Төркмәнстан «Алабуга» МИЗ территориясендә текстиль җитештерәчәк

2014 елның 6 маенда Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Р. Зарипов Татарстан Республикасы Хөкүмәте бинасында үткәрелгән брифингта катнашты. Брифинг Татарстан Республикасы делегациясенең Төркмәнстанга визиты йомгакларына багышланган иде.
Төркмәнстан "Алабуга" махсус икътисадый зонасында текстиль продукциясен эшләүне һәм җитештерүне тәкъдим итә. Апрель ае ахырында эш визиты белән Төркмәнстанга барган Татарстан Республикасы делегациясенә әлеге тәкъдим белән илнең тышкы эшләр министры Рәшит Мередов мөрәҗәгать итте. Татарстан тәкъдимне кабул итте. Делегация визиты йомгакларына багышланган брифингта бу турыда Р. Зарипов сөйләде.
Визит кысаларында Татарстан Республикасы Президенты Р. Миңнеханов Төркмәнстан Президенты Гурбангулы Бердымөхәммәдов белән очрашты, ике илнең дәүләт хакимияте органнары һәм компанияләре вәкилләре катнашында эшлекле очрашулар үтте. Аерым алганда, энергетика һәм нефтехимия тармагында хезмәттәшлек итү хакында фикер алышулар булды. Төркмәнстан ягы вәкилләре шулай ук «КАМАЗ» ААҖ, «Татнефть» ААҖ, «Казан вертолет заводы» ААҖ, «КМПО» ААҖ, «Казанькомпрессормаш» ААҗ продукциясе белән кызыксынды.
Р.Зарипов әйтүенчә, Казанда Төркмәнстанның сәүдә йортын ачу мөмкинлеге турында да сөйләшүләр булган. Моннан тыш, Татарстан Республикасы Президенты Казанда сәүдә-икътисадый, фәнни-техник һәм мәдәни хезмәттәшлек итү буенча эшче төркем утырышын үткәрергә тәкъдим итте.
2013 елда Татарстан Республикасы һәм Төркмәнстан арасында тышкы сәүдә әйләнеше 42,2 млн. доллар, экспорт 33,3 млн. доллар, импорт 9,1 млн. доллар тәшкил итте. Бу хакта тулырак мәгълүматны Татар-информ сайтыннан табарга мөмкин: http://www.tatar-inform.ru/news/2014/05/06/405502