Эре инновация проектлары ничек гамәлгә ашырылачак?

Иннополис, Кама инновацион кластеры һәм инжиниринг үзәкләре турында бүген Татарстан Республикасы Хөкүмәт Йортында узган киңәшмәдә катнашучылар сөйләште. Киңәшмәне Татарстан Республикасы Президенты Рөстәм Миңнеханов үткәрде, анда шулай ук Россия Федерациясе финанслар министры урынбасары Андрей Иванов катнашты.
А.Иванов киңәшмә башында билгеләп үткәнчә, Татарстан федераль үзәк өчен дәүләтнең инновацион сәясәтендә төп регион гына түгел, ә инновацион сәясәт өлкәсендә дәүләт ярдәменең бөтен формалары кулланылган модель-мәйданчык та.
Вице-премьер – Татарстан Республикасы мәгълүматлаштыру һәм элемтә министры Роман Шәйхетдинов Иннополис проектын гамәлгә ашыру турында сөйләде: махсус икътисадый зона үсеше, университетны оештыру һәм шәһәр инфраструктурасын булдыру турында хәбәр итте.
Рөстәм Миңнеханов яңа шәһәрләрне оештыру буенча чит ил тәҗрибәсен, шул исәптән финанслау тәҗрибәсен дә өйрәнергә кирәк, дип белдерде.
"Татнефтехиминвест-холдинг" ААҖ генераль директоры Рафинат Яруллин Кама сәнәгать кластеры проекты турында бәян итте. Булачак кластер территориясендә берничә масштаблы проект – "ТАИФ-НК", "Нижнекамскнефтехим", "ТАНЕКО" һәм башкаларның проектлары гамәлгә ашырыла инде. Кластерда инвестиция проектларының гомуми бәясе 500 млрд сум тәшкил итә, инфраструктура проектларының бәясе - 250 млрд сум. Кама сәнәгать кластерының сәнәгать продукциясе күләмен 2020 нче елга өч мәртәбә арттырырга планлаштырыла.
Россия финанслар министры урынбасарына Кама инновацион кластерының иң мөһим инфраструктура проектларын да күрсәттеләр.
Шулай ук республикада автомобильләр сәнәгатенең комплекслы инжиниринг үзәген булдыру проектын турында да мәгълүмат бирелде. Проект буенча автомобильләрне тикшерү өчен полигон һәм лаборатория төзү һәм җиһазландыру каралган. 136 гектар җирдә урнашачак үзәкнең гомуми бәясе 15,4 млрд сум тәшкил итәчәк, төзелеш 4 ел дәвамында барырга мөмкин.