ЯҢАЛЫКЛАР

Бүген Альберт Кәримов предприятие эшчәнлеге белән танышу максатында "Риэль Инжиниринг" ДК предприятиесендә булды. Презентацияне компания төркеме җитәкчесе Таһир Әхмәтҗанов үткәрде.

Компанияләр төркеменә Яр Чаллы шәһәренең "Риэль Инжиниринг" ҖЧҖ һәм Иннополис шәһәрендә урнашкан "Риэль Цифрлы технологияләр" ҖЧҖ керә. Предприятие "Цифрлы җитештерү Индустриясе 4.0+" классына караган программа-аппарат комплексларын эшләп чыгара һәм җитештерә. Компания автоматлаштыру буенча тулы хезмәтләр комплексын күрсәтә: проект-смета документларын эшләү, җитештерү, программа белән тәэмин итү, монтажлау, эшләтеп җибәрү-көйләү һәм сервис хезмәтләре.

АСУТП, SCADA, MES, ERP, BI дәрәҗәләрендә сәнәгать предприятиеләрен комплекслы автоматлаштыру һәм предприятиедәге барлык процессларны колачлау буенча чишелешләр тәкъдим итү портфелендә: сату, проектлау, җитештерү, эксплуатацияләү, маркетинг.

Предприятиене автоматлаштыру системаларын үзара интеграцияләү өчен SMART-CDB мәгълүмат шинасын (ЭВМ өчен программаны теркәү турында таныклык №2017615780) эшләп чыгаручы булып тора.

Бүген Яр Чаллы шәһәренең сәнәгать зонасында Кама аръягы төбәге территориясендә "Техногород" өстәмә белем бирү күпфункцияле үзәге төзелешенә тантаналы шартларда старт бирелде.

Чарада Татарстан Республикасы Президенты Рөстәм Миңнеханов, министр Альберт Кәримов, "Ростех" дәүләт корпорациясе, "КАМАЗ" ГАҖ җитәкчелеге һәм башка рәсми затлар катнашты.

Проектның миссиясе: мәгариф – милләтнең уңышлы үсешенә нигез булып тора.

Уникаль өстәмә белем бирү үзәге һәм уку мәйданчыклары комплексы балаларга һәм яшьләргә төрле дәрәҗәдәге техник белем алуга, шулай ук предприятиеләрнең, оешмаларның төбәк уку йортлары белән стратегик хезмәттәшлек итүгә юнәлдерелгән. Проект мәгариф үзәгенә 2500 яшь техникны җәлеп итүгә исәпләнгән. Анда белем бирү-күңел ачу комплексы, инновацион комплекс, проект комплексы һәм тикшеренү-ял үзәге каралган.

Киләчәктә "Техногород" шәһәр яшьләрен тәрбияләү һәм укыту урыны булырга тиеш, анда автомобиль техникасының төрле үрнәкләре белән комплекслы танышу өчен шартлар тудырылачак.

Бүген Яр Чаллының пресслау-рама заводында Австриядән чит ил баклары китерүгә алмаш булачак алюминий ягулык баклары чыгару буенча яңа линия эшли башлады. Тантаналы чарада Татарстан Республикасы Президенты Рөстәм Миңнеханов, "Ростех" дәүләт корпорациясе генераль директоры Сергей Чемезов, Вице-премьер Альберт Кәримов һәм башка рәсми затлар катнашты.

Яңа линияне эшләтеп җибәргәнче Россиядә сыйфаты һәм күләме буенча "КАМАЗ" таләпләренә җавап бирерлек алюминий ягулык бакалары җитештерелмәгән, шуңа күрә дә предприятие продукцияне чит илдән сатып ала торган булган. 2017 елда "КАМАЗ" алюминий ягулык баклары җитештерү буенча үз производствосын оештыру турында карар кабул иткән. 2018 елда Сәнәгатьне үстерү фонды компания проектын хуплаган һәм җитештерүчегә "Комплект эшләнмәләр" программасы буенча займ биргән.

 Проект кысаларында "КАМАЗ" 200-800 литр күләмендәге алюминий ягулык баклары чыгара башлаган. Яңа җитештерү куәте елына 35 мең бак тәшкил итә. Шул ук вакытта линия универсаль булып тора һәм алюминийдан да, корычтан да ягулык баклары җитештерү мөмкинлеген бирә.

"Быел без КАМАЗ автомобильләренең яңа буынын җитештерә башлыйбыз, һәм бу проект компания өчен аеруча әһәмиятле. Икътисадый аспекттан тыш, үз линиябез безгә реаль вакыт режимында бакларның сыйфатын КАМАЗ автомобильләренең мөһим компоненты буларак күзәтеп торырга, шулай ук кулланучының үсә торган ихтыяҗларына җавап итеп аларның конструкциясен камилләштерү мөмкинлеген бирәчәк. Һәм, әлбәттә, бу компаниянең импортны алыштыру стратегиясен гамәлгә ашыруда тагын бер адымы", – дип билгеләп үтте "КАМАЗ" генераль директоры Сергей Когогин.

