Парашютчылар һәм кече авиация пилотларының күрсәткеч чыгышлары: «Мин күкне сайлыйм» бәйрәмендә кунакларны ни көтә?
4 августта «Казан» гаилә үзәге янындагы мәйданчыкта «Мин күкне сайлыйм!» дигән авиация бәйрәме узачак, ул илебезнең граждан авиациясенең 100 еллыгына, Россия ДОСААФ ТР Үзәк аэроклубына нигез салынуның 90 еллыгына багышланачак.
Хәрби һәм граждани самолетлары белән традицион авиашоу булмаячак, әмма бәйрәм кунакларын парашютчыларның күрсәткеч чыгышлары һәм Татарстан ДОСААФының уртача зурлыктагы һәм җиңел самолетларының очышлары көтә. Моннан тыш, авиашоу мәйданчыгында балалар һәм яшүсмерләр өчен иң гади самолет модельләрен җыю буенча бушлай мастер-класслар узачак. Монда килүчеләр төрле радиоидарәле модельләр белән таныша алачак.
Авиашоу концерт, Татарстанның авиация сәнәгате алдынгы хезмәткәрләрен бүләкләү һәм һөнәри юнәлеш аллеясы эше белән тулыландырылачак, анда республиканың әйдәп баручы авиация сәнәгате предприятиеләре үз казанышларын күрсәтәчәк.
Шулай ук бу көнне Жуков орденлы Казан югары танк команда училищесы «РФ Кораллы Көчләрендә контракт буенча хәрби хезмәт - Синең карар!» мәгълүмати-агитация акциясен уздырачак.
Шәһәрнең авиация предприятиеләре иҗат коллективлары катнашында концерт программасы да, РФ халык артисты, «Любэ» төркеме лидеры һәм солисты Николай Расторгуев чыгышы, шулай ук бәйрәм салюты чараның якты вакыйгасы булачак.
Чараны ТР Сәнәгать һәм сәүдә министрлыгы оештыра. Бәйрәм 18:00 сәгатьтә башлана, 22:00 сәгатьтә тәмамлана.