Герман Лернер Казакъстан товар җитештерүчеләренең сәүдә-икътисадый миссиясендә катнашты
Пәнҗешәмбе көнне, 29 июльдә «Россия – Ислам дөньясы: KazanSummit 2021» XII халыкара икътисадый саммиты кысаларында Казакъстан товар җитештерүчеләренең сәүдә-икътисадый миссиясе узды.
Очрашу барышында Казакъстан предприятиеләреләреннән презентация булды: Татарстан эшкуарлары потенциаль партнерларның продукциясен үз күзләре белән күрә, кызыксындырган сорауларын бирә алды. Казакъстан эшкуарлары үз компанияләренең җитештерү мөмкинлекләрен тәкъдим итте һәм Татарстан базары ихтыяҗлары турында фикер алышты.
Герман Лернер билгеләп үткәнчә, Казакъстан Республикасы белән хезмәттәшлекне үстерү – Татарстанның тышкы икътисадый эшчәнлегендә мөһим юнәлеш. Соңгы 5 ел дәвамында Казакъстан Республикасы – тышкы сәүдә күләме буенча Татарстанның 7 партнеры арасында.
Коронавирус пандемиясе һәм чикләү чаралары кертелүгә карамастан, 2020 елда Казакъстан белән Татарстан арасында товар әйләнеше күрсәткече, 2019 ел күрсәткече белән чагыштырганда, 14%ка артып, АКШ доллары белән 630 млн булган.
«Хәзерге вакытта үзара файдалы сәүдә-икътисадый мөнәсәбәтләрне алга таба киңәйтүнең зур потенциалы бар, – диде Герман Лернер. – Ышанам ки, актив уртак эшне дәвам иттереп, без ике яклы тышкы сәүдә әйләнеше күләмен арттыра алачакбыз».