Татарстанның «Очпочдрон» командасы «Кибердром» VII Бөтенроссия конкурсының гранд-финалы җиңүчесе булды
Аңа «Россия вертолетлары» холдингының (Ростех) Казан вертолетлар заводының яшь хезмәткәрләре, П.В.Дементьев исемендәге Казан авиация техник көллияте студентлары, 179 нчы гимназия укучылары керде. Конкурста бөтен Россиядән барлыгы 68 команда катнашты, финалга бары тик 10 гына чыкты.
Конкурс берничә этапта узды. Башта егетләр чемпионатның онлайн-платформасында укыдылар һәм пилотсыз очкычлар белән идарә итү белән шөгыльләнделәр. Алар шулай ук 40 сораудан торган тест үттеләр, аннары, дрон белән идарә итеп, каршылыклар полосасын үттеләр.
Моннан тыш, команда пилотсыз очу аппаратлары һәм җир өсте техник чаралары белән дистанцион идарә итү күнекмәләрен күрсәтте.
Ярымфиналда «Очпочдрон» командасы 2104 балл җыеп, икенче урынны алды. «Авиация эше» этабында катнашучылар пилотсыз очу аппараты һәм дистанцион идарә ителә торган машина өчен код булдырдылар.
Проектның максаты – пилотсыз авиация системалары һәм җир өсте робот техникасы өлкәсендә югары квалификацияле кадрлар әзерләүне тәэмин итү, яшьләрне Россиянең сәнәгать оешмалары, предприятиеләре һәм социаль-икътисадый үсеше мәнфәгатьләрендә перспектив бурычларны хәл итү өчен инновацион технологияләр кертүгә җәлеп итү.
Пилотсыз авиация системалары белән идарә итү һәм Пилотсыз авиация системалары тармагы өчен кадрлар әзерләү буенча спорт чараларын популярлаштыру «Пилотсыз авиация системалары» илкүләм проекты бурычларына туры килә.
Шулай ук искәртеп үтик, команда өстәмә видеороликлар конкурсында I урынны алды.
Өстәп әйтик, агымдагы елның февралендә «Очпочдрон» командасы сәнәгать предприятиеләренең мәктәпләр һәм түгәрәкләр белән үзара хезмәттәшлегенә багышланган республика семинар-киңәшмәсендә Татарстан Премьер-министры Алексей Песошинга һәм Сәнәгать һәм сәүдә министрлыгы башлыгы Олег Коробченкога конкурста җиңәчәген вәгъдә иткән иде! Сүзләрендә тордылар!
Котлыйбыз!