Рөстәм Миңнеханов: Татарстан Мьянма белән хезмәттәшлекне ныгытуга зур игътибар бирә
Татарстан Республикасы Президенты Рөстәм Миңнеханов Мьянма Союзы Республикасы Дәүләт Административ советы рәисе, Премьер-министры, Кораллы көчләре баш командующие Мин Аунг Хлайн әфәнде белән очрашты. Очрашу Казан Кремлендә Мин Аунг Хлайнның Казанга шәхси визиты кысаларында узды.
«Сезне кабат Татарстанда сәламләвемә шатмын. Быел апрель аенда Мьянмага визитымны бик теләп искә алам. Сезнең гүзәл илегезне күрү, аның ничек яшәвен һәм үсүен күрү, Мьянма халкының рухын һәм мәдәниятен тою бик кызыклы булды», - диде Рөстәм Миңнеханов сәламләү сүзендә.
Ул Мьянма Премьер-министрына Татарстан белән хезмәттәшлекне үстерүгә игътибары өчен рәхмәт белдерде. «Мьянма – Россия Федерациясенең Азия-Тын океан төбәгендә һәм халыкара аренада ышанычлы партнеры. Безнең илләр арасында элемтәләр күпьеллык тарихка ия – киләсе елда без Россия-Мьянма мөнәсәбәтләре урнашуга 75 ел тулуны билгеләп үтәчәкбез», - диде ТР Президенты.
Рөстәм Миңнеханов ассызыклаганча, Татарстан Мьянма белән партнерлык элемтәләрен ныгытуга зур игътибар бирә. Моңа эшлекле даирәләрнең үзара визитлары, Татарстанның алдынгы предприятиеләре линиясе буенча элемтәләрне киңәйтү ярдәм итә. Моннан тыш, Татарстан Республикасы Президенты мәдәният, фән, мәгариф, спорт һәм туризм өлкәсендә хезмәттәшлек итү перспективаларын билгеләде. Шул ук вакытта кайбер мәсьәләләрне, шул исәптән логистикага бәйле мәсьәләләрне дә хәл итәргә кирәк.
«Без ачык һәм алга таба да элемтәләрне үстерүгә әзер. Ике як өчен дә файдалы элемтәләрне җайга сала алырлык юнәлешләр күп», - дип өстәде ТР Президенты.
Мин Аунг Хлайн, үз чиратында, Мьянма белән Татарстан арасындагы хезмәттәшлек перспективаларын югары бәяләде. «Минем фикеремчә, безнең барлык очрашулар һәм сөйләшүләр, чыннан да, бик нәтиҗәле, һәм безнең эштә уңай нәтиҗәләр бирә», - дип ассызыклады ул.
Мьянма Премьер-министры билгеләгәнчә, Татарстан бүген актив үсә, төбәктә машина төзелеше, нефть химиясе, агросәнәгать комплексы өлкәсендә эре производстволар тупланган. ИТ-өлкәгә җитди игътибар бирелә. «Без киләчәктә дә мөнәсәбәтләрне үстерергә телибез. Моның өчен барлык мөмкинлекләрне дә кулланырга кирәк», - дип өстәде Мин Аунг Хайн.