Олег Коробченко: «Без эшләнмәләр белән уртаклашырга, шулай ук хезмәттәшләребездән уңай тәҗрибә алырга әзер»
23 июльдә Баня-Лукада Сербия Республикасы Сәүдә-сәнәгать палатасында «Сербия Республикасы – Татарстан Республикасы» бизнес-форумы узды, анда Сербия Республикасы Сәүдә-сәнәгать палатасы Рәисе Горан Рачич, Татарстан Премьер-министры урынбасары – сәнәгать һәм сәүдә министры Олег Коробченко катнашты.
– Татарстан һәрвакыт халыкара хезмәттәшлекне үстерүгә аерым игътибар бирде, һәм бүгенге очрашу ачыклык һәм конструктив диалогка әзерлек үрнәге булып тора, – диде Олег Коробченко, форумда катнашучыларны сәламләп. – Без кичә Президент Милорад Додик һәм Министрлар Кабинеты белән очраштык, Татарстан белән Сербия Республикасы арасында эш планын төзедек. Моннан тыш, без энергетикада да, машина төзелешендә дә, энергомашина төзелешендә дә, гомумән сәнәгатьтә дә барлыкка килергә мөмкин булган перспективалы проектларның зур күләмен тупладык, аларны без хәзер бергәләп гамәлгә ашырырга тырышачакбыз.
Бизнес-форумда Татарстан Республикасы Сәнәгать һәм сәүдә министрлыгы башлыгы Татарстанның сәнәгать потенциалы турында сөйләде.
– Безнең республика Россиянең терәк сәнәгать төбәге булып тора, инновацияләрне актив кертә һәм экспортта лидерлык позициясен били. Без эшләнмәләр белән уртаклашырга, шулай ук хезмәттәшләребездән уңай тәҗрибә алырга әзер, – диде ул.
Шулай ук Олег Коробченко барында Татарстан һәм Сербия Республикасы Сәүдә-сәнәгать палаталары арасында хезмәттәшлек турында килешү имзаланды.
Моннан тыш, бүген Олег Коробченко Сербия Республикасы энергетика һәм тау эшләре министры Петар Джокич, РС икътисад һәм эшкуарлык министры Воин Митрович һәм РС сәүдә һәм туризм министры Денис Шулич белән очрашты. Очрашуларда яклар хезмәттәшлекне алга таба үстерү турында фикер алыштылар.
Шунысын да билгеләп үтәргә кирәк, мондый чаралар «Халыкара кооперация һәм экспорт» илкүләм проекты максатларына ирешүгә ярдәм итә.