ТР Сәнәгать һәм сәүдә министрлыгында Татарстан Республикасының Төрекмәнстан белән икеяклы хезмәттәшлеген үстерү мәсьәләләре турында фикер алыштылар
Бүген Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов Төрекмәнстан Министрлар Кабинеты Рәисе урынбасары – Төрекмәнстанның тышкы эшләр министры Рәшид Мередов белән очрашты. Очрашу видеоконференция форматында узды, анда яклар Татарстан Республикасы белән Төрекмәнстан арасында сәнәгать өлкәсендәге перспективалар турында фикер алышты.
– Төрекмәнстан – Татарстан Республикасының өстенлекле партнерларыннан берсе. Без Төрекмәнстан белән алга таба да төрле планлы хезмәттәшлекне тирәнәйтергә телибез, – диде Альберт Кәримов үзенең сәламләү сүзләрендә. Шулай ук, ул билгеләп үткәнчә, үзара багланышлар ике яклы хезмәттәшлекне үстерүнең югары дәрәҗәдә булуын күрсәтә.
Хәзерге вакытта «КАМАЗ» ГАҖ, «Казан вертолет заводы» ГАҖ, «Татнефть» ГАҖ, «Ак Барс» суднолар төзү корпорациясе», «КЭР – Холдинг» ИК» ҖЧҖ кебек Татарстан Республикасы предприятиеләре, авыр эпидемиологик хәлгә карамастан, килеп туган кыенлыкларны бергә үтеп, төрекмән партнерлары белән хезмәттәшлекне дәвам иттерә. Шулай ук Татарстан Республикасыннан «Татхимфармпрепараты» АҖ, «Таттехмедфарм» ДУП, «ТР ФармМедПолис РТ» ҖЧҖ кебек предприятиеләр Төрекмәнстанны вируска каршы дарулар, аппаратлар һәм шәхси саклану чаралары белән тәэмин итте.
Татарстан Республикасы киләчәктә дә Төрекмәнстан халкына яңа коронавирус йогышы белән көрәштә һәрьяклап ярдәм итәргә әзер.