Алабугада “3М Волга” комплексы төзелешенә беренче таш салдылар

2013 елның 13 ноябрендә Татарстан Республикасы Сәнәгать һәм сәүдә министрының беренче урынбасары Руслан Кабиров Татарстан Республикасы Президенты Рөстәм Миңнеханов катнашында “ЗМ” компаниясе заводының нигезенә беренче таш салу тантанасында катнашты. Әлеге тантана “Алабуга” махсус икътисади зонада узды. Бу чарада РФ икътисади үсеш министры урынбасары Олег Савельев, «3М Россия» ЯАҖ предприятиесе генераль директоры Тимоти Аллен Кениг катнашты.
“ЗМ” компаниясенең икенче җитештерү комплексы Россиядә «3М Волга» дип аталачак. Заводны 2014 елда файдалануга тапшыру планлаштырыла. «3М Волга» заводы сәнәгать продукциясен җитештерәчәк. Әлеге продукцияне Россиянең нефть һәм газ компанияләре инде 20 елдан артык нәтиҗәле рәвештә файдалана. Шул исәптән, коррозиягә каршы һәм абразив материаллар, ябыша торган тасмалар, нефтьне һәм газны чыгару процессында файдаланган цементның һәм башка эремәләрнең тыгызлыгын киметү продукциясе җитештереләчәк.
Предприятие продукциясе Россия базарына һәм бәйсез дәүләтләр берлегенә кергән илләргә юнәлдерелгән.

(Елена Бритвина материаллары, Татарстан Республикасы Президенты мәгълүмат хезмәтеннән алынган).