Кострома татарлары милли-мәдәни автономиясе вәкилләре белән очрашу
2016 елның 24 маенда Татарстан Республикасы Президенты Рөстәм Миңнеханов Костромага эш визиты кысаларында җирле татар милли-мәдәни автономиясе вәкилләре белән очрашты. Очрашуда регион башлыгы Сергей Ситников, ТР Премьер-министр урынбасары – ТР сәнәгать һәм сәүдә министры Алберт Кәримов, "Бөтендөнья Татар Конгрессы" башкарма комитеты рәисе Ринат Закиров, Кострома өлкәсе татарларының Региональ милли-мәдәни автономиясе җитәкчелеге һәм вәкилләре катнашты.
Туган телне, мәдәният, йолаларны саклап калу сорауларына аеруча игътибар бирергә кирәк, дип ассызыклады Рөстәм Миңнеханов. Бүген без Россиядә һәм аның тышында, читтә яшәүче татарлар белән элемтәне тотарга тырышабыз, диде ул.
Татарстан Республикасы Президенты Рөстәм Миңнеханов Интернеттан үзлектән татар телен өйрәнүгә мөмкинлек биргән Татарстанның “Ана теле” проектын онлайн-укытуны тормышка ашыруы хакында әйтте. Моннан тыш, тәүлек буе татар телендә эшләүче “ТНВ-Планета” спутник телеканалы бар.
Аерым, Татарстан Республикасы Президенты Кострома өлкәсе җитәкчелегенә һәм шәхсән губернатор Сергей Ситниковка, өлкәдә яшәүче татарларның мәдәниятен саклап калу өчен тудырган барлык шартлар өчен рәхмәт сүзләрен җиткерде.
Сөйләшү барышында Рөстәм Миңнеханов һәм Кострома татарлары туган телне саклап калу, исламның традицион юнәлешен үстерү, экстремизмның төрле чагылышларына каршы тору сораулары хакында фикер алыштылар.