Татарстан делегациясе эш визиты белән Сербия Республикасында (Босния һәм Герцеговина)
Премьер-министр урынбасары – республиканың сәнәгать һәм сәүдә министры Олег Коробченко җитәкчелегендә ул Баня-Лукага килде.
Визит быел июнь аенда Сербия Республикасы һәм Татарстан арасында имзаланган килешү кысаларында оештырылды. Ул барлык өлкәләрдә – икътисад, мәдәният, мәгариф һәм туризм өлкәләрендә хезмәттәшлекне күздә тота.
Бүген Олег Коробченко Сербия Республикасы Президенты Милорад Додик белән очрашты. Яклар хезмәттәшлекне алга таба үстерү турында фикер алыштылар.
– Без алга таба хәрәкәт итә алырлык юнәлешләр турында фикер алыштык. Беренче чиратта, бу энергетика. Бүген Сербия Республикасы үзен электр энергиясе белән тулысынча тәэмин итә, өстәвенә аның бәясе Европа үлчәмнәре буенча чагыштырмача түбән булып кала. Энергия чыганаклары теләсә нинди товарның үзкыйммәтенең төп өлешен тәшкил итә, шуңа күрә биредә ныклы энергетика базасы булдыру бик мөһим. Сербия Республикасында тау-руда шахталары бар, бу металлар табарга һәм эшкәртергә, шулай ук аларны алга таба эшкәртүне оештырырга мөмкинлек бирә, – диде Олег Коробченко. – Без шулай ук бүгенге көндә Татарстанда химия сәнәгате, аерым алганда нефть химиясе нык үскән, һәм без монда файдалы була алабыз, дип фикер алыштык.
Мондый очрашулар «Халыкара кооперация һәм экспорт» илкүләм проектының максатларына ирешүгә ярдәм итә.