Казанның «Терминал» җитештерү берләшмәсе генераль директоры Мансур Рәимов вафат

Татарстан Республикасы зур югалту кичерә. Бүген иртән 77 яшендә Россиянең Атказанган машина төзүчесе – Казанның «Терминал» җитештерү берләшмәсе генераль директоры Мансур Рәимов вафат булган.

Мансур Афият улы Рәимов 1946 елның 14 февралендә Татарстан АССРның Чүпрәле районы Түбән Каракитә авылында туган. Казан елга техникумын һәм Казан химия-технология институтын тәмамлаган.

Мансур Рәимов Казанның «Терминал» җитештерү берләшмәсендә 1969 елдан гади мастер булып эшли башлый.

Эшлекле сыйфатлары, югары җаваплылык дәрәҗәсе һәм барлык проблемалы мәсьәләләрне оператив рәвештә хәл итә белүе аркасында аны генераль директор итеп билгелиләр.

Мансур Афият улы үз һөнәрен чын күңелдән яратучы һәм аңа тугрылыклы кеше үрнәге булды һәм шулай булып калачак та. Эшнең барлык участокларында ул талант, кешеләрне берләштерә белү, ышаныч, хөрмәт атмосферасы тудыру һәм шуның белән бергә югары таләпчәнлек күрсәтә. Ул принципиаль һәм энергияле, хезмәт коллективының тырышлыгын предприятие алдында торган планнарны һәм бурычларны уңышлы үтәүгә юнәлдерүче җитәкче булды. Кешеләргә, аларның ихтыяҗларына игътибарлы булуы, эшчәнлеге белән республикада хөрмәт һәм абруй казанды.

Хезмәттәге уңышлары өчен Мансур Рәимов Халыклар дуслыгы, «Мактау билгесе» орденнары белән бүләкләнгән.

Мансур Афият улы турындагы якты истәлек безнең йөрәкләрдә мәңгегә сакланачак.

О.В.Коробченко