ЯҢАЛЫКЛАР
Татарстан Республикасы Премьер-министры урынбасары–Татарстан Республикасы сәнәгать һәм сәүдә министры Альберт Кәримов Татарстан Республикасы делегациясе составында ике көнлек визит кысаларында Үзбәкстан Республикасы энергетика министры Алишер Солтанов белән очрашты.
Очрашу барышында яклар уртак проектларны һәм хезмәттәшлекнең күздә тотылган юнәлешләрен гамәлгә ашыруны дәвам иттерү турында килештеләр.
Исегезгә төшерәбез, шушы көннәрдә Үзбәкстан белән Татарстан төбәкләре арасында эшлекле форум узды. Чарада Татарстан Республикасы Премьер-министры урынбасары, Үзбәкстанның инвестицияләр һәм тышкы сәүдә министры Сардор Умурзаков, Татарстан Республикасы Президенты Рөстәм Миңнеханов, Россия Федерациясенең Үзбәкстан Республикасындагы Гадәттән тыш һәм Тулы вәкаләтле илчесе Олег Мальгинов һәм Ташкент өлкәсе хәкиме Даврон Хидоятов, Татарстан Республикасы Премьер-министры урынбасары–Татарстан Республикасы сәнәгать һәм сәүдә министры Альберт Кәримов катнашты.
Форум эшендә Татарстан Республикасы һәм Үзбәкстан Республикасы эшлекле бергәлекләренең барлыгы 100 артык вәкиле катнашты.
Теләге булган һәркем үз соравын «Татэнергосбыт» АҖ җитәкчелегенә юллый һәм аңа җавап алырга мөмкин. Компания июнь аенда «Бизнес Online» электрон газетасы мәйданчыгында үз клиентлары белән аралашуның яңа форматын эшләтеп җибәргән.
Баннер төймәсенә басып, сораулар, теләкләр юлларга мөмкин. Татарстанлылар сорауларга җавапларны электрон почта яки компаниянең рәсми сайтында һәм «Инстаграм»да алачак.
Шулай ук компаниянең бушлай контакт-үзәге дә эшли: 8 800 200-25-26.
2020 ел нәтиҗәләре буенча Татарстан Республикасы төп күрсәткечләрне уздырып үтәгән. «Хезмәт җитештерүчәнлеге» илкүләм проекты кысаларында республиканың 119 предприятиесе үз процессларын камилләштерә (2024 елга кадәр максатчан күрсәткеч – 249 предприятиене җәлеп итү). Сакчыл җитештерү нигезләренә планлаштырылганнан 1,5 тапкырга күбрәк кеше укытылган.
Хакимиятнең җаваплы органнары һәм хезмәт җитештерүчәнлеге өлкәсендә төбәк компетенцияләр үзәге эшчәнлеге нәтиҗәсендә Татарстан Республикасы Түбән Новгородта булып узган «Җитештерүчәнлек 360» III Федераль форумы кысаларында «Иң актив төбәк» номинациясендә бүләкләнгән.
«Җитештерүчәнлек 360» форумы, гадәттәгечә, сакчыл җитештерү өлкәсендә тәҗрибә уртаклашу һәм хезмәт җитештерүчәнлеген арттыруның иң яхшы тәҗрибәләрен җәелдерүдә Россиядә төп мәйданчык булып тора. Форум 2021 елның 15-16 июнендә Түбән Новгород шәһәрендә узган, ул Россия дәүләт хакимияте органнары, иҗтимагый берләшмәләр, социаль өлкә оешмалары, сакчыл җитештерү принципларына нигезләнгән җитештерү системаларын төзү буенча Россия предприятиеләре, шулай ук «Хезмәт җитештерүчәнлеге» илкүләм проектында катнашучы предприятиеләр вәкилләрен берләштергән.
Татарстан Республикасы предприятиеләрне «Хезмәт җитештерүчәнлеге» илкүләм проектына җәлеп итүдә лидерларның берсе булып тора, әле 2017 елда ук, предприятиеләргә үз җитештерүчәнлеген арттырырга ярдәм итүче сынау төбәкләре арасына керде.
