КВЗ Ансат вертолеты тренажерын куллануга Росавиациядән рөхсәтен алган
«Вертолеты России» холдингының (Ростех дәүләт корпорациясенә керә) Казан вертолет заводы Һава транспорты федераль агентлыгыннан (Росавиация) Россиядәге гражданнар авиациясе пилотлары өчен Ансат вертолеты тренажерын эксплуатацияләүгә рөхсәт алган.
Росавиация тарафыннан һава судносы тибына әзерлек, Ансат вертолетының очыш экипажлары әгъзаларының һөнәри күнекмәләрен вакытында үткәрү өчен тренажер җайланмасында эшләүгә рөхсәт бирелгән.
2020 елда Казан вертолет заводы Н.Е.Жуковский исемендәге Аэрогидродинамика институтының Авиация техникасына экспертиза уздыру һәм сертификат бирү үзәгеннән Ансат вертолеты тренажерының барча халыкара стандартларга туры килүе турында бәяләмә алган.
Ансат вертолетының комплекслы тренажеры пилот урыныннан тулысынча күренешне тәэмин итә торган визуальләштерү системасы белән җиһазландырылган. Аның ярдәмендә ике районга: Казан вертолет заводының очу-сынау комплексын да кертеп, Казанга һәм Сочига очыш ясала. Виброплатформа һәм аудиосистема очыш вакытында барлыкка килә торган вибрацияләрне һәм акустика тәэсирләрен булдырырга ярдәм итә. Тренажер ярдәмендә укучы пилотлар төрле шартларда, шул исәптән куркыныч һәм авария хәлләрендә дә, эш кылу тәртибен карый алачак.
Ансат комплекслы тренажерын эшләү һәм әзерләү «Вертолеты России» холдингының Казан вертолет заводында Авиациягә укыту үзәген үстерү концепциясе» инвестиция проекты нигезендә башкарылган.
Шулай ук Казан вертолет заводының укыту үзәге Ми-8МТВ вертолетының да комплекслы тренажеры белән җиһазландырылган. Тренажер кабинасы төнге шартларда пилотларның күнегүләрен кабатлау өчен җайлаштырылган. Моннан тыш, тренажер очу режимына һәм шартларына карап вертолет чыгара торган тавышларны һәм вибрацияне кабатлый торган виброакустика җайланмасы белән дә җиһазландырылган.
Казан вертолет заводының Авиациягә укыту үзәге 1995 елда оештырылган. 20 елдан артык эшли торган Үзәктә 9000 якын белгеч укып чыккан. Үзәктә очучыларны һәм инженер-техник состав белгечләрен яңадан әзерләү һәм аларның квалификацияләрен күтәрү курслары уздырыла. Укытучылар даими рәвештә үз белемнәрен камилләштерә һәм Россиянең алдынгы уку үзәкләрендә, шулай ук чит илләрдә стажировка уза, авиация җитештерүче компанияләрнең исемле сертификатларына ия була. Казан вертолет заводының Авиациягә укыту үзәгендә Ми-8/17, Ансат тибындагы вертолетлар белән эш итәргә өйрәтәләр. Якын киләчәктә Ми-38 вертолеты буенча да шундый ук укыту программасын эшләү планлаштырыла.