ЯҢАЛЫКЛАР
Бүген Яшел Үзәндә "Хезмәт җитештерүчәнлеге һәм халыкны эш белән тәэмин итүгә ярдәм итү" илкүләм проектының Россия Президенты Владимир Путин тарафыннан билгеләнгән бурычларын тормышка ашыру мәсьәләләренә багышланган семинар узды. Чара Горький исемендәге Мәдәният үзәгендә узды. Чараны оештыручылар – Татарстан Республикасы Сәнәгать һәм сәүдә министрлыгы, Татарстан Республикасы предприятиеләре һәм сәнәгатьчеләре ассоциациясе, шулай ук Төбәк компетенцияләр үзәге.
Чарада икътисадның чимал булмаган тармаклары – эшкәртүче производство, төзелеш, авыл хуҗалыгы, транспорт һәм башка 90 артык предприятие вәкилләре катнашты.
Чарада Татарстан Республикасы Премьер-министры урынбасары –Татарстан Республикасы сәнәгать һәм сәүдә министры Альберт Кәримов та катнашты: «Татарстан Республикасы Хөкүмәте һәм Президенты ягыннан производствода хезмәт җитештерүчәнлеген арттыру темасына аерым игътибар бирелә. Хезмәт җитештерүчәнлеге икътисад үсеше һәм аның конкуренциягә сәләтен арттыру резервларының берсе булып тора. Татарстан глобаль конкуренциягә сәләтле төбәк булырга тиеш – нәкъ менә шундый бурычлар куелган безнең алда".
Очрашуның модераторы ТР ПСА Президенты Александр Лаврентьев булды, ул билгеләп узганча: "Предприятиеләрнең җитештерүчәнлеген арттыру буенча илкүләм проектта катнашуы аларга иң прогрессив һәм нәтиҗәле дөньякүләм методикаларны гамәлгә кертергә, шулай ук үсеш өчен Сәнәгатьне үстерү фондыннан финанслауда катнаша алу мөмкинлеген бирәчәк".
Катнашучылар алдында шулай ук "Татарстан Республикасы Министрлар Кабинеты каршындагы Энергияне сак тоту технологияләре үзәге" ДАУ, Татарстан Республикасы Хезмәт, халыкны эш белән тәэмин итү һәм социаль яклау министрлыгы, шулай ук республиканың сәнәгать предприятиеләре – "А.М.Горький исемендәге Яшел Үзән заводы" АҖ, "КВАРТ" АҖ, "КМПО" АҖ һәм "Казан электроприбор заводы" ААҖ җитәкчелеге чыгыш ясады.
Аларның докладларының төп темалары әлеге илкүләм проектта катнашучы предприятиеләр өчен каралган дәүләт ярдәме мөмкинлекләре һәм чаралары, шулай ук хезмәт җитештерүчәнлеген арттыру буенча эшләрне гамәлгә ашыру буенча үз предприятиеләре тәҗрибәсе булды.
"Горький исемендәге Яшел Үзән заводы" АҖ генераль директоры Александр Карпов үз чыгышында болай диде: "Кешеләр җәлеп ителә һәм инициативалы була башлады, заводта рационализаторлык буенча эш алып барыла, ә методикаларны куллануның икътисадый нәтиҗәсе мине чын-чынлап гаҗәпләндерде".
"КВАРТ" АҖ баш инженеры Рәшидә Хөсәенова: "Без Сакчыл җитештерү инструментларын кертү тәҗрибәсен тиражларга планлаштырабыз, чөнки икътисадый нәтиҗәне тойдык һәм хезмәт җитештерүчәнлеген арттыру буенча методикаларны гамәлгә кертүне предприятиенең барлык участокларында да, хәтта административ участокларында да файдалы дип саныйбыз".
"Бүген семинарда предприятиеләрдә хезмәт җитештерүчәнлеген арттыру буенча тупланган тәҗрибә һәм компетенцияләр тәкъдим ителде. Асылда, предприятиедә проект эшчәнлеген дөрес оештыру төп фактор булып тора, шул ук вакытта уңыш предприятие җитәкчесе ихтыярына һәм әлеге проектка хезмәткәрләрнең җәлеп ителүенә бәйле", – дип ассызыклады очрашу ахырында министр.