2020 ел нәтиҗәләре буенча Татарстан Республикасы төп күрсәткечләрне уздырып үтәгән. «Хезмәт җитештерүчәнлеге» илкүләм проекты кысаларында республиканың 119 предприятиесе үз процессларын камилләштерә (2024 елга кадәр максатчан күрсәткеч – 249 предприятиене җәлеп итү). Сакчыл җитештерү нигезләренә планлаштырылганнан 1,5 тапкырга күбрәк кеше укытылган.
Хезмәт җитештерүчәнлеген арттыру «Стратегия-2030» билгеләгән максатка ирешүнең төп резервы булып тора, – дип билгеләп үтте ТР Премьер-министры урынбасары – ТР сәнәгать һәм сәүдә министры Альберт Кәримов. – Нәкъ менә югары хезмәт җитештерүчәнлеге безнең икътисадның конкуренциягә сәләтлелегенең төп күрсәткече булып тора. Бу бурыч Россия Президенты Указы белән дәүләтнең өстенлекле дәрәҗәсенә чыгарылды».
Исегезгә төшерәбез, 2021 елның гыйнварында Татарстан Республикасының төбәк компетенцияләр үзәге «Хезмәт җитештерүчәнлеге өлкәсендә федераль компетенцияләр үзәге» АКО сертификациясен илдә беренчеләрдән булып уңышлы узды.
Бүген «Татарстан-Үзбәкстан» эш форумы кысаларында «УзЭкспоЦентр» Милли күргәзмә комплексы мәйданчыгында Татарстанның 13 сәнәгать предприятиесе Made in Tatarstan бренды белән үз продукцияләрен тәкъдим итте, алар: «Казан вертолет заводы» АҖ, «ЕлАЗ ҖБ» АҖ, «ТЭМПО» ХК, «Химград» АҖ, «Эйдос-Медицина» ҖЧҖ һәм башкалар.
Күргәзмәне Татарстан Республикасы Президенты Рөстәм Миңнеханов, Үзбәкстан Премьер-министры урынбасары, инвестицияләр һәм тышкы сәүдә министры Сардор Умурзаков, Татарстан Республикасы Премьер-министры урынбасары–Татарстан Республикасы сәнәгать һәм сәүдә министры Альберт Кәримов һәм башкалар карады.
Исегезгә төшерәбез, Татарстан Республикасы Президенты Рөстәм Миңнеханов җитәкчелегендәге Татарстан Республикасы делегациясе ике көнлек визит белән Үзбәкстан Республикасына килде.
Татарстан делегациясе визиты барышында Үзбәкстан Республикасы җитәкчелеге белән берничә очрашу узачак, анда республикалар арасында төрле өлкәләрдә үзара файдалы хезмәттәшлек торышы һәм перспективалары турында фикер алышыначак, Татарстан Республикасының сәнәгать потенциалы күргәзмәсе, Татарстан-Үзбәкстан бизнес-форумы узачак, шулай ук Татарстан Республикасы Президенты Рөстәм Миңнеханов җирле татар иҗтимагый оешмалары вәкилләре белән очрашачак.
Бүген Татарстан Республикасы Президенты Рөстәм Миңнеханов Ташкентка эш сәфәре кысаларында Үзбәкстан Республикасы Премьер-министры урынбасары, инвестицияләр һәм тышкы сәүдә министры Сәрдәр Умурзаков белән очрашты. Очрашуда шулай ук Татарстан Республикасы Премьер-министры урынбасары–Татарстан Республикасы сәнәгать һәм сәүдә министры Алберт Кәримов та катнашты.
Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов Татарстан Республикасы Президенты Рөстәм Миңнеханов җитәкчелегендәге Татарстан Республикасы делегациясе составында Үзбәкстан Республикасына эш визиты белән килде.
Ике көнлек сәфәр кысаларында Татарстан Республикасы белән Үзбәкстан Республикасы арасындагы хезмәттәшлекне үстерүгә бәйле түгәрәк өстәл утырышы узды, анда сәламләү сүзе белән Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов, Үзбәкстан Республикасының торак-коммуналь хуҗалык министры Шерзод Хидоятов, Үзбәкстан Республикасының инвестицияләр һәм тышкы сәүдә министры урынбасары Хуррам Тешабаев, шулай ук Татарстанның сәнәгать предприятиеләре вәкилләре чыгыш ясады.
