2013 елда “Россиянең иң яхшы 100 товары” федераль бәйгесендә катнашучылар саны буенча Татарстан – лидер

2013 елның 27 ноябрендә Казан Ратушасында “Татарстан Республикасының иң яхшы товарлары һәм хезмәт күрсәтүләре” республика бәйгесендә һәм “Россиянең иң яхшы 100 товары” Бөтенроссия бәйгесендә җиңүчеләрне бүләкләделәр.
Татарстан Республикасының башкаласына бөтен республикадан төрле дәүләт һәм шәһси предприятиеләрнең вәкилләре килде. Иң яхшы товар исемен яулар өчен, икътисадның төрле тармакларының 234 предприятиесе 439 төрле продукциясен һәм хезмәтен бәйгегә тәкъдим иткән.
Эре сәнәгать предприятиеләре белән беррәттән, анда кече һәм урта бизнес вәкилләре, медицина һәм мәдәни–мәгариф учрежденияләре дә, халык сәнгать һөнәрләре осталары да катнашты.
“Без үткәрә торган бәйгенең дәрәҗәсе арта, конкурс җитди статуска иреште, сыйфат ягыннан да уңышлы нәтиҗәләр бар”, – дип Татарстан Республикасы Премьер-министры урынбасары - Татарстан Республикасы сәнәгать һәм сәүдә министры Равил Зарипов ассызыклап үтте. Министр җиңүчеләрне билгеләүче критерийларны санап узды: азаккы продуктка бәяләмә, җитештерү процессында һәм менеджментта аудит, шул исәптән, предприятиедә квалификацияле кадрларны әзерләү системасы булу-булмауны тикшерү, технологияләрне камилләштерү буенча эш калыплашкан төстә барамы, теге яки бу тармакта кабул ителгән стандартлар үтәләме, экологик һәм санитар нормаларга җавап бирәме – шушы таләпләрнең үтәлүе, жюри әгъзаларының игътибар үзәгендә иде.
168 товар һәм хезмәт күрсәтү республика бәйгесендә җиңеп, федераль бәйгедә катнаштылар. Нәтиҗәдә, “Россиянең иң яхшы 100 товары” Бөтенроссия бәйгесендә Татарстанның 54 товар һәм хезмәт күрсәтү лауреат исемен, ә 114 – дипломант исемен яуладылар.
Татарстан җитештерүчеләре продукциясе арасында чын мәгънәсендә югары сыйфатка ия продукциянең өлеше зур. “Россиянең иң яхшы 100 товары” программасы дирекциясе җитәкчесе Евгений Сидоров шулай дип белдерде.
Е.Сидоров билгеләп үткәнчә, республика иң югары сыйфатка ия булган товарлары һәм хезмәтләре белән дан казана. Бу бәйгедә җиңү, эчке базарда гына түгел, тышкы базарда да товарларны алга сөрү өчен ярдәм итә. Евгений Сидоров шулай ук быел федераль конкурсның илнең 76 субъектында үткәрелгәне һәм Татарстанның катнашучылар саны буенча лидерлык позициясен биләве турында хәбәр итте.
Бәйгедә җиңүчеләрне тантаналы бүләкләү чарасы Казан Ратушасынның Колонна залында үтте. Сәламләү сүзеннән соң, Равил Зарипов Татарстанның сыйфат лидерларын бүләкләүгә кереште.
“Татарстанның сыйфат лидеры” исеме астында 4 номинациядә аерым бүләкләр бирелде. “Җитештерү-техник билгеләнешле продукция” номинациясендә – “КАМАЗ” ААҖ, “Халык өчен сәнәгать товарлары” номинациясендә – “Адонис” ААҖ, “Азык-төлек товарлары” номинациясендә – “3 нче санлы Казан икмәк пешерү заводы” ААҖ, “Хезмәтләр” номинациясендә – “Казан ярминкәсе” ААҖ бүләкләнделәр.
Шулай ук Сәнәгать һәм сәүдә министры Равил Зарипов “Җитештерү-техник билгеләнешле продукция” номинациясендә 10 номинантны котлады. “Азык-төлек товарлары” номинациясендәге 17 номинантны Татарстан Республикасы вице-премьеры – авыл хуҗалыгы һәм азык-төлек министры Марат Әхмәтов тәбрикләде.
“Хезмәтләр” номинациясендә 15 номинантны Татарстан Республикасы Сәламәтлек саклау министры Гадел Вафин котлады. “Халык һәм сәнгать һөнәрләре эшләнмәләре” номинациясендә җиңүчеләрне Татарстан Республикасы мәдәният министрының беренче урынбасары Ирада Әюпова тәбрикләде.
15 предприятие вәкилләренә “Азык-төлек товарлары”, “Халык өчен сәнәгать товарлары” , “Хезмәтләр” номинациясендә “Россиянең иң яхшы 100 товары” программасының сыйфат буенча төбәк комиссиясе рәисе, “Татарстан Республикасының иң яхшы товарлары һәм хезмәтләре” конкурсының оештыру комитеты рәистәше, “Татарстан Республикасында стандартлаштыру, метрология һәм сынаулар дәүләт төбәк үзәге” ФБУ директоры Фәрит Туктаров кулларыннан бүләкләр тапшырылды.
“Татарстан Республикасы предприятиеләре һәм эшмәкәрләре ассоциациясе” эш белән тәэмин итүчеләрнең төбәк берләшмәсе президенты Александр Лаврентьев “Җитештерү – техник билгеләнешле продукция” һәм “Хезмәтләр” номинациясендә 15 җиңүчене бүләкләде.
Мәгълүмат өчен:
“Татарстан Республикасының иң яхшы товарлары һәм хезмәт күрсәтүләре” республика бәйгесе 2003 елдан үткәрелә. Беренче тапкыр бәйгедә Татарстанның 92 предприятиесе 242 төр продукциясен тәкъдим итте.
“Татарстан Республикасының иң яхшы товарлары һәм хезмәт күрсәтүләре” республика бәйгесенең лауреатларының һәм дипломантларының тулы исемлеге белән, Сәнәгать һәм сәүдә министрлыгы сайтында танашырга була.