Өстәмә:
"Хезмәт җитештерүчәнлеге һәм эш белән тәэмин итүгә ярдәм итү" илкүләм проекты кысаларында түбәндәге ярдәм чаралары каралган:
федераль һәм төбәк компетенцияләр үзәкләре экспертларын түләүсез җәлеп итү, яңадан укыту һәм хезмәткәрләрнең квалификациясен күтәрү өчен субсидияләр бирү,
хезмәткәрләрне хезмәт җитештерүчәнлеген арттыру инструментларына өйрәтү,
предприятиеләрнең экспорт потенциалын үстерүгә ярдәм итү программасына керү,
идарәче кадрларны укыту программасын узу мөмкинлеге,
"Хезмәт җитештерүчәнлеге" программасы буенча проектларны гамәлгә ашыру өчен Сәнәгатьне үстерү фондыннан еллык 1% ташламалы кредит бирү.
Тулырак мәгълүматны төбәк компетенцияләр үзәгендә алырга мөмкин, тел.: (843) 272-19-41, 272-19-21, элемтә өчен: Шамил Бәйрәмов – директор урынбасары – РКҮ җитәкчесе ( Казан ш.).
Илкүләм проектта катнашу өчен гаризаны ppt.tatarstan.ru яки производительность.рф сайтына бирергә була.
СЕМИНАР МАТЕРИАЛЛАРЫ:
РКҮ, Әхмәров М.Р. (презентация)
Татарстан Республикасы Сәнәгать һәм сәүдә министрлыгы Татарстан Республикасы предприятиеләре һәм сәнәгатьчеләре ассоциациясе һәм Төбәк компетенцияләр үзәге белән берлектә "Хезмәт җитештерүчәнлеге һәм халыкны эш белән тәэмин итүгә ярдәм итү" илкүләм проектының Россия Президенты Владимир Путин тарафыннан билгеләнгән бурычларын уңышлы гамәлгә ашыру максатларында семинар оештыра.
2019 елның 16 июлендә 15.00 сәгатьтә Горький исемендәге мәдәният һәм халык иҗаты үзәгендә (Яшел Үзән шәһәре, "Горький исемендәге мәдәният һәм халык иҗаты үзәге", Ленин ур., 46 нчы йорт) Татарстан Республикасы предприятиеләрендә хезмәт җитештерүчәнлеген арттыру мәсьәләсе буенча семинар узачак.
Икътисадның чимал булмаган өлкә предприятиеләре җитәкчеләре анда катнашу өчен чакырыла – болар эшкәртү производстволары, төзелеш, авыл хуҗалыгы, транспорт һәм башкалар.
Чарада әлеге илкүләм проектта катнашучы предприятиеләр өчен каралган мөмкинлекләр һәм ярдәм чаралары тәкъдим ителәчәк, шулай ук хезмәт җитештерүчәнлеген арттыру эшләрен гамәлгә ашыру буенча аерым предприятиеләр тәҗрибәсе күрсәтеләчәк.
Катнашу өчен түбәндәге телефон буенча шалтыратырга кирәк: + 7 917 269 25 40
яки Tatyana.Nikiforova@tatar.ru дигән e-mail адресына язарга
Элемтә өчен: Татьяна Ивановна Никифорова
Эш программасы кысаларында семинарда катнашучылар "А.М.Горький исемендәге Яшел Үзән исемендәге заводы"нда булдылар. 2017 елда "А.М.Горький исемендәге Яшел Үзән заводы" АҖ "2017-2025 елларга Татарстан Республикасында хезмәт җитештерүчәнлеген арттыру һәм халыкны эш белән тәэмин итүгә ярдәм итү" өстенлекле программасында катнашучылар арасында АҖ белгечләре тарафыннан "РОСАТОМ"ның иң яхшы тармак һәм дөньякүләм сакчыл җитештерү тәҗрибәсе"н ("lean – технологияләр") кертү өчен пилот предприятие сыйфатында сайлап алынган.
Методологияне эшкәртү өчен сынау проектлары сыйфатында 8нче номерлы эш әйберләре цехы һәм 6нчы номерлы трубомедницк цехы билгеләнгән.
8нче номерлы эш әйберләре цехы һәм 6нчы номерлы трубомедницк цехын тәкъдир итүдә делегатларга әлеге участокларда хезмәт җитештерүчәнлеген арттыруга юнәлдерелгән "Сакчыл җитештерү" инструментларын куллануның арадаш нәтиҗәләре турында сөйләделәр.
