Стратегик инициативалар агентлыгының лидерлар Клубы делегациясе белән булган очрашуда инвестицион климатны яхшырту мәсьәләләре каралды

2014 елның 16 маенда Татарстан Республикасы Премьер–министр урынбасары – Татарстан Республикасы сәнәгать һәм сәүдә министры Равил Зарипов Татарстан Республикасы Президенты Рөстәм Миңнехановның Стратегик инициативалар агентлыгының бизнес инициативаларын алга сөрү Клубы лидерлары белән булган очрашуында катнашты. Очрашу барышында Россия һәм Татарстанда инвестицион климатны яхшырту мәсьәләләре каралды.
«Инвестицион климатны яхшырту - бөтенебез өчен дә уртак мәсьәлә”, - дип ассызыклады Татарстан Президенты очрашу барышында. Рөстәм Миңнеханов уйлавынча, “эшмәкәрләр, эшләргә, өстәмә бәя булдырырга теләүче кешеләр буларак, җәмгыятьтә абруйлы булырга һәм дәүләт хакимиятеннән ярдәм күрергә тиешләр.”
Лидерлар Клубы рәисе Артем Аветисян Рөстәм Миңнехановка гамәлгә ашырыла торган "Контроль сатып алулар" проекты турында сөйләде. Әлеге проект дәүләт органнарының кирәкле контроль һәм теркәү процедураларның никадәр тиз һәм уңайлы булуын эшкуарларның үзләре тарафыннан "яшерен" тикшерелүен күз алдында тота.
Шулай ук очрашу барышында делегация әгъзалары республика җитәкчелегенә хезмәттәшлек итү мөмкинлекләрен һәм инвестицион климатны яхшырту буенча тәкъдимнәр билгеләделәр. Татарстан вәкилләрен клубның бизнес-делегациясе составына керергә чакырдылар.