Чара кысаларында сәүдә-икътисад өлкәсендә хезмәттәшлек итүнең актуаль һәм перспектив юнәлешләренә багышланган мәсьәләләр, аерым алганда, уртак проектлар турында фикер алыштылар.
Альберт Кәримов билгеләп үткәнчә, Татарстан делегациясе составында сәнәгатьнең төрле тармакларындагы 25 сәнәгать предприятиесе вәкилләре катнаша. «Без Президент Р.Н.Миңнеханов җитәкчелегендәге Татарстан делегациясенең визиты үзара файдалы хезмәттәшлекне киңәйтү өчен яңа импульс булыр дип өметләнәбез», – диде Альберт Кәримов.
Россия Федерациясе Сәнәгать һәм сәүдә министрлыгы ел саен үткәрелә торган «Торговля России» конкурсын уздыра, аның нәтиҗәләре буенча төрле сәүдә форматлары тарафыннан гамәлгә ашырыла торган иң яхшы чишелешләр һәм идеяләр сайлап алыначак.
«Торговля России» Бөтенроссия конкурсы беренче тапкыр 2018 елда узды. Аның төп идеясе – Россиянең ваклап сатудагы уңай тәҗрибәсен хуплау һәм аның үсешенә этәргеч бирү.
Конкурс үткәрүнең беренче елында илнең барлык почмакларыннан катнашу өчен 600 артык гариза бирелгән, икенче елда алар саны инде 800 артык булган, узган ел 900 якын гариза бирелгән.
2021 елда җиңүчеләрне бүләкләү тантанасы октябрь аенда «Ритейл атнасы» бизнес һәм хакимият форумының көзге өлеше кысаларында узачак.
Конкурс түбәндәге номинацияләр буенча үткәрелә:
· «Иң яхшы сәүдә шәһәре»
· «Иң яхшы сәүдә урамы»
· «Иң яхшы стационар булмаган сәүдә объекты»
· «Иң яхшы ярминкә»
· «Иң яхшы ваклап сату базары»
· «Иң яхшы мобиль сәүдә объекты»
· «Иң яхшы кибет»
· «Иң яхшы фаст-фуд объекты»
· «Иң яхшы сәүдә фестивале»
· «Иң яхшы күпләп сатучы азык-төлек базары»
· «Җирле товар җитештерүчеләрнең иң яхшы фирма челтәре»
Конкурста түбәндәге оешмалар катнаша ала: сәүдә тармагына кураторлык итүче башкарма хакимият органнары, муниципаль берәмлекләрнең администрацияләре һәм сәүдә эшчәнлеген башкаручы хуҗалык субъектлары.
Конкурста катнашу өчен катнашучыларга торговляроссии.рф сайтында анкета тутырырга киңәш ителә.
Конкурсның Оештыру комитеты, тел.+7 495 924 02 80, tr@russiant.org
«Ремонтно-механический завод – Нижнекамскнефтехим» предприятиесе сыешлы җылылык алмашу җиһазларын эшләп чыгара һәм ремонтлый. Күптән түгел предприятиедә «Хезмәт җитештерүчәнлеге» илкүләм проектында катнашуның беренче нәтиҗәләрен ясаганнар. Ул Федераль компетенцияләр үзәге экспертлары ярдәме белән гамәлгә ашырылган. Ярты ел эчендә хезмәткәрләрнең эш нәтиҗәлелеге 50%ка арткан.
ФКҮ проекты җитәкчесе Роман Батрасов сөйләгәнчә, җитештерү мәйданчыгында каучук – винтлы тапшыру валын бүлеп чыгару киптерү машинасы детальләрен әзерләү процессы оптимальләштерелгән.
«Сынау агымы – җыелган вал. Ул валның үзен, втулка, калып, шпонкалар әзерләү һәм ахырдан әзер эшләнмәләрне җыюны үз эченә ала. Агымда эшләп чыгару күләме 50%ка арткан, ә җитештерү процессының вакыты 33%ка – 120 көнгә кадәр кимегән. Параллель рәвештә винтлы тапшыргыч втулкалары – валның төп детальләре буенча тәмамланмаган җитештерү күләме дә кимегән. Элек җитештерүдә бер үк вакытта валларга 42 втулка булса, хәзер 5 тапкыр азрак – 8 данә генә. Әлбәттә, бу күп вакытны янга калдыра, хезмәткәрләр эшчәнлегенең нәтиҗәлелеген арттыра һәм файдалы мәйданнарны бушата», – дип билгеләп үтте Роман Батрасов.
