Татарстан -Төркия эшлекле форумы кысаларында берничә хезмәттәшлек итү турында килешү имзаланды

2014 елның 30 маенда Төркия Республикасының Мерсин шәһәрендә Татарстан Республикасы Президенты Рөстәм Миңнеханов һәм Төркия Республикасының икътисад министры Нихат Зәйбәкче катнашында Татарстан –Төркия эшлекле форумы узды.
Татарстан-Төркия эшлекле форумда Рөстәм Миңнеханов Төркия Республикасы җитәкчелегенә үзара хезмәттәшлек үсешенә биргән игътибарлары өчен рәхмәт белдерде.
Татарстан Президенты билгеләгәнчә, Төркия Татарстан территориясендә теркәлгән чит ил капиталлы предприятиеләр буенча беренче урында тора. Бүгенге көндә андый компанияләр 278. Быел “Алабуга” МИЗ территориясендә тагын берничә төрек заводы ачу планлаштырылган. Рөстәм Миңнеханов сүзләренчә, Төркия Республикасы белән багланышларның югары дәрәҗәсе канәгатьләндерә, әмма шул ук вакытта бик зур икътисадый потенциал бар һәм аны ике якка да нәтижәле кулланырга кирәк.
Форумда катнашучылар алдында Төркия Республикасының икътисад министры Нихат Зәйбәкче, Мерсин шәһәренең Сәүдә–сәнәгать палатасы рәисе Шәрәфетдин Ашут, Татарстан Республикасы Премьер–министр урынбасары – Татарстан Республикасы сәнәгать һәм сәүдә министры Равил Зарипов, Татарстан Республикасы инвестицион үсеш Агентлыгы, “Алабуга” МИЗ җитәкчеләренең вәкилләре һәм башкалар чыгыш ясадылар.
Татарстан-Төркия форумы кысаларында берничә ике яклы килешү имзаланды. Имзалау тантанасында Татарстан Республикасы Президенты Рөстәм Миңнеханов һәм Төркия Республикасы икътисад министры Нихат Зәйбәкче катнаштылар.
Татарстан Республикасы Сәнәгать һәм сәүдә министрлыгы һәм Төркия Республикасының тышкы икътисадый элемтәләр буенча Комитеты арасында хезмәттәшлек итү турында килешү имзаланды. Әлеге килешүне Татарстан Республикасы Премьер–министр урынбасары– Татарстан Республикасы сәнәгать һәм сәүдә министры Равил Зарипов һәм Төркия Республикасы тышкы икътисадый элемтәләр буенча Комитеты рәисе урынбасары Җиһан Җәдемиров имзаладылар.
Шулай ук Татарстан Республикасы Сәнәгать һәм сәүдә министрлыгы һәм Төркия Республикасының палаталар һәм биржалар берлеге арасында хезмәттәшлек итү турында килешү имзаланды. Әлеге килешүне Татарстан Республикасы Премьер–министр урынбасары– Татарстан Республикасы сәнәгать һәм сәүдә министры Равил Зарипов һәм Төркия Республикасының палаталар һәм биржалар берлеге әгъзасы Шахин Белгеч имзаладылар.
Исегезгә төшерәбез, агымдагы елның 29 һәм 30 май көннәрендә Татарстан Республикасы Президенты Рөстәм Миңнеханов җитәкчелегендәге Татарстан Республикасы делегациясе Төркиядә эш визиты белән булды.
Татарстан Республикасы делегациясе составында Татарстан Республикасы Премьер-министры урынбасары –Татарстан Республикасы сәнәгать һәм сәүдә министры Равил Зарипов, Татарстан Республикасы Президентының халыкара һәм тышкы икътисадый мәсьәләләр буенча ярдәмчесе Радик Гыйматдинов, Татарстан Республикасы Инвестицион үсеш агентлыгы җитәкчесе Линар Якупов, Татарстан Республикасы Туризм буенча Дәүләт комитеты рәисе Сергей Иванов, Татарстан Республикасының Төркәядәге тулы вәкаләтле вәкиле Айдар Гашигуллин, Түбән Кама муниципаль районы башлыгы – Түбән Кама шәһәре мэры Айдар Метшин, Азнакай муниципаль районы башлыгы Марсель Шайдуллин, Теләче муниципаль районы башлыгы Илдус Зарипов, Нурлат муниципаль районы башлыгы Равил Кузюров, Сәүдә-сәнәгать палатасы идарәсе рәисе Шамил Агеев һәм башкалар бар иде.