һәм сынаулар дәүләт төбәк үзәге" ФБУ материаллары буенча
14 нче ноябрьдә "Татэнергосбыт" АҖдә энергияне саклау темасына багышланган "Кояш куяны" X республика балалар иҗат эшләре конкурсында җиңүчеләрне һәм призерларны бүләкләү тантанасы булды.
Узган 10 ел эчендә конкурста Татарстан Республикасының 60тан артык шәһәр һәм торак пунктыннан 2675 бала катнашкан. 2228 рәсем һәм 447 шигырь (рус һәм татар телләрендә) җибәрелгән.
Конкурс гадәттәгечә балаларда зур кызыксыну уята. Яшь катнашучылар иҗади эшләрендә энергияне сак тоту темасына төрле техникада башкарылган хикәяләр һәм шигырьләр, рәсемнәр һәм кул эшләнмәләре форматында идеяләр чагылдырган.
Чарада катнашучылар өчен конкурслар һәм эшләр күргәзмәсе белән бәйрәм программасы оештырылган иде. Конкурсантларга мактау бүләкләрен "Татэнергосбыт" АҖ директоры Рифнур Сөләйманов тапшырды.
Конкурс нәтиҗәләре буенча 4 яшьтән 17 яшькәчә балалар "Иң яхшы рәсем", "Иң яхшы хикәя яки шигырь" һәм "Иң яхшы эшләнмә" номинацияләрендә бүләкләнде.
"Татэнергосбыт" АҖ материаллары буенча
Фестиваль Татарстанда агымдагы елның 1 мартыннан 16 ноябренә кадәр узды. Заявка кампаниясе 1 октябрьдә тәмамланды. Зона буенча сайлап алу турлары Әлмәт, Зәй, Яр Чаллы һәм Казанда зур уңыш белән узды.
Фестиваль эшче һәм инженер һөнәрләрен популярлаштыруга, эшче яшьләрнең иҗади потенциалын ачуга юнәлдерелгән. Проект республика предприятиеләрендә һәм оешмаларында эшләүче 18 яшьтән 35 яшькә кадәрге яшьләргә иҗади яктан үзләрен күрсәтергә тәкъдим итә.
Быел "Наше время - Безнең заман" фестивалендә катнашу өчен республиканың төрле милек формасындагы 174 предприятиесе, оешма һәм учреждениесе вәкилләре заявка биргән.
Быел фестивальдә катнашучылар арасында "Аммоний", "Нижнекамскнефтехим", "Әлмәт торба заводы", С.П.Горбунов исемендәге "Казан авиация заводы" – "Туполев" ГАҖ филиалы, "Татэнерго", "Татнефть-Нефтехим" ИК, "Казан дәүләт казна дары заводы", "Юл хәрәкәте иминлеге" ДБУ һ.б. кебек республиканың танылган предприятиеләре һәм оешмалары бар.
Фестивальдә катнашучылар "Музыкаль юнәлеш", "Бию юнәлеше", "Дан минуты", "Предприятиенең визит карточкасы" номинацияләрендә үз номерларын тәкъдим итте. Гала-концерт Татарстан Республикасы Президенты Рөстәм Миңнеханов катнашында узды.
Фестивальне оештыручылар – Татарстан Республикасы Сәнәгать һәм сәүдә министрлыгы, Татарстан Республикасы Яшьләр эшләре министрлыгы, Татарстан Республикасы Мәдәният министрлыгы, Татарстан Республикасы Мәгариф һәм фән министрлыгы, "Татмедиа" АҖ, Татарстан Республикасы Муниципаль берәмлекләр советы, "Татарстан Республикасы предприятиеләре һәм оешмалары яшьләре берлеге" ТИО, Татарстан Республикасы предприятиеләре һәм эшкуарлары ассоциациясе һәм Татарстан Республикасы Һөнәр берлекләре федерациясе.
Проектның идея авторы һәм оештыручысы – Татарстан Республикасының "Созвездие-Йолдызлык" төбәк яшьләр иҗтимагый оешмасы.
Фестивальдә җиңүчеләр һәм лауреатлар дипломнар, истәлекле бүләкләр, акчалата премияләр белән бүләкләнде.
Гран-при иясе – С.П.Горбунов исемендәге Казан авиация заводы – "Туполев" ГАҖ филиалы командасы Татарстан Республикасы Президентының Күчмә кубогы һәм 500 мең сум күләмендә акчалата премия алды.
Җиңүчеләрне котлыйбыз!
ТР Президенты матбугат хезмәте һәм Руслан Шиһабетдинов материаллары файдаланылды
Альберт Кәримов Кытай Халык Республикасына булган эш сәфәре кысаларында "China Hi-Tech Fair" (CHTF) күргәзмәсендә булды. 2019 елның 17 ноябренә кадәр Кытайда югары технологияләр өлкәсендә "China Hi-Tech Fair" (CHTF) 21 нче халыкара күргәзмә эше дәвам итәчәк.
Күргәзмә кысаларында эшлекле очрашулар узды, аерым алганда, министр күргәзмәне оештыручы компаниянең топ-менеджеры белән очрашты.