Җитештерү процессы озакка сузыла торган булган, мәсәлән, винтлы тапшыргыч втулкаларының зур партияләрен көйләп җибәргәндә, бу исә эшчәнлекнең тик торуына, көтү һәм җитештерү срокларын үти алмауга китерә торган булган. Проектны гамәлгә ашыру барышында партиянең минималь күләме 6 данәгә кадәр кимегән. Моннан тыш, элек, ватылу сәбәпле, лимитлаштыручы җиһазлар атнага 4 сәгатькә кадәр эшләмичә тора торган булган. Хәзер ватылып туктау очраклары нульгә кадәр кимегән.
«ФКҮ экспертларының квалификацияле эше нәтиҗәсендә сынау проекты кысаларында хезмәт җитештерүчәнлеген арттыру буенча без ярты елга дип билгеләгән төп бурычлар һәм чаралар үтәлде, – ди «Ремонтно-механический завод-Нижнекамскнефтехим» ҖЧҖ директоры Илдар Шәрипов. – Бу вакыт эчендә 20дән артык кеше сакчыл җитештерү нигезләренә өйрәтелде. Моннан тыш, бездә үзебезнең эчке ике тренерыбыз әзерләнде һәм алар инде үз көчләре белән заводның 50дән артык хезмәткәрен укытты».
Предприятие директоры билгеләп үткәнчә, илкүләм проект тәҗрибәсе производствоның башка участокларына да җәелдереләчәк. Шул исәптән су белән тәэмин итү бүлегендә, конструкторлык-технология бүлегендә, складта һәм башка цехларда да эшнең нәтиҗәлелеген арттырачаклар.
РФ Хөкүмәте илнең социаль-икътисадый үсешенең яңа стратегиясен эшләүгә керешкән. Ул Владимир Путинның «2030 елга кадәрге чорга Россия Федерациясен үстерүнең илкүләм максатлары турында»гы указында куелган бурычларны хәл итү юлларын билгеләргә тиеш. Бу эш кысаларында илкүләм проектларга, шул исәптән «Хезмәт җитештерүчәнлеге» илкүләм проектына да, төзәтмәләр кертелгән. 2021 елда үз көченә кергән яңалыклар һәм планлаштырылган үзгәрешләр турында «Хезмәт җитештерүчәнлеге» илкүләм проектының Иҗтимагый-эксперт советы рәисе һәм «Профстажировка 2.0» ГХФ проекты җитәкчесе Илья Семин сөйләде.
Илья Николаевич, илкүләм проектны гамәлгә ашыру барышын ничек бәялисез?
Илья Семин: Узган ел максатчан күрсәткечләрне үтәп тәмамланды. Моннан тыш, 2020 ел нәтиҗәләре буенча «Хезмәт җитештерүчәнлеге» илкүләм проекты федераль бюджет чыгымнарын үзләштерүнең иң югары күрсәткечләре булган илкүләм проектларның беренче бишлегенә керде – 98,7%. Хәзер анда 68 төбәктән 2500 артык компания катнаша. Без проектның югары әйләнеш алуын күрәбез. Илкүләм проект кысаларында компанияләргә күрсәтелә торган хезмәтләргә ихтыяҗ тәкъдимне 1,5 тапкырга диярлек арттырып җибәрә. Бу бизнесның үз нәтиҗәлелеген арттырырга омтылуы турында сөйли. Кайбер компанияләр – базар лидерлары булу, икенчеләре, бигрәк тә кризис шартларында, исән калу мөмкинлеген ала.
Сез илкүләм проектта катнашучы предприятиеләрдә еш буласыз. Аны гамәлгә ашыруга гади хезмәткәрләрнең карашы нинди?
