Алабугада Спас ярминкәсе үткәрелә

3 – 5 августта Алабуга шәһәрендә V Бөтенроссия Спас ярминкәсе үткәрелә. Анда 400дән артык һөнәрче катнашачак. Ярминкәгә ювелир әйберләр, милли киемнәр, киндер кием-салым, мамык, агачтан уеп ясалган әйберләр, керамика (уенчыклар), гжель, нәфис күн, корама тегү һәм курчаклар, металлдан, кайрыдан, пыяладан ясалган әйберләре белән Россия Федерациясенең 44 шәһәреннән һәм 20 җирлегеннән халык һөнәрчеләре катнаша. Ярминкәгә шулай ук Россиянең һәм чил илләрнең күн эшкәртү осталары киләчәк, алар теләүчеләр өчен мастер-класслар үткәрәчәк.
Спас ярминкәсендә милли һәм авыл хуҗалыгы утарлары, спорт һәм балалар шәһәрчекләре эшләячәк, ярминкә кысаларында Алабуга шәһәрендә кыңгыраулар чаңы фестивале дә үткәреләчәк.
Бу борынгы шәһәргә дөньяның төрле почмакларыннан атаклы якташларыбызның туганнары, аларның тормышын һәм иҗатын өйрәнүчеләр җыелыр дип көтелә. Алар өчен махсус программа: Бородино сугышы юбилеена багышланган күргәзмәне ачу, Н. Дурова музей-йортында очрашу, Александрия бакчасында театральләштерелгән тамаша, “Токымнар балы", Цветаева укулары оештырыла.
Мәгълүмат өчен:
Алабугада Спас ярминкәсен һәм Кыңгыраулар чаңы фестивален Алабуга муниципаль районы, Россия Федерациясе Мәдәният министрлыгы, Татарстан Республикасы Мәдәният министрлыгы, Татарстан Республикасы Сәнәгать һәм сәүдә министрлыгы, Татарстан Республикасы Авыл хуҗалыгы һәм азык-төлек министрлыгы, Татарстан Республикасы Икътисад министрлыгы, Татарстан Республикасы Яшьләр эшләре, спорт һәм туризм министрлыгы, Чаллы шәһәре һәм "Кама арты” төбәге сәүдә-сәнәгать палатасы, Россиянең кече туризм шәһәрләре ассоциациясе, Алабуга дәүләт музей-тыюлыгы оештыра.