Татарстан – Тюрингия хезмәттәшлеге арта

2012 елның 11 октябрендә Казанда икътисадый форум булды, анда Тюрингия Федераль җирләренең (Германия) икътисад, хезмәт һәм технологияләр министры Матиас Махник әфәнде, Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Р. Зарипов, Татарстан һәм Тюрингиянең министрлыклар һәм ведомстволар җитәкчеләре, 45 Татарстан һәм немец предприятиесе һәм компанияләре вәкилләре катнашты.
Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Р. Зарипов Татарстан Республикасының социаль-икътисадый һәм инвестиция потенциалын презентацияләде, хезмәттәшлек итүнең ике як өчен дә өстенлекле якларын билгеләп үтте.
Тюрингия Федераль җирләренең (Германия) икътисад, хезмәт һәм технологияләр министры Матиас Махник әфәнде үз чыгышында Тюрингия Федераль җирләренең (Германия) инновация потенциалы хакында бәян итте.
Fuso Kamaz Trucks Rus компаниясенең икътисад һәм финанслар буенча генераль директор урынбасары Томас Унгер чыгышы Татарстандагы партнерлар белән уңышлы хезмәттәшлек итүне дәлилләүче мисал булды.

Форум барышында А.Н. Туполев исемендәге КНИТУ-КАИ һәм Ильменау Техник университеты арасында хезмәттәшлек итү турында Килешүгә кул куелды. Әлеге документ фәнни өлкәләрдә ике як өчен дә файдалы хезмәттәшлек итүне, фәнни-укытучы кадрлар һәм студентлар алмашуны, мәгълүмат алышуны күздә тота.
Эшлекле форум программасына шулай ук “Алабуга” МИЗ презентациясе һәм Татарстан һәм Тюрингиянең эшлекле даирәләре очрашуын үткәрү дә кертелгән иде.
Форум эшендә машина төзелеше, авыл хуҗалыгы, сәламәтлек саклау, мәгариф, алдынгы технологияләр һәм инновацияләр өлкәсендә инвестицияләр җәлеп итү һәм хезмәттәшлек мәсьәләләре төп игътибар үзәгендә булды.
Германия Татарстан Республикасының төп сәүдә партнерларының берсе. 2011 елда ике яклы тышкы сәүдә әйләнеше 2,371 млрд. доллар, агымдагы елның 1 яртыеллыгында 670,7 млн. доллар тәшкил итте.