Казанда Илкүләм җилкәнле лига Югары дивизионының II этабы тәмамланды
Узган ял көннәрендә Татарстан башкаласында Казансу елгасы акваториясендә 2020 елгы Илкүләм җилкәнле лига Югары дивизионының II этабы тәмамланды. Быел анда Россиянең 15 төбәгеннән 250 артык спортчы катнашты.
Икенче ел рәттән Татарстан Республикасы илдә иң зур җилкәнле проектны кабул итә. Бу этап 1941-1945 еллар Бөек Ватан сугышында Җиңүнең 75 еллыгына һәм Татарстан АССР төзелүнең 100 еллыгына багышланган иде. Регата Татарстан Республикасы Президенты Рөстәм Миңнеханов ярдәме белән узды.
ТАССРның 100 еллыгы һәм Казан шәһәре көне уңаеннан уздырылган тантаналар көнендә йомгак ясалды. Спортчыларны Татарстан Хөкүмәте исеменнән ТР Премьер-министры урынбасары – ТР сәнәгать һәм сәүдә министры, ТР Җилкәнле спорт федерациясенең Химаячеләр советы рәисе Альберт Кәримов котлады.
«6 ел эшләү дәверендә Лига илнең күләмле һәм дәрәҗәле күп этаплы регатасына әверелде, Россиянең иң көчле яхтсменнарын җыйды, җилкәнгә мәхәббәт берләштергән кешеләр берләшмәсенә әверелде. Бу ел безнең өчен үзенчәлекле булды, без республикабызның 100 еллыгын бәйрәм итәбез. Гасырлык тарихында Татарстан барлык юнәлешләр буенча да, шул исәптән спортта да, зур нәтиҗәләргә иреште», – дип билгеләп үтте ул. Чарада барлыгы илнең иң көчле 19 командасы катнашты, шул исәптән 2 Татарстан командасы да. Чечнядан «Әхмәт» командасы лидер булды.