Әлмәттә һөнәри осталык конкурсында җиңүчеләрне игълан иттеләр
«Татарстанның киләчәк көллияте» укыту-лаборатория комплексында 2022 елда машина төзелеше комплексы предприятиеләренең һәм оешмаларының яшь белгечләре арасында һөнәри осталык буенча бөтенроссия конкурсын ябу тантанасы узды.
26 майда старт алган һөнәри осталык конкурсы иң мөһим һәм якты корпоратив вакыйгаларның берсе булып тора. 2 көн дәвамында Һөнәре буенча иң яхшысы исеме өчен киеренке көрәш барды. Балалар үзләренең осталыкларын, белемнәрен һәм үҗәтлекләрен күрсәттеләр.
«Менә дигән конкурс. Башка төбәкләрдән дә катнашучыларның булуы куандыра. Бик яхшы оештырылган. Бу эштә шәһәр җитәкчелеге дә, «Алнас» заводы да зур өлеш кертте. Безнең республикада икътисад күп секторлы. Нефть химиясе, нефть чыгару, машина төзелеше үсеш алган. Әлбәттә, профессиональ кадрлардан башка, сездән башка, хөрмәтле коллегалар, безнең сәнәгатьнең киләчәк үсеше турында сөйләргә ярамый. Барлык җиңүчеләрне котлыйм, калганнарга киләсе елда җиңүләр телим. Иҗади идеяләр һәм карьера үсеше сезгә», – дип теләде Татарстан Республикасы сәнәгать һәм сәүдә министры урынбасары Иван Колчин.
«РИМЕРА-АЛНАС» җаваплылыгы чикләнгән җәмгыятенең җитештерү буенча директоры Николай Миронов һөнәри осталык конкурсының әһәмиятен билгеләп үтте: «Мин әлеге конкурсның сезнең өчен алга таба үсеш ноктасы булуын телим. Җитештерүче буларак минем өчен яңа йолдызчыклар барлыкка килүе куанычлы. Квалификация арта, кешеләр алга таба карьера баскычы буенча үсә. Һәм бу сүзләр генә түгел. Узган конкурс нәтиҗәләре буенча ачык мисаллар бар. Икенче урынны алган мастер белгеч буларак үсә башлады һәм «Алнас» заводының идарә итү линейкасында алдынгы позицияләрне били. Һәм сезгә дә, бу ноктаның кузгалыш урыны булуын телим».
Чараның кульминацион мизгеле бүләкләү тантанасы булды. Көн геройлары – һөнәре буенча иң яхшылары, 2022 елда һөнәри осталык конкурсында «Иң яхшы токарь», «Электр җиһазларын ремонтлау һәм хезмәт күрсәтү буенча иң яхшы электромонтер», «Программа белән идарә итү станокларының иң яхшы операторы», «Иң яхшы инженер-технолог», «Иң яхшы мастер», «Яшьләр белән эшләү буенча иң яхшы белгеч», «Иң яхшы эретеп ябыштыручы» номинацияләре буенча җиңүчеләр билгеләнде.
Әлмәт муниципаль районы матбугат хезмәте материаллары буенча