Казан вертолет заводына – 80 ел
Бүген Казан вертолет заводында «Казан вертолет заводы» ГАҖ оешуга 80 ел тулуга багышланган тантаналы чара узды.
Казан вертолет заводының авиация тарихы 1940 елның 4 сентябрендә башлана. Бөек Ватан сугышы вакытында предприятие фронт өчен По-2 буенча 11 мең җиңел төнге бомбардировщик әзерләгән, заводта Бөек Ватан сугышы елларында СССР авиация сәнәгате җитештергән һәр унынчы хәрби самолет җыелган. 1945 елда хәрби самолетлар җитештерү буенча Хөкүмәт биремнәрен үрнәк үтәгәне өчен Казан заводы 387 нче номерлы Хезмәт Кызыл Байрагы ордены белән бүләкләнә. 1947-1951 елларда предприятие сугыштан соң халык хуҗалыгын торгызуга актив керешә: завод илдә беренче 9000нән артык С-4 үзйөрешле комбайн җитештерә.
1951 елдан предприятиедә винтокрылы машиналар җитештерелә башлый. Завод барлыкка килү тарихында 12000гә якын Ми-1, Ми-4, Ми-8, Ми-17 вертолетлары һәм аларның модификацияләре 92 илгә җитбәрелгән.
1966 елның 30 апрелендә 387 номерлы завод Казан вертолет заводы итеп үзгәртелә.
1970 елда биш еллык планны уңышлы үтәгәне һәм яңа техника җитештерүне оештырганы өчен завод Октябрь Революциясе ордены белән бүләкләнә.
1973-1986 елларда завод 273 вертолет – Ми-14 амфибиясе җитештерә.
1997 елдан предприятие «Ансат» җиңел вертолетларын мөстәкыйль рәвештә эшли башлый.
2004 ел – «Ансат» вертолетын серияле җитештерү башлана.
2007 елда «Казан вертолет заводы» ГАҖ «Россия вертолетлары» холдингына керде. Россиядә авиация техникасын үстерү федераль программасы кысаларында предприятие урта класслы Ми-38 вертолетын җитештерүне үзләштерә. 2019 елда Россия Федерациясе Оборона министрлыгы өчен беренче тапкыр ике Ми-38Т вертолеты китертелә. 2020 елда беренче Ми-38 граждан заказчысына тапшырылган. Рособоронэкспорт 2021-2022 елларда чит ил заказчысына Ми-38Т вертолетларын китерүгә беренче контракт төзегән.
Ансат вертолетларын чит илгә китерүгә берничә контракт төзелгән, вертолет Кытайның авиация хакимияте тарафыннан сертификацияләнгән. 2020 елда КВЗ неонаталь пациентларны ташу өчен Ансатка медмодульле комплекс урнаштыруга Росавиациядән хуплау алды. Моннан тыш, Ансатларны инфекция бокслары белән җиһазлауга авиация хакимияте хуплавы алынды, бу COVID-19га каршы көрәштә санитар бортларны кулланырга һәм аеруча куркыныч инфекцияләр һәм вируслар белән зарарлануга шикләнгән пациентларны йөртергә мөмкинлек бирәчәк
2020 елның февралендә Россиянең авиация хакимияте Ансатка авария хәлендәге китерү системасын урнаштыруны сертификацияләде. Шулай ук вертолетның кайбер төп агрегатларының очыш яраклылыгына чикләүләрне арттыру буенча төп үзгәреш хупланды, бу Ансат вертолетын потенциаль заказчыла өчен тагын да кызыклырак итә һәм аның чит ил вертолет техникасы белән чагыштырганда көндәшлеккә сәләтлелеген арттыра.
«Казан вертолет заводы» ГАҖ – тармакта вертолет техникасын эшләп чыгару һәм серияләп чыгару, персоналны укыту һәм ремонт үткәрү буенча тулы циклны башкаручы бердәнбер предприятие.
Эшчәнлекнең төп төрләре: вертолетлар җитештерү, капиталь ремонт, запас частьләр җитештерү, инженер-техник ярдәм, вертолетларны модернизацияләү, авиация персоналын укыту, вертолетларга хезмәт күрсәтү буенча җир өсте җиһазлары җитештерү, тәҗрибә-конструкторлык эшләнмәләре.
Бәйрәм чарасында Россия Федерациясе Сәнәгать һәм сәүдә министрлыгының Авиация сәнәгате департаменты директоры Дмитрий Лысогорский, баш штурман – Россия ФСО авиация үзәгенең штурман хезмәте башлыгы Юрий Костюков, «Россия вертолетлары» АҖ генераль директоры Андрей Богинский, Татарстан Республикасы Президенты Рөстәм Миңнеханов, Татарстан Республикасы Президенты ярдәмчесе Равил Зарипов, Татарстан Республикасы Президенты Аппараты Җитәкчесе Әсгать Сәфәров, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов, Казан шәһәре мэры Илсур Метшин һәм башка дәрәҗәле кунаклар катнашты.