Ташкентта Икенче Бөтендөнья сугышы тәмамлануга багышланган чәчәк салу тантанасы узды
3 сентябрьдә Үзбәкстан Республикасында Россия Федерациясе Илчелеге һәм Россотрудничество вәкиллеге инициативасы белән Волгоград мемориаль комплексы территориясендә Икенче Бөтендөнья сугышы тәмамлануга багышланган чәчәк салу тантанасы булды.
Акциядә Россия Федерациясенең Үзбәкстан Республикасындагы эшләрендә вакытлы ышанычлысы Вадим Митрофанов, Үзбәкстан Республикасында Россотрудничество вәкиллеге җитәкчесе Михаил Вождаев, Үзбәкстан Республикасында Татарстан Республикасы вәкиле Айдар Әхтәриев, Республика рус мәдәни үзәге рәисе Сергей Миронов, Ташкент шәһәрендәге Татар иҗтимагый мәдәни-агарту үзәге рәисе Ришат Нәбиуллин, З.Вәлиди исемендәге Башкорт иҗтимагый мәдәни үзәге рәисе Ринат Гуляев, Үзбәкстанда Россия ватандашлары оешмалары координация советы рәисе вазыйфаларын башкаручы Василий Костецкий һ.б. катнашты.
Бу көнне Россиядә һәм бөтен дөньяда кешелек тарихында иң канкойгыч сугышларның берсе – Икенче Бөтендөнья сугышы тәмамлану уңаеннан истәлекле чаралар уза. Үзбәкстанның Россия дипломатлары һәм җәмәгатьчелеге әлеге акцияне хуплады һәм уртак җиңүебезне яулаган сугышчыларны искә алды.