Татарстанда бакча участокларына бушлай газ кертеләчәк
27 мартта догазификация чараларын гамәлгә ашыру барышы, проблемалы мәсьәләләр һәм аларны хәл итү юллары турында матбугат конференциясе узды. Татарстан Республикасы сәнәгать һәм сәүдә министры урынбасары Марат Миңнебаев, республиканың хезмәт, халыкны эш белән тәэмин итү һәм социаль яклау министры урынбасары Наталья Бутаева, «Газпром трансгаз Казан» ҖЧҖ генераль директорының җитештерү буенча урынбасары Михаил Фролов спикерлар буларак чыгыш ясады.
Программаны гамәлгә ашыра башлаганнан бирле (2021 елның октябре) Татарстанда газүткәргеч 23 461 участок чикләренә җиткерелгән. 2024 елның мартына гражданнар тарафыннан 35 меңнән артык гариза бирелгән.
Марат Миңнебаев сүзләренчә, башта 2021 елда муниципаль берәмлекләрнең гаризалары нигезендә газлаштырылырга тиешле 18 меңнән артык йорт хуҗалыгы ачыкланган.
«Бүген Казанның Газпром трансгаз компаниясе һәм муниципаль районнар белән берлектә без догазификация потенциалын актуальләштерү буенча эш алып барабыз», – диде Татарстан Республикасы сәнәгать һәм сәүдә министры урынбасары.
Ул шулай ук Россия Президентының 29 февральдә РФ Федераль Җыенына юлламасы барышында коммерцияле булмаган бакчачылык яки яшелчәчелек ширкәтләрен социаль газлаштыру программасына кертү буенча йөкләмә бирелүе турында да искәртте.
«Әлеге йөкләмәне тормышка ашыру кысаларында коммерцияле булмаган бакчачылык яки яшелчәчелек ширкәте чикләре эчендәге газүткәргечне гариза бирүченең җир участогы чикләренә газ белән тоташтыру буенча хезмәт күрсәтү өчен акча алмыйча җиткерү планлаштырыла, әмма бу гражданнарның даими яшәү өчен билгеләнгән торак йортларына гына кагылачак», – дип билгеләп үтте Марат Миңнебаев.