Үзбәкстан «Татарча диктант 2021» язган
2021 елның 12 сентябрендә «Татарча диктант-2021» Бөтендөнья акциясе узды. Чара бөтен дөньяда онлайн режимында узды. Аңа Үзбәкстан Республикасының Ташкент, Яңыюл, Җиззәх, Сәмәрканд, Бохара, Нәвайи, Үргәнеч, Каршы, Фәргана һәм башка шәһәрләреннән дә татар иҗтимагый мәдәни үзәкләре активистлары кушылган.
Акциягә Үзбәкстан Республикасында Татарстан Республикасы Вәкиллеге мәйданчыгында старт бирелгән, анда Вәкиллек хезмәткәрләре, Ташкент шәһәренең Татар иҗтимагый мәдәни-агарту үзәге идарәсе әгъзалары һәм активистлар җыелган. Диктант язуга балалар да кушылган.
Быел Үзбәкстанда 100дән артык кеше диктант язган. Үзбәкстанда акцияне уздырган вакытта иң яшь катнашучыга – 5, иң өлкәненә 77 яшь булган.
Акциядә катнашкан һәркемгә катнашучы сертификатлары тапшырылган.