8 нче цехта программаны тормышка ашыру эшләнмәләр ясау процессының үтү вакытын 3,4 тапкырга кыскартырга; запасларны 62% киметергә; персоналны эш белән тәэмин итүне уртача 89% кадәр арттырырга; җайланмаларны эш белән тәэмин итүне 85% кадәр арттырырга; дистанцияне һәм транспортлау вакытын 41% киметергә; партия күләмнәрен 4,8 тапкыр киметергә мөмкинлек биргән. Бер детальне 52,6 минуттан 33,7 минутка кадәр эшләп чыгару авырлыгының күрсәткече кимегән, бу хезмәт җитештерүчәнлеген 36% арттырырга һәм 2018 ел өчен ике млн сумнан артык икътисадый нәтиҗә алырга мөмкинлек биргән, һәм бу бер эшләнмә буенча гына.
Узган ел 6нчы цехны цифрлаштыру проекты буенча зур эш башкарылган. Производствоны әзерләү контурында үзәк складтан һәм узеллардан керүче товар-матди кыйммәтләрне, цех-җитештерүчеләрдән килүче детальләрне, комплект өлешләрне адреслы склад исәбенә алу эше автоматлаштырылган. 6-нчы номерлы трубомедницк цехында, штрих-кодлаштыру кулланып, үлчәү берәмлекләрен яңадан исәпләү һәм монтаж сызымнарына туры китереп, җитештерүгә бирү мөмкинлеге булган характеристикалар киселешендә, данәле торбалар кертүне исәпкә алу гамәлгә кертелгән.
Бүгенге көндә әлеге цехта төрле материаллардан һәм төрле диаметрлы 320 атамалы торба бар. Конкрет башкаручыга беркетеп, торба бирүнең исәбен алып бару өчен торба "паспорты"н оештыру төп чишелеш булган. Кертелгән система торба бирү белән берлектә штрих-коды буенча паспорттагы язмаларына карап, аны кире кабул итү мөмкинлеген дә бирә.
Визит барышында кунаклар заводның җитештерү цехларын карады, предприятиенең яңа эшләнмәләре һәм перспектив проектлары белән танышты.
"Горький ис. Яшел Үзән заводы" АҖ материаллары буенча
Бүген Әлмәт районында "HOT-Challenge 2019" I Халыкара яшьләр нефть-газ форумы кысаларында Татарстан Республикасының Нефть саммиты узды. Чара "Юность" җәйге савыктыру лагере территориясендә узды.
Саммит эшендә Россия Федерациясе энергетика министры урынбасары Павел Сорокин, Россия Табигать күзәтчелеге җитәкчесе Светлана Радионова, Татарстан Республикасы Президенты Рөстәм Миңнеханов, Татарстан Республикасы сәнәгать һәм сәүдә министры Альберт Кәримов һәм башкалар катнашты.
Саммитның төп вакыйгасы "Ягулык-энергетика комплексын үстерү. Глобаль чакырулар, трендлар һәм дөньякүләм көн тәртибе" темасы буенча панель дискуссиясеннән гыйбарәт булды.
Тема кысаларында чарада катнашучылар нефть-газ чыгару тармагын цифрлы үзгәртеп кору, альтернатив энергетика, шулай ук углеводородларның традицион булмаган чыганакларын һәм авыр чыгарыла торган запасларны үзгәртү мәсьәләләре турында фикер алышты.
ТР Президенты матбугат хезмәте материаллары буенча
Предприятиеләр һәм катнашучылар ягыннан ТР Президенты Рөстәм Миңнеханов йөкләмәсе буенча гамәлгә куелган беренче "Ел инженеры" республика конкурсына югары кызыксыну белдерелүгә бәйле рәвештә, оештыручылар гаризалар кабул итүне 2019 елның 31 июленә кадәр дәвам итү турында игълан итте.
Конкурста җиңүчеләр Россия һәм чит ил инженер уку йортларында стажировкада катнаша алачак.
Исегезгә төшерәбез, конкурста икътисадның 12 төрле тармак вәкилләре катнаша ала:
1. Авыл хуҗалыгы;
2. Химия, нефть химиясе, биотехнологияләр;
3. Радиоэлектроника, элемтә, оптика;
4. Нефть сәнәгате;
5. Газ сәнәгате;
6. Энергетика;
7. Җиңел, агач эшкәртү, целлюлоза-кәгазь сәнәгате;
8. Медицина сәнәгате;
9. Азык-төлек һәм эшкәртү сәнәгате;
10. Төзелеш, төзелеш материаллары сәнәгате;
11. Транспорт, юл хуҗалыгы;
12. Машина төзелеше (авиатөзелеш, суднолар төзелеше, приборлар төзү һ.б.).
