Россия –Төркия хезмәттәшлеген арттыру мәсьәләләре каралды

2013 елның 20 ноябрендә Татарстан Республикасы Премьер-министры урынбасары - Татарстан Республикасы сәнәгать һәм сәүдә министры Равил Зарипов Татарстан Республикасы Президенты Рөстәм Миңнехановның Россотрудничество җитәкчесе Константин Косачев һәм Төркия Республикасы Милли мәҗлесенең чит илләр эшләре буенча комиссиясе Рәисе Волкан Бозкыр белән булган очрашуда катнашты.
Рөстәм Миңнеханов Россия–Төркия җәмәгатьчелек форумы рәистәшләренә Казанны шушы чараны уздыру урыны итеп сайлаулары өчен рәхмәт белдерде. “Җәмәгатьчелек форумы – безнең хезмәттәшлекнең яңа форматы”,– дип белдерде Рөстәм Миңнеханов. Бу вагыйга Россия белән Төркия, Татарстан Республикасы белән Төркия партнерлары арасындагы мөнәсәбәтләрнең киләчәк үсешенә этәргеч булыр, дип ышаныч белдерде.
Татарстан Республикасы белән Төркия Республикасы арасында товар әйләнеше тотрыклы рәвештә зур күләмдә бара, дип белдерде Рөстәм Миңнеханов, иң эре проектларны “Алабуга” махсус икътисади зонасы территориясендә Төркия компанияләре гамәлгә ашыра. Татарстан белән Төркия арасында традицион рәвештә бизнес–элемтәләребез күп, шулай ук мәдәният, тарих, мәгариф кебек өлкәләрдә хезмәттәшлек алга киткән, дип ассызыклады Республика Президенты.
Россотрудничество җитәкчесе, форумның Россия өлеше идарә рәисе Константин Косачев әйтүенчә, Россия-Төркия җәмәгатьчелек форумы Россия Федерациясе Президенты һәм Төркия Республикасы Премьер-министры күрсәтмәләре буенча Югары дәрәҗәдәге хезмәттәшлекнең Россия-Төркия Советының беренче утырышы карарлары нигезендә гамәлгә куелды. Якын көннәрдә Россия-Төркия югары дәрәҗәдәге хезмәттәшлек Советының дүртенче утырышы уздырылачак (Санкт-Петербург).
Константин Косачев хәбәр иткәнчә, форумның төп максатларының берсе – ике илнең дә граждан җәмгыяте лидерлары өчен үзенә бер төрле мәйданчык булдыру, безнең өчен җәмгыятьтәге заман тенденцияләрен белү мөһим, диде ул.
Татарстан Республикасы Президенты Рөстәм Миңнеханов, үз чиратында, билгеләп үткәнчә, ничәмә-ничә гасырлар буе төрле милләт һәм төрле диннәр вәкилләре дус һәм тату яшәгән Татарстан Россиянең башка регионнары өчен үрнәк булырга мөмкин. Бүген илебезнең бөтенлеген һәм куәтен күрсәтү мөһим, һәм Россия-Төркия җәмәгатьчелек форумы безнең карашларыбызны якынайтырга ярдәм итәчәк, дип саный Рөстәм Миңнеханов.
Төркия Республикасы Бөек Милли мәҗлесенең чит илләр эшләре комиссиясе рәисе, Россия-Төркия җәмәгатьчелек форумының Төркия өлеше рәисе Волкан Бозкыр фикеренчә, Россия–Төркия җәмәгатьчелек форумы халык дипломатиясенә, ике ил халкының тормышына кагылышлы. Бүгенге көндә үзара мөнәсәбәтләрне шул дәрәҗәдә корырга кирәк, дип ассызыклады Бозкыр әфәнде.