Альберт Кәримов Мамадыш муниципаль районында булды
Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов Мамадыш муниципаль районында булды, анда ул традицион рәвештә азык-төлек һәм эшкәртү сәнәгате предприятиеләрен карады, шулай ук «Азбука сыра» ҖЧҖ филиалы – «Мамадыш заводы» һәм «Татспиртпром» АҖ филиалы – «Мамадыш спирт заводы» хезмәт коллективлары белән очрашты.
Мамадыш районы предприятиеләре буенча 2020 елның 7 аенда 5140 млн. сумлык продукция төяп озатылган, 116%ка арткан. 2020 елның 7 аенда сәнәгый җитештерү индексы 108% тәшкил иткән.
«Хезмәт җитештерүчәнлеге һәм мәшгульлеккә ярдәм итү» илкүләм проектында катнашучы «Азбука сыра» ҖЧҖнең «Мамадыш заводы» филиалы сыр, атланмай һәм коры сөт җитештерүдә махсуслаша. Мамадыш сыр заводы 2020 елның 7 аенда 90,5 мең тонна сөт эшкәрткән, 3 млрд 683 млн. сумлык продукция җитештергән.
«Татспиртпром» ААҖ филиалы – «Мамадыш спирт заводы» стратегик мөһим предприятиеләрнең берсе, аның җитештерү күләме 394,9 млн. сум тәшкил итә.
Шулай ук Мамадыш районында заманча «Вятка» сәнәгать паркы эшли, анда төрле сәнәгать тармакларының югары технологияле эшчәнлек урыннары урнашкан.
«Республика алга таба да сәнәгатьне үстерүгә, югары технологияле производстволар һәм яңа эш урыннары булдыруга юнәлешне дәвам итәчәк. Соңгы ун елда республика сизелерлек үзгәрде. Без Татарстан Республикасында яшәүче һәр кешенең уртак эше нәтиҗәсендә ирешелгән нәтиҗәләр белән горурлана алабыз», – диде Альберт Кәримов үзенең «Азбука сыра» ҖЧҖ филиалы – «Мамадыш заводы» һәм «Татспиртпром» АҖ филиалы – «Мамадыш спирт заводы» хезмәт коллективларына булган мөрәҗәгатендә.