CHTF ел саен үткәрелә һәм 1999 елдан бирле гамәлдә. Агымдагы күргәзмәдә якынча 500 мең кеше булган, ә 3 меңгә якын компания үз продукциясен, шул исәптән Россиядән дә, тәкъдим иткән.
Быел күргәзмә кысаларында ясалма интеллект, "акыллы" җитештерү, энергия саклаучы һәм "яшел" технологияләр, IT, 5G-технологияләр, биология һ.б. өлкәләрдә яңа технологияләр күрсәтелә.
Күргәзмәнең эш программасы профильле семинарлар, сәнәгать конференцияләре, инвесторлар һәм җитештерүчеләр өчен презентацияләр белән үрелеп бара.
"Хезмәт җитештерүчәнлеге һәм эш белән тәэмин итүгә ярдәм итү" илкүләм проектын гамәлгә ашыру кысаларында "#ЛидерыПРО – эффектив җитештерү 2.0" федераль хакатоны үткәрелә. Икътисадның чимал булмаган секторындагы Татарстан предприятиеләрен хакатонның төбәк этабында актив катнашырга чакырабыз.
Оештыручылар чарада катнашучылар арасыннан Россия Федерациясе Икътисадый үсеш министрлыгының Экспертлар советы тарафыннан эшләнгән җитештерү һәм корпоратив кейсларны көн дәвамында хәл итәчәк командаларны формалаштырачак. 2020 елда иң яхшы карарларны тәкъдим иткән командалар Мәскәүгә гомумроссия хакатоны финалына юл тотачак, анда башка төбәкләрдән халыкара стажировкага бару хокукы өчен җиңүчеләр белән көч сынашачак.
"#ЛидерыПРО – нәтиҗәле җитештерү 2.0" хакатонында катнашу түбәндәге мөмкинлекләрне бирәчәк:
- бөтен команда өчен халыкара стажировканы оту;
- халыкара икътисад мәйданчыкларында үз проектыңны тәкъдим итү;
- "Инновация лидерлары" берләшмәсе әгъзасы булу;
- үз тәкъдимнәрең һәм ноу-хау өчен экспертлардан бәя алу;
- танышлар, компетенцияләр даирәсен киңәйтү, һөнәри күнекмәләрне яхшырту;
- үз предприятиесендә генә түгел, ә илдә дә хезмәт җитештерүчәнлеген арттыручылар командасына керү.
Хакатонны уздыру вакыты һәм урыны – 2019 елның 20 ноябре, 9:00 сәгатьтә, "Торатау" конгресс-холлы, Уфа шәһәре, Зак Вәлиди урамы, 2.
Катнашу өчен www.reglider.ru сайтында гариза калдырырга кирәк.
Катнашу мәсьәләләре буенча +7 (925) 722-26-47 телефоны аша мөрәҗәгать итәргә була.
Форд Соллерс Алабуга предприятиесе Ozonның эре интернет-кибетен Ford Transit автомобильләре белән тәэмин иткән. Агымдагы елның ноябрь ахырына кадәр компаниягә барлыгы 743 брендлы автомобиль кайтачак.
Ford Transit автомобильләрен сатып алу, ил төбәкләрендә машина бирү пунктларын арттыру максатыннан, интернет-кибет автопаркын киңәйтү кысаларында башкарылган.
Ford Transit файдасына сайлау әлеге автомобильләрнең югары ышанычлылыгы, сервисның түбән бәясе, үсеш алган дилерлар челтәре булу, сатканда автомобильләрне шактый югары бәядән җибәрә алу мөмкинлеге белән эшләнгән. Автомобильләр партиясенең күпчелек өлеше Мәскәүдә калачак, ә калганнары Россиянең эре шәһәрләрендәге пунктларга бүлеп биреләчәк: Санкт-Петербург, Екатеринбург, Казан, Краснодар, Самара, Ростов-на-Дону һәм башкалар.
Клиентларга заказны җиткерү өчен Ozon компаниясе тарафыннан 3100 кг металл Ford Transit фургоннары һәм уртача түбәле 3500 кг металл фургоннар, алгы һәм тулы приводлы модификацияләрдә сайлап алынган.
Автомобильләр 2,2 литрлы (125 ат көче) Duratorq TDCi двигателе һәм 6 баскычлы МКПП, кондиционер, дистанцион идарә пульты булган программалы алдан җылыта торган җайланма, кертеп ясалган Bluetooth магнитола белән тәэмин ителгән, бу исә йөртүчегә кесә телефонына игътибар итмәскә һәм хәрәкәтнең иминлек дәрәҗәсен арттырырга мөмкинлек бирә.
Автомобильгә шулай ук арткы паркрониклар да урнаштырылган, алар машина йөртүчене артка хәрәкәт иткәндә булган тоткарлыклар турында кисәтә. Автомобильләр фирма төсенә – ачык зәңгәргә буялган һәм компаниянең логотиплары белән брендланган.
Ford Sollers матбугат хезмәте материаллары буенча