Татарстанда двигательләр җитештерү буенча «Соллерс» компаниясе заводы ачылды
Старт Екатеринбургта «Иннопром-2023» халыкара сәнәгать күргәзмәсендә Татарстан стендында онлайн режимда РФ Премьер-министры Михаил Мишустин, ТР Рәисе Рөстәм Миңнеханов, РФ Сәнәгать һәм сәүдә министрлыгы башлыгы Денис Мантуров, ТР сәнәгать һәм сәүдә министры Олег Коробченко, завод җитәкчелеге һәм коллективы катнашында узды.
«Барысына да: Татарстан җитәкчелегенә, сәнәгать һәм сәүдә министрлыгына бу эшне оештырган өчен рәхмәт белдерәсем килә», – дип билгеләп үтте Михаил Мишустини, кирәкле җитештерүне локальләштерү турында сөйләгәндә.
Заводта Евро-6 стандарты буенча 2-2,7 литрлы двигательләр гаиләсе чыгарылачак. Продукция Соллерс җиңел коммерция автомобильләренә, УАЗ внедорожникларына җитештереләчәк, шулай ук линейкага уртача тоннажлы КАМАЗ-Компас автомобильләрен китерү һәм сәнәгатьнең төрле тармаклары ихтыяҗлары өчен двигательләр куллану карала.
«Бу Россия автопромы, суднолар төзү, авыл хуҗалыгы машиналары төзү, энергетика һәм башка тармаклар ихтыяҗлары өчен Россиядә беренче тирәнтен локальләштерелгән кече дизель двигательләре предприятиесе. Предприятие кыска вакыт эчендә – ярты ел да үтмәде – заводны яңадан эшләтеп җибәрә алды. Бу безнең илдә, республикада мобилизацияләнә, яраклаша һәм локализациядә алга таба бара белә торган сәнәгатьнең ачык мисалы. Җитештерүгә инвестицияләр күләме 2 млрд сум тәшкил итте», – дип аңлатма бирде Олег Коробченко.
Проект кысаларында барлык төп технологик операцияләр локальләштереләчәк – кою, сугу, двигательнең база детальләрен механик эшкәртү, җыю һәм контроль сынаулар, шулай ук Россия тәэмин итүчеләрендә поршень төркемен локальләштерү каралган.
РФ Хөкүмәте рәисе 2007 елда Алабуга махсус икътисадый зонасында производствоны эшләтеп җибәрүдә катнашуын искә төшерде. Ул билгеләп үткәнчә, бу елларда МИЗ ышанычлы үсеш күрсәтә.
Исегезгә төшерәбез, «Алабуга» МИЗда «Соллерс» двигательләр заводы 2015 елда «Соллерс» ААҖ һәм «Форд Мотор Компани» уртак предприятиесе кысаларында «Форд» автомобильләре өчен 1,6 литрлы Sigma двигательләре җитештерү өчен оештырылган иде. Завод 2019 елга кадәр «Форд» җиңел автомобильләре өчен двигательләр җитештерде.
Бүгенге көндә заводның җитештерү линияләре 95% автоматлаштырылган. Двигательләр җитештерү куәте елына 50 мең берәмлек тәшкил итә.
Өстәвенә, «ИННОПРОМ» кырында Татарстан Республикасы Сәнәгать һәм сәүдә министрлыгы башлыгы берничә сөйләшү дә үткәрде. Аерым алганда, «Уралвагонзавод-транс» генераль директоры Андрей Абакумов белән очрашты һәм аны ТатПромСтан мәйданнарында җыелган станокны карарга чакырды. Моннан тыш, ТР Рәисе Ульяновск өлкәсе губернаторы Алексей Русских белән очрашты.
«Безнең транспорт белән тәэмин ителешне, сәнәгатьнең якын тармакларын исәпкә алып, сәүдә-икътисадый элемтәләрне үстерү перспективалары яхшы», - дип билгеләп үтте Рөстәм Миңнеханов. Ул соңгы теркәлгән мәгълүматлар буенча төбәкара товар әйләнешенең якынча 7 млрд сум тәшкил итүе турында искәртте.
«Нәтиҗәле кооперациянең яхшы мисалы булып «Соллерс-Алабуга» ҖЧҖ һәм «Автодом» ҖЧҖнең «Соллерс-Атлант» шассисында ашыгыч медицина ярдәме автомобильләре җитештерү проекты тора», – дип ассызыклады ТР Рәисе.
Ульяновск өлкәсе губернаторы үз чиратында ике төбәкнең бизнесын интеграцияләү кирәклеген билгеләп үтте. «Сезнең делегацияне бизнес миссия белән Ульяновск өлкәсендә көтәбез», – диде Алексей Русских.
«ИННОПРОМ-2023» кырларында Татарстан Премьер-министры урынбасары – Татарстан Республикасы сәнәгать һәм сәүдә министры Олег Коробченко шулай ук Цзиси (Кытай) шәһәренең Халык Хөкүмәте делегациясе белән очрашты. Шәһәр кокслы күмер чыгару белән билгеле, биредә машина төзелеше, төзелеш, агач эшкәртү, азык-төлек сәнәгате предприятиеләре урнашкан.
Яклар хезмәттәшлекнең мөмкин булган юнәлешләре турында фикер алыштылар. Моннан тыш, Татарстан Республикасы Сәнәгать һәм сәүдә министрлыгы башлыгы делегацияне сентябрь аенда Казанда узачак «Ростки» Россия-Кытай форумыга чакырды.
Татарстан Республикасы Сәнәгать һәм сәүдә министрлыгы башлыгы белорус «АМКОДОР» ААҖ – холдинг идарәче компаниясе» директорлар советы рәисе Александр Шакутин белән Татарстан предприятиеләре белән алга таба хезмәттәшлек итү турында сөйләшүләр үткәрде.
Ул шулай ук «Тотрыклы җитештерү. Яңарту стратегияләре» стратегик сессиясендә дә катнашты. Сессия спикеры булып Михаил Мишустин чыгыш ясады.
Компанияләр вәкилләре ТР Сәнәгать һәм сәүдә министрлыгы оештырган Татарстан стендында берничә сөйләшү үткәрде. Исегезгә төшерәбез, стендта Татарстанның 40ка якын предприятиесе продукциясе тәкъдим ителгән. Катнашучылар арасында: «Ак Барс» суднолар төзү корпорациясе, Казан вертолет заводы, РариТэк-Холдинг, Промэнерго, Энергоразвитие, КЭР-Холдинг, Kama Tyres һәм башкалар бар. Республика делегациясенә барлыгы 180дән артык хакимият һәм бизнес вәкилләре кергән.
«ИННОПРОМ»ның эш программасы иртәгә дәвам итәчәк. Килешүләргә кул кую һәм берничә B2B очрашуны уздыру көтелә.