Казанда беренче тапкыр «Кытай Сабантуе» узды
25 июньдә Ишкәкле спорт төрләре үзәгендә Кытай көймәләренең «Аждаһа» бәйрәме узды. Татарстанда әлеге чара беренче тапкыр узды һәм аны 15 меңнән артык кеше карады.
«Кытай Сабантуе»нда Кытай Халык Республикасының Казандагы Генераль консулы Сян Бо әфәнде, Иранның Казандагы Генераль консулы Давид Мирзахани, Татарстандагы Роспотребнадзор җитәкчесе Марина Патяшина, Россиянең Татарстандагы тышкы эшләр министры Радик Вахитов һәм Татарстан компанияләре директорлары катнашты.
Тантаналы ачылышта кунакларны Премьер-министр урынбасары – Татарстан Республикасы сәнәгать һәм сәүдә министры Олег Коробченко һәм Кытайның Казандагы Генераль консулы Сян Бо әфәнде сәламләде.
«Кичә Казанда безнең традицион милли бәйрәм – Сабантуй узды. Барысы да белә, бу – сабан бәйрәме, чәчү эшләрен уздырганнан соң кешеләрнең берләшү бәйрәме – алар ял итә алалар, дигән сүз. Ә бүген без кечкенә генә бәйрәм – шундый ук Сабантуй оештырырга булдык, әмма инде кытайча», – диде Олег Коробченко, кунакларны һәм катнашучыларны сәламләп.
Ул шулай ук безнең республикада Кытайның студентлары һәм предприятиеләре күп булуын, әмма республика һәм аның мәдәнияте турында бик аз кеше белүе һәм нәкъ менә шуңа күрә Сян Бо әфәнде белән бергә әлеге бәйрәмне оештырырга карар иткәннәре турында өстәде.
«Татарстанда 2023 ел Милли мәдәниятләр һәм традицияләр елы дип игълан ителде. Республика территориясендә 170тән артык милләт вәкилләре яши, шул исәптән Кытай Халык Республикасыннан да», – дип билгеләп үтте Олег Коробченко.
«Татарстаннан иң зур тәэсирем шунда ки, бу күп милләтле төбәктә барлык төрле милләтләр, этник төркемнәр искиткеч коммуникациягә һәм интеграциягә ирешкән. Минем уйлавымча, «Кытай Сабантуе» яхшы үрнәк, – диде Сян Бо әфәнде. – Аждаһа көймәләре бәйрәме – Кытай мәдәниятенең мөһим өлеше һәм бөтен кешелекнең уртак мәдәни мирасы.»
«Аждаһа» Кытай көймәләре бәйрәме «Татарстан Республикасы байдарка һәм каноэда ишү федерациясе» региональ иҗтимагый оешмасы ярдәме белән узды. Бәйрәмнең төп партнеры булып «Хайер» корпорациясе чыгыш ясады.
Бәйрәм кунаклары «Аждаһа» көймәләрендәге тамаша ярышларын карый, җәядән ату буенча ярышларда катнаша, бәхет өчен кызыл конверт һәм кытай фонарьлары ясый, кытай телен һәм савыктыру буенча Кытай практикаларын өйрәнә һәм башка күп нәрсәләрне өйрәнә алды.
«Аждаһа» көймәләрендәге ярышларда Татарстан предприятиеләренең һәм оешмаларының 20 командасы катнашты. Нәтиҗәләр буенча иң яхшылар:
- 1 урын – Челтәр компаниясе
- 2 урын – Яңа дөнья бизнес-клубы
- 3 урын – Алабуга аккумулятор заводы.
Байдарка һәм каноэда ишү буенча Татарстан Республикасы Кубогына ярышларда Олимпия резервы спорт мәктәбенең 76 тәрбияләнүчесе катнашты. Нәтиҗәләр буенча иң яхшылар:
- 1 урын – Родион Романов
- 2 урын – Рөстәм Артыков
- 3 урын – Никита Левин.