Татарстан белән Һиндстан хезмәттәшлеге үсә

2014 елның 13 маенда Татарстан Республикасы Премьер–министр урынбасары – Татарстан Республикасы сәнәгать һәм сәүдә министры Равил Зарипов Татарстан Республикасы Президенты Рөстәм Миңнехановның Һиндстан Республикасының Россия Федерациясендәге Гадәттән тыш һәм Тулы вәкаләтле илчесе Пунди Сринивасан Рагхаван белән булган очрашуда катнашты.
Рөстәм Миңнеханов хәбәр иткәнчә, 2013 елда Татарстан белән Һиндстан арасында товар әйләнеше 2,3 мәртәбә артты.
Һиндстан Казан вертолет заводының төп заказ бирүчеләренең берсе, 2000-2012 елларда 160 гражданлык һәм хәрби-транспорт вертолетларын алдылар. Тагын 70 машинаны аларга әзерлиләр. Шулай ук Һиндстанда “КАМАЗ”ның җыю җитештерүе эшли, анда узган елда 150дән артык машина җыелган. Нефть химиясе өлкәсендә “ТАИФ” төркеме һәм “Reliance” компанияләр төркеме арасында хезмәттәшлек үсә.
Татарстан Республикасы Президенты фикеренчә, Татарстан белән Һиндстан арасында хезмәттәшлек юнәлешләренең перспективалары бар. Һиндстан эшмәкәрләре “Алабуга” МИЗда инвестицион проектларын гамәлгә ашыра алалар, ИТ-өлкәсендә үскән ил буларак, Һиндстан «Иннополис» проектында да катнаша алыр иде. Татарстан Президенты мәдәният һәм мәгариф, туризм өлкәләрендәге багланышларны билгеләп китте.
Һиндстан Республикасының Россия Федерациясендәге Гадәттән тыш һәм Тулы вәкаләтле илчесе Пунди Сринивасан Рагхаван үз чиратында, Татарстанны Россиянең уңышлы үсеп килүче регионнарының берсе икәнен һәм Татасртан белән Һиндстанның диверсификация юнәлешендәге үзара хезмәттәшлек итү өчен зур мөмкинлекләр булуын белдерде.

Очрашу ахырында Татарстан Президенты Рөстәм Миңнеханов әлеге сәфәр Һиндстан белән Татарстан Республикасы мөнәсәбәтләре үсешенә этәргеч бирер дигән өметен белдерде.