«Цифрлаштыру авиатөзелеш тармагын үстерүдә төп инструментларның берсе булып тора»
Бу хакта Татарстан Премьер-министры урынбасары – сәнәгать һәм сәүдә министры Олег Коробченко 10 марттан 12 мартка кадәр Казанда уза торган «Авиацифра» Бөтенроссия конференциясенең пленар утырышында хәбәр итте. Ул заманча цифрлы технологияләр һәм инновацияләр интеграциясе аша авиация тармагында Россия югары технологияле предприятиеләренең позицияләрен ныгыту максатында үткәрелә. Чара импортны алмаштыру һәм җитештерү процессларын цифрлаштыру программасы кысаларында төп бурычларны хәл итүгә юнәлдерелгән.
Пленар утырыш башланыр алдыннан Татарстан Республикасы Сәнәгать һәм сәүдә министрлыгы башлыгы күргәзмәне карап чыкты. Үз продукциясе турында аңа Россиянең иң эре ИТ-компанияләренең берсе ICL, Астра ДК инфраструктура ПТ җитештерүчесе һәм корпоратив заказчылар өчен ИТ-җиһазлар җитештерүче Арбайт, бизнесның көндәлек бурычларын хәл итү өчен корпоратив ПТ эшләүче VK TECH, IVA Technologies Россия IT-базары лидерларының берсе һәм башкалар сөйләде.
- Казанның тарихи яктан авиация белән турыдан-туры бәйләнеше бар – бездәге эре заводлар – вертолет һәм авиация заводлары. Республикада пилотсызлык нык үскән, радиоэлектроника, авиация өчен җайланмалар җитештерү белән дә шөгыльләнүче предприятиеләр, субподрядчылар күп, – диде Олег Коробченко, катнашучыларны сәламләп. – Бүген ил вертолетларга, самолетларга мохтаҗ. Безгә каршы санкцияләр кертелү нәтиҗәсендә без авиатөзелешебезне үстерә алабыз, һәм цифрлаштыру тармак үсешенең, сыйфатны яхшыртуның, үзкыйммәтне киметүнең, җитештерү күләмнәрен арттыруның төп инструментларының берсе булып тора. Бүген без күргәзмә буйлап үттек һәм предприятиеләребездә цифрлы чишелешләр кертү белән шөгыльләнүче төп компанияләрне карадык. Һәм хәзер, әйткәнемчә, безгә сыйфатны яхшыртырга һәм үзкыйммәтне киметергә кирәк булганда, цифрлаштыру безгә дөнья базарында көндәшлек итәргә мөмкинлек бирәчәк.
Олег Коробченко шулай ук Татарстан Рәисе Рөстәм Миңнехановтан сәламләү җиткерде:
«Илебез авиатөзелеше бүген үсеш һәм камилләшүнең яңа әйләнешен кичерә. Бу яңа чишелешләр эзләүне дә, җитештерүнең нәтиҗәлелеген арттыруны да, продукциянең сыйфатын яхшырту буенча җитди эш алып баруны да таләп итә.
«Авиацифра 2025» конференциясен, бер арттырусыз, авиатөзелеш өлкәсендә ИТ-белгечләр өчен төп вакыйга дип атарга мөмкин. Бу зур һәм мөһим чараның Татарстан башкаласы Казанда узуы аеруча күңелле. Ышанам ки, «Авиацифра 2025» барлык катнашучылар өчен тәҗрибә уртаклашу, авиатөзелешне цифрлаштыру өлкәсендә тенденцияләр һәм инновацияләр турында фикер алышу өчен нәтиҗәле мәйданчык булачак».
Ростех дәүләт корпорациясе һәм аның контурына кергән компанияләр, шул исәптән ОАК та, бүген илебезнең IT-продуктларын актив кертәләр, авиатөзелешнең максатчан ИТ-ландшафтын формалаштыру өчен ышанычлы илебез чишелешләрен эзлиләр. Реаль гамәлгә кертелгән программалар һәм башка эре компанияләрнең тәҗрибәсе өйрәнелә.