Казанда Россия–Төркия җәмәгатьчелек форумы узачак

2013 елның 20 ноябрендә Казанда Россия–Төркия җәмәгатьчелек форумын тантаналы ачу булачак. Чарада Россотрудничество җитәкчесе, форумның Россия ягыннан идарә рәисе К.И.Косачев, Төркия Республикасы Милли мәҗлесенең чит илләр эшләре буенча комиссиясе Рәисе, форумның Төркия ягыннан идарә рәисе В.Бозкыр, Татарстан Республикасы Президенты Р.Н.Миңнеханов, Татарстан Республикасы Премьер-министры урынбасары - Татарстан Республикасы сәнәгать һәм сәүдә министры Р.Х.Зарипов, дәүләт хакимияте органнары вәкилләре, бизнес даирәләр, Россия һәм Төркиянең мәдәният хезмәткәрләре катнашачак. Әлеге чараны Россотрудничество һәм Татарстан Республикасы Хөкүмәте оештыра.
Әлеге форум югары дәрәҗәле хезмәттәшлек Советының беренче утырышы карарлары нигезендә Россия Федерациясе Президенты һәм Төркия Республикасы Премьер–министры боерыгы нигезендә оештырылган.
Форумда эшлекле даирәләр, мәдәният һәм сәнгать оешмалары вәкилләре, Россия һәм Төркиянең дәүләт һәм иҗтимагый оешмалары җитәкчеләре катнашачак. Форумның төп максатлары– ике ил арасындагы иҗтимагый мөнәсәбәтләрне үстерү, сәнгать һәм мәдәният, фән һәм мәгариф, тарих, массакүләм мәгълүмат чаралары, туризм, динара диалог, хокук мәсьәләләре һәм башка өлкәләрдә үзара аңлашуны үстерү.
Әлеге форум хезмәттәшлек итүнең яңа юллары һәм ысуллары буенча фикер алышу һәм Россия–Төркия арасындагы хезмәттәшлекне ныгытуга багышлана.