Конкурсны оештыру, шулай ук гаризалар бирү турында тулырак мәгълүматны сез сылтама аша карый аласыз.
Бүген ТР Сәнәгать һәм сәүдә министрлыгында Альберт Кәримов ТР элемтә һәм мәгълүматлаштыру министры Айрат Хәйруллин белән очрашты.
Фикер алышуның төп темасы "Россия Федерациясенең цифрлы икътисады" илкүләм программасының "Цифрлы технологияләр" федераль проекты кысаларында каралган ярдәм чаралары булды. Аерым алганда, сүз икътисадта берничә юнәлеш буенча юл карталарын гамәлгә ашыру һәм дәүләт, бизнес һәм "Цифрлы икътисад" АКО арасында өч яклы хезмәттәшлек турында барды.
ТР Сәнәгать һәм сәүдә министрлыгы өчен өстенлекле бурыч – югары технологияле сәнәгать продукциясе җитештерүне оештыру һәм үстерү максатларында цифрлы платформалар һәм программа продуктларын эшләүче Россия компанияләре эшчәнлеген стимуллаштыру.
Федераль дәрәҗәдә цифрлы платформалар һәм программа продуктларын эшләү белән бәйле чыгымнарның бер өлешен каплау күздә тотыла (50% артык түгел).
"Ярдәм механизмнарын иң беренче чиратта безнең предприятиеләргә аңлау, аларга төшенү һәм куллана башлау мөһим", – дип билгеләп үтте очрашуда Альберт Кәримов.
Бүген ТР Сәнәгать һәм сәүдә министрлыгында ТР Премьер-министры йөкләмәсен үтәү кысаларында Татарстан Республикасында "альтернатив котельня" ысулын гамәлгә кертү мәсьәләләре буенча киңәшмә узды. Очрашуны Татарстан Республикасы сәнәгать һәм сәүдә министры урынбасары Алмаз Хөсәенов үткәрде.
Катнашучылар арасында – Казан, Түбән Кама һәм Яр Чаллы башкарма комитетлары, ТР Төзелеш, архитектура һәм ТКХ министрлыгы, ТР Тарифлар буенча дәүләт комитеты, шулай ук "Татэнерго", "ТГК-16", "Түбән Кама ҖЭҮ" һәм "Казэнерго" профильле компанияләре вәкилләре.
Киңәшмәнең төп темасы республиканың җылылык белән тәэмин итү системасын камилләштерү, шул исәптән кулланучылар өчен җылылык энергиясенә тарифлар үсешен тоткарлау мәсьәләсе булды.
Катнашучылар ТР Тарифлар буенча дәүләт комитеты тәкъдим иткән тарифларны тоткарлау вариантлары турында фикер алышты: бәйсез җылылык белән тәэмин итүче оешма булдыру, "кайнар суда җылылык энергиясен эшләп чыгаруга ҖЭҮ өчен инвестиция тарифы" төшенчәсен кертү һәм механизмын эшләү, шулай ук "альтернатив котельня" ысулын гамәлгә кертү мәсьәләләре.
Бүген ТР Сәнәгать һәм сәүдә министрлыгында Казанда һәм Чаллыда "акыллы җылылык челтәре" булдыру мәсьәләсе буенча "Данфосс" ҖЧҖ белән очрашу узды. Проект ТР Президентының 2019 елның апрель аенда Даниягә визиты нәтиҗәләре буенча гамәлгә ашырыла.
Хәзерге вакытта "Данфосс" ҖЧҖ "Татэнерго" АҖ, ТР Төзелеш, архитектура һәм торак-коммуналь хуҗалыгы министрлыгы, шулай ук Казан һәм Яр Чаллы башкарма комитетлары белән уртак нәтиҗәле эш алып бара. Аларның вәкилләре бүгенге проект турында фикер алышуда катнашты.
Агымдагы киңәшмәдә катнашучылар проектны гамәлгә ашыруның барышы, шул исәптән урнаштыру сроклары, нәтиҗәлелеге, шулай ук мәсьәләнең финанс аспектлары турында фикер алышты.
"Акыллы җылылык челтәре" – ул җылылык тупланмаларын урнаштыруны, автоматлаштыру һәм диспетчерлаштыруны, гидравлик балансировкалауны, яңартыла торган җылылык чыганакларын куллануны, шулай ук ясалма интеллект кертүне үз эченә алган техник чишелешләр комплексы.
