Татарстан газ-мотор ягулыгы базарын үстерү дәрәҗәсе буенча Россия рейтингын җитәкли
Бу хакта «Газпром газомоторное топливо» ҖЧҖ генераль директоры вазыйфаларын башкаручы Денис Корниенко ТАСС мәгълүмат агентлыгында 2021 елда газ-мотор ягулыгы базарын үстерү дәрәҗәсе буенча Россия төбәкләре рейтингын тәкъдир итүгә багышланган матбугат конференциясендә хәбәр итте. Татарстан рейтингта катнашучы 72 төбәк арасында беренче урынны алган, мөмкин булган 100 баллдан 87,5 балл җыйган.
«Татарстан газ-мотор ягулыгы базарын үстерү буенча безнең активлыкка җавап биргән төбәкләрнең беренчесе булды. Әле алай гынамы, Татарстан 2013 ел башында компания оешкан чакта без барган беренче төбәк иде. Безне төбәк җитәкчесе чакырды һәм ул вакытта республикада күргән әлеге нәтиҗәләргә ирешү буенча төп адымнар билгеләнгән иде, – дип ассызыклады Денис Корниенко, Татарстан Республикасы сәнәгать һәм сәүдә министры урынбасары Марат Миңнебаев катнашында рейтинг нәтиҗәләрен игълан итеп.
Денис Корниенко билгеләп үткәнчә, инфраструктура төзелешеннән һәм транспортны ТРда газга актив күчерүдән тыш, КАМАЗ газ-мотор транспорты – йөк автомобильләре һәм автобуслар чыгару буенча лидер булып тора. «Төбәк тулы куәтенә газ-мотор ягулыгы базарын үстерүгә кушылды. Челтәр үсеше дә туктамый», – дип өстәде спикер.
Татарстан Республикасы Сәнәгать һәм сәүдә министрлыгы мәгълүматларына караганда, республикада гамәлдәге 37 автомобильгә газ салучы компрессор станциясе (АГНКС) урнашкан. Республикада төзелгән АГНКС челтәренең гомуми проект җитештерүчәнлеге елына 300 млн куб.м тәшкил итә.
2021 елда Татарстанда физик затлар һәм юридик затлар сыеклатылган газда 551 берәмлек төрле техника сатып алган, 1736 транспорт чарасын үзгәртеп җиһазлаган. 2010-2022 елларда барлыгы 12 меңләп транспорт берәмлеге яңадан җиһазландырылган һәм сатып алынган.
2022 елда Татарстанда 8 АГНКС төзү проектлары гамәлгә ашырыла. Бу елга фаразлар буенча республикада транспорт чараларын сыеклатылган табигый газга күчерү һәм 2000 берәмлектән ким булмаган күләмдә газ-мотор техникасы сатып алу планлаштырыла.
Исегезгә төшерәбез, 2013 елда Россия Федерациясе Хөкүмәте газ-мотор ягулыгы базарын үстерү буенча планлы эшкә кереште. Кайбер тиешле йөкләмәләр һәм күрсәтмәләр чыгарылды.
Шул ук елны, 27 июньдә, Татарстан Республикасы Хөкүмәте белән «Газпром газомоторное топливо» компаниясе арасында хезмәттәшлек турында килешү имзаланды.
Әлеге килешү кысаларында республикада «2013-2023 елларга газ-мотор ягулыгы базарын үстерү» дәүләт программасы расланды һәм уңышлы гына тормышка ашырыла.
Программаның максаты – традицион ягулык төрләрендә, табигый газда эшләүче транспорт һәм җиһазларда эшләүче төрле транспортны һәм җиһазларны этаплап алыштыру, транспорт һәм финанс чыгымнарын киметү һәм транспортның әйләнә-тирә мохиткә тискәре йогынтысын киметү.