Илья Семин: Илкүләм проект гамәлгә ашырылган ике елдан артык вакыт эчендә мин анда катнашучы 70тән артык предприятиедә йөреп чыктым. Аларның һәркайсында без хезмәткәрләр арасында сораштырулар уздырдык. Аларның яртысыннан артыгы, 8дән 10 баллга кадәр бәя биреп, ирешелгән нәтиҗәләргә югары бәя бирде. ГХФ экспертлары, илкүләм проект чаралары хезмәт җитештерүчәнлеген арттыруга ярдәм итә, дип билгеләп үтте. Мәсәлән, 2019 елда илкүләм проектта катнашучы 56 предприятиедә уза торган процесслар вакыты уртача 44%ка кимегән, төгәлләнмәгән җитештерү күләме дә якынча шул кадәр кимегән, эшләп чыгару күрсәткече 159%ка арткан. Илкүләм проект эшендә катнашудан предприятиеләрнең канәгать калу дәрәҗәсе кебек мөһим күрсәткеч 92,6% тәшкил иткән.
Россия предприятиеләре өчен беренче чиратта кайсы үзгәрешләр кызыклы булачак?
Илья Семин: Аерым предприятиеләргә адреслы ярдәм күрсәтү срокларын 12 айга кадәр арттыруны аерча мөһим үзгәреш булыр, дип уйлыйм. Мисал өчен, Ставрополь краенда парфюмерия һәм көнкүреш продукциясе җитештерүче «Арнест» предприятиесе бар. Анда заманча җиһазланыш булуга карамастан, Федераль компетенцияләр үзәге экспертлары 6 ай эчендә шактый нәтиҗәләргә ирешә алды: аэрозольләр өчен клапан ясау процессы 5 тапкыр диярлек, төгәлләнеп җитми торган җитештерү күләме 2,5 тапкырга кимегән, эшләп чыгару күләме бер хезмәткәргә 20%ка арткан.
Ярдәм вакытын арттыру сакчыл җитештерү белгечләренә җитештерү процессларына тирәнрәк чумарга, компания спецификасын исәпкә алырга, күбрәк югалтуларны ачыкларга ярдәм итәчәк. Бу продукция бәясенә йогынты ясый торган факторлар турында төгәлрәк күзаллау бирәчәк. Димәк, аны киметү өчен тагын да нәтиҗәлерәк чаралар эшләү мөмкинлеге барлыкка киләчәк.
Киңәйтелгән ярдәм күрсәтү өчен компанияләр конкурс нигезендә сайлап алыначак, шул ук вакытта өч ел дәвамында хезмәт җитештерүчәнлеген ел саен 5-10% кадәр арттыру буенча максатчан күрсәткечләр дә артачак. Үз тәҗрибәмнән чыгып шуны әйтә алам: әгәр компания үзгәрешләргә әзер икән – бу күрсәткечләр ирешермәслек түгел һәм алга таба предприятиене үстерү өчен мөмкинлек булачак.
POZIS командасы «Тормыш циклы белән идарә итү» компетенциясендә «Ростех» дәүләт корпорациясенең «Ростех - Skills - 2021» стандартларында һөнәри осталык буенча сайлап алу чемпионатында иң яхшы өчлеккә эләккән. Ярышлар Мәскәүдә көндезге форматта узган.
Яшь инженер-конструкторлар, инженер-технологлар, икътисадчы һәм гуманитар юнәлешләр буенча экспертлар кергән командага эре мөгезле терлекләр тормышын һәм сәламәтлеген тәэмин итә торган модульле ферма эшләргә кирәк булган. Өстәвенә, бөтен процесс тулысынча автономия режимында узарга тиеш булган.
Компания белгечләре биремне бик шәп үтәгән, чикләнгән ресурслар шартларында проектлаганда югары һөнәри осталыкләрен күрсәтә алганнар. Проект экспертлар тарафыннан дизайны һәм куелган бурычны хәл итүдә оригиналь алымы өчен югары бәя алган.
Корпоратив сайлап алу ярышларында лаеклы чыгыш ясау POZISның яшь белгечләренә көзен Екатеринбургта узачак WorldSkills Hi-tech-2021 чемпионаты финалында катнашу өчен Ростех командасы составына керү мөмкинлеген биргән. Бу – илебездәге эре корпорацияләр һәм холдингларның яшь белгечләре арасында һөнәри осталык буенча Россиядә иң масштаблы ярышлар.