Татарстанда дөньяда 3D-принтерда бастырылган иң биек биналарның берсе барлыкка киләчәк

2023 елның 1 сентябре, җомга

«Татнефть» компаниясе Мәлбагыш авылында күпфункцияле «Мәллә» комплексы проектын башлап җибәрә. Россиядә ул 3D-басма кулланылган беренче биналарның берсе. Бу ысул архитектура формаларының вариативлыгын арттыра һәм тирән бөгелешле шома формалар алуга ирешергә мөмкинлек бирә.

Комплекс модульле итеп күзаллана, һәр блокның функцияләре үзгәрергә мөмкин. Төзелеш вакытында бу дөньяда иң биек басма биналарның берсе булачак. Проект авторлары дөньяның төрле шәһәрләрендәге иҗтимагый үзәкләрдән илһам алган.

«Мәллә»дә мәдәни үзәк, спорт комплексы, техник, административ һәм коммерция биналары, фельдшер-акушерлык пункты планлаштырылган. Иҗтимагый үзәк бөтен төбәк халкының яңа җәлеп итү ноктасы булачак.