Татарстан белән Тверь өлкәсе арасында хезмәттәшлек үсә

2014 елның 6 февралендә Татарстан Республикасының Сәнәгать һәм сәүдә министрлыгында Татарстан Республикасы Премьер–министр урынбасары – Татарстан Республикасы Сәнәгать һәм сәүдә министры Равил Зарипов Тверь өлкәсе сәнәгать һәм мәгълүмати технологияләр министры Евгений Вожакин җитәкчелегендәге Тверь өлкәсе делегациясе белән очрашты.
Очрашуда Татарстан Республикасы ягыннан –Татарстан Республикасы Сәнәгать һәм сәүдә министры урынбасары Рашат Фәттахов, Татарстан Республикасы Сәнәгать һәм сәүдә министрлыгының структур бүлекчәләре җитәкчеләре; Тверь өлкәсе ягыннан – Тверь шәһәр Думасы Депутаты, Тверь шәһәр Думасының инвестицион сәясәте буенча даими комиссия рәисе Виталий Котов, Тверь өлкәсе икътисадый үсеш министры урынбасары Денис Ильин, Россия яшь галимнәр берлегенең Тверь төбәге бүлеге рәисе Александр Тимофеев катнашты.
Очрашу барышында Татарстан Республикасы Сәнәгать һәм сәүдә министры җитәкчесе Равил Зарипов Татарстан Республикасының сәнәгать һәм инвестицион потенциалының презентациясен үткәрде, очрашуда шулай ук перспективалы төбәкара хезмәттәшлекне үстерү мәсьәләләре каралды.
Равил Зарипов Тверь өлкәсе вәкилләрен республика сәнәгатендәге төп күрсәткечләр белән таныштырып, 2013 ел нәтиҗәләре буенча, тулаем төбәк продукты күләме 1 трлн. 524 млрд. сум сәнәгать җитештерү индексы – 101,2 процент тәшкил итүен хәбәр итте. Нефть-газ-химия комплексында былтыр 896 млрд. сумлык продукция төяп озатылган, машина төзелеше предприятиеләре 360 млрд. сумлык продукция төяп җибәргән. Электр энергетикасы предприятиеләре буенча товар продукциясе күләме 84 млрд. сум тәшкил иткән.
Татарстан Республикасы Премьер–министр урынбасары – Татарстан Республикасы Сәнәгать һәм сәүдә министры Равил Зарипов 2014 елда һәм перспективада республика алдында торган төп бурычлары турында җиткерде.
Татарстан министры кунакларны республиканың инновацион индустриаль мәйданнары үсеше тәҗрибәсе белән (“Алабуга” МИЗ,”КИП-мастер” индустриаль паркы, “Химград” технополисы, “Идея” технопаркы, “Камские Поляны” һәм башкалар), сәнәгать предприятиеләре өчен югары квалификацияле кадрлар әзерләү белән таныштырды. Шулай ук кунакларга инфраструктур проектларны тормышка ашыру һәм республиканың социаль үсеше турында мәгълүмат җиткерде.
Равил Зарипов Тверь өлкәсе белән товар әйләнешенең 2012 нче елда 1,4 млрд. сум булганын билгеләп үтте, шул исәптән чыгару – 1,3 млрд. сум, кертү – 64,6 млн. сум. Тверь өлкәсе Татарстанның нефть-газ-химия комплексы, машина төзелеше предприятиеләре («КАМАЗ» ААҖ, «УК «Татнефть-нефтехим» ҖЧҖ, «Генерирующая компания» ААҖ, «Казаньоргсинтез» ААҖ, , «Казаньоргсинтез» ААҖ, «Казан оптико-механика заводы» ААҖ, «ХК «Ак Барс» ААҖ, «ICL-КПО ВС» ААҖ, «Вакууммаш» ААҖ, «Электроприбор» Казан заводы ААҖ, «Казан синтетик каучук заводы» ААҖ, «КВАРТ» ЯАҖ, «Л.Я.Карпов исем. химия заводы» ААҖ, «КМИЗ»ААҖ) белән хезмәттәшлек итә. Равил Зарипов төбәкара хезмәттәшлек үсеше кысаларында Тверь өлкәсе белән багланышлар буенча потенциалның зур булуын ассызыклап, хезмәттәшлекнең перспективалы юнәлешләрен билгеләп үтте, шул исәптән машина төзелеше һәм нефть химиясе өлкәсендә ике яклы элемтә, халык куллануындагы товарлар китерүне тәэмин итү, Лин-технологияләр кертүдә һәм кадрлар әзерләүдә тәҗрибә уртаклашу.
Евгений Вожакин Татарстан Республикасы Сәнәгать һәм сәүдә министрлыгы җитәкчелеген, сәнәгать предприятиеләре җитәкчеләре белән берлектә, Тверьга эш сәфәре белән килергә чакырды.
Тверь өлкәсе “Казан вертолет заводы” ААҖ, “Химград”, “ИНВЭНТ” технополисларына барырга, республиканың индустриаль мәйданнары резидентлары белән очрашырга ниятли.