Казанда Россия импортны алыштыру һәм оборона сәнәгате комплексын үстерү мәсьәләләре буенча фикер алыштылар

2014 елның 18 июнендә Казанга эш визиты кысаларында килгән Россия Федерациясе сәнәгать һәм сәүдә министры Денис Мантуров “Казан вертолет заводы”нда импортны алыштыру мәсьәләсе һәм Татарстан Республикасы территориясендә урнашкан оборона сәнәгате комплексы предприятиеләрен үстерү мәсьәләләре буенча киңәшмә уздырды. Киңәшмә эшендә Татарстан Республикасы Президенты Рөстәм Миңнеханов, Татарстан Республикасы Премьер-министры Илдар Халиков, Татарстан Республикасы Премьер-министр урынбасары – Татарстан Республикасы сәнәгать һәм сәүдә министры Равил Зарипов, Татарстан ОСК предприятиеләре җитәкчеләре катнашты.
Киңәшмә башланыр алдыннан, хөрмәтле кунаклар “КВЗ” ААҖ ахыргы җыю цехында булдылар. Денис Мантуров һәм Рөстәм Миңнеханов “Ми-8”, “Ми-17”, “Ансат” вертолетларын, шулай ук яңа авыр вертолет прототибы “Ми-38”не дә карадылар.
Россия Федерациясе сәнәгать һәм сәүдә министры Денис Мантуров предприятиенең алдынгы хезмәткәрләренә ведомство бүләкләре тапшырды.
Татарстан Республикасы Президенты Рөстәм Миңнеханов “Казан вертолет заводы”н республиканың горурлыгы дип атады. “Кайсы гына илгә бармасак та, бөтен җирдә безнең вертолетларны беләләр”, - дип билгеләде Р.Миңнеханов.
Рөстәм Миңнеханов “Фидакарь хезмәт өчен” Татарстан Республикасы медален “Казан вертолет заводы” ААҖ маркетинг һәм сату буенча директоры Валерий Пашкога тапшырды.
Татарстан территориясендә урнашкан оборона сәнәгате комплексы предприятиеләре үсеше буенча киңәшмәне ачып, Россия Федерациясе сәнәгать һәм сәүдә министры Денис Мантуров импорт комплект өлешләре белән тәэмин итү өлкәсендә булган мәсьәләләр турында хәбәр итте, бигрәк тә Украинадан килүче детальләр.
Ул билгеләгәнчә, соңгы елларда Россия ОСКнда импортны алыштыру буенча планлы эш алып барылды. Шуңа күрә бүгенге көнгә Хөкүмәткә импортны алыштыру буенча план бирелгән. Һәм июнь ае ахырына хәтле без импортны алыштыру программасы буенча эшне тәмамлыйбыз – ул Хөкүмәткә кертелергә тиеш.
Министр сүзләренчә, программа проектында бөтен тармаклар чагылдырылган. “Программада күрсәтелгән бөтен сроклар да гамәлгә ашырырлык дип саныйм. Иң озагы 2,5 елда (кайбер позицияләр буенча – 3 елда) без куелган максатларга ирешә алырбыз”, - дип белдерде министр.
Татарстан Президенты Рөстәм Миңнеханов республикада 20 предприятие оборона заказын башкарганы турында хәбәр итте. “Без кемгә дә булса бәйле булырга тиеш түгел, комплект өлешләрен үзебезгә эшләргә, яки Россиянең башка регионнарыннан сатып алырга кирәк”, - дип белдерде Татарстан Республикасы Президенты.
Татарстан Республикасы территориясендә урнашкан оборона сәнәгате комплексы предприятиеләренең үсеш мәсьәләләре хакында Татарстан Республикасы Премьер-министр урынбасары – Татарстан Республикасы сәнәгать һәм сәүдә министры Равил Зарипов җиткерде.