Силикон җитештерү буенча яңа завод төзелешенә нигез салынды

2014 елның 18 июнендә Казанда “Казан синтетик каучук заводы -Силикон” ААҖ яңа заводы төзелеше башлану хөрмәтенә завод территориясендә истәлек билгесе ачылды. Тантанада Россия сәнәгать һәм сәүдә министры Денис Мантуров, Татарстан Республикасы Президенты Рөстәм Миңнеханов, Татарстан Республикасы Премьер-министры Илдар Халиков, “Внешэкономбанк” (Үсеш һәм тышкы икътисадый эшчәнлек банкы) дәүләт корпорациясе идарәсе рәисе Владимир Дмитриев, Татарстан Республикасы Премьер- министр урынбасары –Татарстан Республикасы сәнәгать һәм сәүдә министры Равил Зарипов, “Казан синтетик каучук заводы” идарәсе рәисе Евгения Даутова, Татарстанның министрлыклар, ведомстволар, сәнәгать предприятиеләре, укыту оешмалары вәкилләре катнашты.
Россия Федерациясе сәнәгать һәм сәүдә министры Денис Мантуров хәбәр итүенчә, әлегә кадәр, советлар чорыннан соңгы киңлектә, кремний органик продукция җитештерү өчен чимал чыгаруга җитештерү куәтләре җитәрлек булмады. Чималның саллы өлеше чит илдән сатып алынды. Россия базарының товар үткәрә алу мөмкинлеге әлеге продукт буенча елына 50-60 мең тонна тирәсе тәшкил итә, һәм ул елдан-ел өзлексез киңәя бара”, - диде Денис Мантуров.
Завод импортны алыштыру максаты белән булдырыла. Проект куәтлелеге - елына 40 мең тоннадан гыйбарәт, перспективада әлеге күрсәткеч үсәчәк. Әлеге завод яңа технологияләр белән заманча җиһазландырылачак. Инвестицион проект финанс ресурслар белән дә тәэмин ителгән.
Заводның төзелеше киләсе елда тәмамланачак. 2016 елда ул проектлы кәүтлеккә күчәчәк дип көтелә.