Казан вертолет заводына журналистлар килде

5 сентябрьдә Татарстан Республикасы Сәнәгать һәм сәүдә министрлыгы, "Татмедиа" матбугат һәм массакүләм коммуникацияләр республика агентлыгы эшче һәм инженер һөнәрләренең абруен күтәрү буенча уртак эшчәнлек кысаларында "Казан вертолет заводы"на пресс-тур оештырылды.
Татарстанның машина төзелеше өлкәсендә әйдәп баручыларның берсе булган предприятиегә пресс-турда министр урынбасары Г. Әхмәдиева, "Татмедиа" матбугат һәм массакүләм коммуникацияләр республика агентлыгы җитәкчесе И. Миңнәхмәтов, телеканаллар, республиканың басма матбугат һәм интернет басмалар җитәкчеләре һәм вәкилләре катнашты.
Пресс-турда катнашучыларны генераль директор В. Лигай каршылады. Журналистлар предприятие цехларында булдылар, хезмәт династиясе вәкилләре белән очраштылар, "Сакчыл җитештерү" технологияләрен кертү тәҗрибәсе белән таныштылар.
Матбугат конференциясендә Г. Әхмәдиева пресс-тур өчен "КВЗ" сайлануның очраклы түгеллеген аңлатты. Предприятиедә вертолет техникасын җитештерү арта бара, хезмәт җитештерүчәнлеге үсә. Заводта модернизацияләү һәм техник яктан яңарту буенча масштаблы программалар гамәлгә ашырыла.
“КВЗ" яңа төр вертолет – күп билгеләнешле Ми-38 вертолеты булдыруда һәм "Ансат" вертолетын модернизацияләүдә катнаша. Шулай ук төп продукт – Ми-8/17 вертолетын модернизацияләү эшләре башкарыла, Ми-17В-5 вертолетын этаплап модернизацияләү программасы да кабул ителгән.
Предприятиедә мәгълүмат технологияләре актив кертелә, "Сакчыл җитештерү" технологияләрен кертү нигезендә җитештерү белән идарә итү процессларын яңарту гамәлгә ашырыла. Предприятие җитәкчелеге эшче һөнәрләренең абруен күтәрү, балалар техник иҗатын үстерү, кадрлар әзерләү һәм предприятиегә беркетү мәсьәләләренә зур игътибар бирә. Булачак хезмәткәрләрне мәктәп яшеннән үк тәрбияләү эше дә игътибарга лаек. Моңа 8 нче гимназия белән хезмәттәшлек мисал булып тора.
"КВЗ" "Россия вертолетлары" холдингы, Татарстан Республикасы Сәнәгать һәм сәүдә министрлыгы, "Татмедиа" матбугат һәм массакүләм коммуникацияләр республика агентлыгы ярдәме белән "Эшче һәм инженер белгечлекләре һөнәрләренең абруе" темасына иң яхшы язмага ММЧда конкурс игълан итте.