Татар халык ашларының абруе арта

2011 елның 22 декабрендә Татарстан Республикасы Сәнәгать һәм сәүдә министрлыгында Казан шәһәре рестораннарында һәм кафеларында туристларны татар халык ашлары белән сыйлау мәсьәләсенә багышланган киңәшмә уздырылды. Киңәшмәдә Татарстан Республикасы Сәнәгать һәм сәүдә министрлыгы, Яшьләр эшләре буенча, спорт һәм туризм министрлыгы, Казан шәһәре башкарма комитеты, Казан шәһәре һәм Татарстан Республикасы буенча ресторан һәм кунакханә хуҗалары ассоциациясе вәкилләре һ.б катнашты.
Казан шәһәрендә үткәреләчәк 2013 елгы Универсиада кысаларында татар халык ашларының абруен күтәрү, ресторан, кафе, ашханәләрдә хезмәт күрсәтүләрне яхшырту, азык төрләрен баету мәсьәләләре актуаль булып тора.
Бүген Казан шәһәрендә 87888 урынга исәпләнгән 1026 җәмәгать туклануы предприятиесе эшли. Шул исәптән, 155 ресторан, 528 бар һәм кафе. Татарстан Республикасы Сәнәгать һәм сәүдә министрлыгы хезмәткәрләре тарафыннан Казан шәһәре һәм Татарстан Республикасы буенча ресторан һәм кунакханә хуҗалары ассоциациясе белән берлектә 183 җәмәгать туклануы объектына менюда татар халык ашларының булу-булмавына мониторинг үткәрелде. Нәтиҗәдә, тикшерелгән предприятиеләрнең 14 ендә генә (8%) татар ашларының аерым менюсы барлыгы ачыкланды. 73 ресторанда менюга татар халык ашларының аерым төрләре кертелә, ә калган предприятиеләр (52%) Европа, көнчыгыш, Италия, япон, кытай, грузин, үзбәк ашлары өчен махсуслашкан. Бүген Казан шәһәрендә “Чәй йорты”, “Алан аш”, “Биләр”, “ДТК”, “Ностальгия” җәмәгать туклануы предприятиеләре татар халык ашлары буенча махсуслашкан.
Киңәшмәдә ресторан менюларына татар халык ашлары һәм эчемлекләре тәкъдим ителүче аерым бит өстәү турында карар кабул ителде.