Рөстәм Миңнеханов Алтай Республикасы башлыгы Олег Хорохордин белән очрашуда үзара товар әйләнешен һәм туристлык юнәлешләрен үстерү өстендә эшләргә тәкъдим итте
Бүген Казан Кремлендә Татарстан Республикасы Хөкүмәте һәм Алтай Республикасы Хөкүмәте арасында сәүдә-икътисад, фән-техника һәм социаль-мәдәни хезмәттәшлек турындагы килешүне гамәлгә ашыру чаралары планы имзаланды.
Документка Татарстан Республикасы Президенты һәм Алтай Республикасы башлыгы Олег Хорохордин кул куйды.
Исегезгә төшерәбез, Олег Хорохордин җитәкчелегендәге Алтай Республикасы делегациясе Казанга эш визиты белән килде. Делегация әгъзалары Татарстан Республикасының Инвестиция үсеше агентлыгында булдылар, анда төбәкнең сәүдә-икътисад һәм инвестиция потенциалы белән таныштылар, шулай ук Казанның иҗтимагый киңлекләрен, аерым алганда, Иске Татар бистәсен һәм Кабан күленең яр буен бәяләделәр.
Рөстәм Миңнеханов Олег Хорохордин белән очрашу барышында, агымдагы елның июнендә Горно-Алтайда төзелгән хезмәттәшлек турындагы килешүне гамәлгә ашыру буенча «юл картасы»на кул кую өчен Казанга килү мөмкинлеге тапканнары өчен рәхмәт белдерде.
Ул искәрткәнчә, Алтайда берничә мәртәбә булган һәм соңгы елларда эшлекле төбәкара багланышлар активлашкан.
Рөстәм Миңнеханов сүзләренә караганда, бүген Татарстан белән Алтай Республикасы арасында товар әйләнеше зур түгел – Татарстан 450 млн. сумга якын продукция китерә.
Алтай Республикасының табигый төрлелеге зур кызыксыну уята, дип белдерде Рөстәм Миңнеханов, 2018 елда кар барсы популяциясен саклау һәм торгызу буенча килешүгә кул куелды, бу өлкәдә ведомствоара юл картасы төзелде. Бу эшкә Россия Фәннәр Академиясе, А.Н.Северцов исемендәге Экология һәм эволюция проблемалары институты галимнәре дә кушылды.
«Уртак көч белән мәчеләрнең сирәк төрләрен өйрәнү үзәген булдырачакбыз, – диде Рөстәм Миңнеханов. – Тау Алтаеның уникаль табигате – бөтен ил байлыгы. Сезнең төбәктә туристлык инфраструктура уңышлы үсеш ала». Ул шулай ук туристлык тармагының потенциалы Алтай Республикасының динамик үсешенә ярдәм итәчәгенә дә ышаныч белдерде.
«Безне тирән этнокультура элемтәләре берләштерә, – дип дәвам итте Рөстәм Миңнеханов. – Зур Алтай – күп кенә мәдәниятләрнең, шул исәптән төркиләрнең дә ерак ватаны. Без киләчәктә дә безнең галимнәр – тарих һәм мәдәният өлкәсендәге тикшеренүчеләренең, төрки халыклары арасындагы хезмәттәшлекне ныгытачакбыз, мәдәни һәм тарихи мирасны саклау буенча бергәләп эшләячәкбез, иҗади коллективлар һәм музей экспозицияләре белән мәдәни алмашуларга ярдәм итәчәкбез».
Үз чиратында, Алтай Республикасы башлыгы Олег Хорохордин Татарстан Республикасын ТАССР оешуның 100 еллыгы, ә Рөстәм Миңнехановны Татарстан Президенты сайлауларында ышанычлы җиңү яулавы белән котлады.
Безнең Татарстан белән хезмәттәшлек эзлекле рәвештә үсә», – диде Олег Хорохордин. Төбәк өчен иң кызыклы юнәлешләр арасында ул туризм өлкәсендә хезмәттәшлек итү һәм туристлык юнәлешләрен популярлаштыру, шулай ук махсус икътисадый зоналар оештыру һәм аларны үстерү буенча хезмәттәшлек һәм тәҗрибә алуны атады. Моннан тыш, экология һәм әйләнә-тирә мохитне саклау, сәнәгать парклары һәм электрон сәүдә мәйданчыклары булдыру өлкәсендәге эшчәнлек дә перспективалы булып тора.
«Безнең килешү төбәкләребезгә файда китерер дип ышанам», – диде Олег Хорохордин. Ул хәбәр иткәнчә, 2021 елда Алтай Республикасының 30 еллыгы бәйрәм ителәчәк һәм Рөстәм Миңнехановны бу вакыйгага чакырды.
Моннан тыш, төбәктә Алтай Республикасында Сабантуй кебек танылган татар бәйрәме оештырылуын да көтәләр, диде Олег Хорохордин.
Рөстәм Миңнеханов хәбәр иткәнчә, 2021 елда Алтай Республикасының 30 еллыгын бәйрәм итүгә чакыруны бик теләп кабул итә, шулай ук Алтай Республикасында Сабантуй милли бәйрәмен оештыру һәм уздыру мөмкинлеген дә караячак.
Әлеге очрашуда шулай ук Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов та катнашты.