Яңа катер төзелә башлады

7 майда Горький исемендәге Зеленодольск заводында диверсиягә каршы торучан яңа катер төзелә башлау тантанасы булды. Әлеге чарада Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Р. Зарипов, Каспий флотилиясе командующие, вице-адмирал Сергей Алекминский, Россия Оборона министрлыгы, Россия Хәрби диңгез флоты вәкилләре, "Ак Барс" ХК ААҖ һәм "Горький исемендәге Зеленодольск заводы" ААҖ җитәкчелеге, Зеленодольск шәһәре администрациясе вәкилләре катнашты.
Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Р. Зарипов әйтүенчә, "Горький исемендәге Зеленодольск заводы бүген күәтле җитештерү потенциалы булган, динамик үсештәге судно төзү предприятиесе. 2012 елда биредә 7,5 млрд. сумлык продукция эшләп чыгарылды, сәнәгать җитештерүе индексы 144% тәшкил итте. Агымдагы елның 1 кварталында җитештерү 1,6 млрд. сумга җитте. Предприятие киләчәккә эш белән тәэмин ителгән инде: заказлар бүгеннән үк кабул ителгән.".
Бүген предприятиедә диверсиягә каршы торучан яңа катер ("Грачонок") төзелә башлады. Ул туплану пунктлары акваторияләрендә һәм аларга якын урыннарда, шулай ук Россия Федерациясе Чик хезмәтенә Россиянең дәүләт чикләрен саклау һәм яклау мәсьәләләрен хәл иткәндә террористик көчләргә һәм гамәлләргә каршы көрәш өчен кулланылачак.
Мондый төрдәге беренче катер 2008 елның 18 февралендә җыела башлаган иде. Хәзерге вакытта Россия Хәрби диңгез флотында шундый өч катер бар. Тагын дүрт судно төзелә, шуларның икесе агымдагы елда файдалануга тапшырылачак.
"2020 елга кадәр Россия Федерациясе оборона-сәнәгать комплексын үстерү" Федераль максатчан программасы кысаларында Горький исемендәге Зеленодольск судно төзү заводында җитештерүне модернизацияләү гамәлгә ашырыла. Эшчеләрнең, инженерларның, конструкторларның, фәнни-техник хезмәткәрләрнең төп максаты "Сакчыл җитештерү" технологияләрен кертүгә, заман таләпләренә җавап бирә торган, конкурентлылыкка сәләтле продукция эшләп чыгаруга юнәлдерелгән.
Судно төзү заводы чит илләрдәге партнерлары белән хезмәттәшлек итүне арттыра, инновацияле перспектив программаларны гамәлгә ашыра, социаль яктан әһәмиятле чаралар уздыра.
Татарстан Республикасы сәнәгать һәм сәүдә министры предпритие коллективын бүгенге вакыйга белән котлады, һәм хезмәткәрләргә, предприятие ветераннарына рәхмәтен белдерде: "Без Зеленодольск судно төзү предприятиесенең тарихы, аның Бөек Ватан сугышында җиңүгә, илнең халык хуҗалыгын торгызуга, бүгенге Россиянең оборона һәм сәнәгать потенциалын ныгытуга үзеннән зур өлеш кертүе белән горурланабыз",– диде Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Р. Зарипов.