Татарстан Сәнәгать һәм сәүдә министрлыгында ТРда су туризмы өчен инфраструктура, суднолар төзү үсеше турында фикер алыштылар
Татарстан Республикасы Сәнәгать һәм сәүдә министрлыгында Татарстан Республикасы сәнәгать кластерының «Суднолар төзү» тармак комитеты инициативасы белән су туризмын һәм тиешле инфраструктураны үстерү программасын гамәлгә ашыру мөмкинлеге мәсьәләсе буенча эшлекле киңәшмә узды, чарага Татарстан Республикасы Премьер-министры урынбасары – сәнәгать һәм сәүдә министры Олег Коробченко рәислек итте.
Киңәшмәдә Татарстанда эчке һәм читтән килүче туризмын үстерүдә су туризмының әһәмияте турындагы мәсьәләләр күтәрелде. Шулай ук республика министрлыклары һәм ведомстволары вәкилләре, республика муниципаль берәмлекләре җитәкчеләре, шулай ук бизнес вәкилләре керәчәк су туризмын һәм инфраструктурасын үстерү дәүләт программасын әзерләү буенча эшче төркем булдыру тәкъдиме дә хупланды.
Өстәвенә, РФ Хөкүмәтенең 2021 елның 14 октябрендәге карарына ярашлы рәвештә, 2030 елга кадәрге чорга РФдә яхта туризмын үстерү концепциясе расланды.
Концепциянең төп максатлары булып Россиядә диңгез һәм елга объектларында яхта туризмын популярлаштыру һәм үстерү, мариналар (интенсив яхтинг районнары) челтәрен булдыру буенча тәкъдимнәр эшләү һәм яхта туризмының, су спорт төрләренең һәм яр буе пассажир йөрешенең сыйфатын арттыру, уңайлы һәм арзанлы рекреацион мохит булдыру, эчке һәм тышкы туризмны үстерү мөмкинлекләрен киңәйтү һәм арттыру өчен шартлар тудыру тора.
«Россиядә су туризмы актив туризмның мөһим өлешенә әверелә. Бу икътисадның барлык төп тармаклар белән элемтәдә булган мөһим һәм интенсив үсеш алган юнәлешләренең берсе», – дип билгеләп үтте Олег Коробченко. Татарстанда су туризмын яратучыларны җәлеп итү өчен инфраструктураны киңәйтү һәм модернизацияләү таләп ителә. Бездә су туризмын үстерү өчен барлык шартлар да бар: елгалар һәм рекреацион сулыкларның күплеге һәм безнең республиканың зур потенциалы, ул туристлар тарафыннан һәрвакыт таләп ителәчәк мәдәни-тарихи мираска ия.