"Акыллы җылылык челтәрләре" җайланмасы ярдәмендә җылылык югалту кими, энергияне саклау арта, чыгымнарны оптималь планлаштыру һәм кулланучылар өчен гадел бәя тәэмин ителә.
Казан дәүләт энергетика университетында "СИТРА" Фин милли тикшеренү һәм үсеш фондының баш киңәшчесе Тимо Макеланың циркуляр икътисадның дөньякүләм юнәлешләре буенча ачык лекциясе узды.
Визит вакытында фин кунагы шулай ук КДЭУ ректоры Эдвард Абдуллаҗанов белән 2019 елның көзенә планлаштырылган "СИТРА" үзәген ачу турында да сөйләшергә өлгерде.
Лекциядән соң Тимо Макела Татарстан эшкуарларының берничә соравына җавап бирде.
Исегезгә төшерәбез, Финляндия фондының төп бурычы илнең тотрыклы, балансланган үсешенә, икътисадның үсешенә, аның бөтендөнья конкурентлык сәләтенә һәм халыкара хезмәттәшлеккә ярдәм итүдән гыйбарәт.
Лекция нәтиҗәләре буенча Финляндия делегациясе вәкилләре һәм КДЭУ җитәкчелеге арасында киңәшмә узды, анда вузның СИТРА фонды белән киләчәктә хезмәттәшлек итү мәсьәләсе күтәрелде.
Казан дәүләт энергетика университеты чараны үткәрү урыны итеп очраклы гына сайланмаган. Агымдагы елның апрелендә югары уку йорты базасында фонд һәм мәнфәгатьле Татарстан һәм фин предприятиеләре белән берлектә Циркуляр икътисад үзәген оештыру турында килешүгә ирешелде. Эшчәнлек юнәлешләре түбәндәгеләрдән гыйбарәт булачак:
циркуляр икътисад буенча студентлар һәм мәктәп укучылары өчен белем бирү курслары эшләү;
әлеге өлкәдә предприятиеләр, оешмалар һәм ведомстволар хезмәткәрләренең квалификациясен күтәрү;
сәнәгатьнең барлык тармакларында яшел технологияләр буенча фәнни тикшеренүләр.
Моннан тыш, әлеге килешү Татарстанның ТР Президенты Рөстәм Миңнеханов җитәкчелегендәге рәсми делегациясенең Финляндия Республикасына визиты вакытында да фонд җитәкчелеге тарафыннан расланган иде. Визит барышында Татарстан делегациясе Халыкара циркуляр икътисад форумы – World Circular Economy Forum ачу тантанасында катнашты.
Казан дәүләт энергетика университеты матбугат хезмәте материаллары буенча
"Сәүдә вәкилләре атналыгы" кысаларында Татарстан Республикасына Россия Федерациясенең чит дәүләтләрдә – Норвегия Патшалыгы, Төрекмәнстан, Украина, Иран Ислам Республикасы, Беларусь Республикасы һәм Әзербайҗан Республикасындагы сәүдә вәкилләре делегациясе килде.
Бүген иртән делегация Татарстан Республикасы Президенты Рөстәм Миңнеханов һәм Татарстан Республикасы сәнәгать һәм сәүдә министры Альберт Кәримов белән очрашу өчен Татарстан Республикасы Хөкүмәте йортында булды.
Яклар Татарстанның чит ил партнерлары белән агымдагы сәүдә-икътисадый хезмәттәшлеге, республика предприятиеләренең экспорт эшчәнлеге һәм аларның продукциясен чит ил базарларына чыгару мәсьәләләре, шулай ук хезмәттәшлекне үстерү өчен башка перспектив юнәлешләр буенча фикер алышты.
Эш программасының чираттагы пункты Татарстан Республикасының Инвестицияле үсеш агентлыгында булды, анда делегациягә Татарстан Республикасының икътисадый потенциалы презентацияләнде. Делегацияне Татарстан Республикасы сәнәгать һәм сәүдә министры урынбасары Герман Лернер озатып йөрде.
"Сәүдә вәкилләре атналыгы" Россия Сәнәгать һәм сәүдә министрлыгы тарафыннан 2019 елның 8-12 июлендә экспортка һәм халыкара сәүдәгә ярдәм итү мәсьәләләре буенча фикер алышу өчен уздырыла.
ТР Президенты матбугат хезмәте һәм ТР ИҮА материаллары буенча