Проектны гамәлгә ашыру нәтиҗәсендә "КАМАЗ" Австриядән импорт алюминий баклары китерүдән баш тартачак. Үзендә җитештерелгән бакларны куллану "КАМАЗ"га елына 500 млн сум яки бер бак исәбеннән 10 меңнән 18 мең сумга кадәр акчаны янга калдырырга мөмкинлек бирәчәк.

Алюминийдан ясалган ягулык баклары магистраль, шәһәрара һәм шәһәрдә пассажирлар йөртү өчен коммерция автомобильләрендә кулланыла. Аларның өстенлекләре арасында – корыч ягулык багына карата авырлыгы кимрәк,  коррозиягә нык һәм янгын куркынычсызлыгы.

Элегрәк Сәнәгатьне үстерү фонды предприятиегә яңа җиһазлар сатып алу өчен ташламалы займ тәкъдим иткән булган. Проектның гомуми бюджеты 544 млн сум тәшкил иткән, шуның 230 млн сумы – Сәнәгатьне үстерү фондыннан алынган займ. Ташламалы финанслау КАМАЗга Россиядә алюминий бакларның заманча производствосын локальләштерү мөмкинлеген биргән, һәм хәзер предприятие читтән кертелә торган югары сыйфатлы продукцияне мөстәкыйль җитештерә.

КАМАЗ өчен дә, төбәк өчен дә мөһим проект Сәнәгатьне үстерү фонды займын җәлеп итеп гамәлгә ашырылган 150нче производство булган.

Бүген Яр Чаллыда Түбән Кама ГЭСының 40 еллыгына багышланган тантаналы чаралар узды.

Чарада Татарстан Республикасы Президенты Рөстәм Миңнеханов һәм Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов катнашты.

Түгәрәк дата уңаеннан истәлекле стеланы ачу тантанасы булды. Гидротөзүчеләр урамында урнашкан гидравлик турбина рәвешендәге әлеге монумент ГЭС төзелешендә катнашкан төзүчеләрнең, монтажчыларның һәм гидроэнергетикларның хезмәт батырлыгын гәүдәләндерә.

Шулай ук программа кысаларында "Энергетик" мәдәният сараенда НкГЭС төзелеше ветераннары катнашында тантаналы җыелыш узды.

Ветераннарга мактау грамоталары, Рәхмәт хатлары һәм истәлекле бүләкләр тапшырылды. Түбән Кама ГЭСының кайбер хезмәткәрләренә шулай ук "Татарстан Республикасының атказанган энергетигы" дигән мактаулы исемнәр бирелде.

Бүген "Алабуга" махсус икътисадый зонасында үсемлекләрне саклау буенча химик чаралар җитештерү буенча дөньяда аналоглары булмаган ультразаманча "Август" заводы ачылды.

"Август-Алабуга" заводын ачу тантанасында ТР Президенты Рөстәм Миңнеханов, РФ Хөкүмәте Рәисенең агросәнәгать комплексы, табигать ресурслары һәм экология мәсьәләләре буенча урынбасары Алексей Гордеев, ТР сәнәгать һәм сәүдә министрлыгыннан министр урынбасары Алексей Савельчев катнашты. Шулай ук мәртәбәле кунаклар арасында чарага Беларусь, Казакъстан һәм Кыргызстан тармак министрлыклары вәкилләре, "Август" компаниясенең эре партнер-предприятиеләре җитәкчеләре һәм башка рәсми затлар килде.

Тантананы "Август" АҖ генераль директоры Александр Усков һәм "Август-Алабуга" ААҖ генераль директоры Владимир Алин үткәрде.

Завод төзелеше 2016 елда ук башланган, ә 2019 елның маенда завод Ростехнадзор таныклыгын алган. Төзелешнең инвесторы булып, "Август" компаниясеннән тыш, Сәнәгатьне үстерү федераль фонды да катнашкан, 500 млн сум күләмендә займ биргән.

"Август-Алабуга"ның җитештерү куәте елына 50 млн литр әзер продукция һәм 8 млн канистра полимер төргәк тәшкил итә. Предприятие алдынгы җиһазлар белән җиһазландырылган һәм югары дәрәҗәдә автоматлаштырылган һәм роботлаштырылган. Заводта косметика һәм фармацевтика сәнәгатендә кулланыла торган "чиста" җитештерү методикасы кулланылачак.

Җитештерүнең ышанычлылыгы, югары сыйфатлы булуы, продукциянең сакланышы һәм куркынычсызлык техникасын үтәү заводка үсемлекләрне яклауның фәкать югары нәтиҗәле чараларын эшләп чыгарырга мөмкинлек бирәчәк.

Россия кластерларын һәм технопаркларын үстерү ассоциациясе Россия Федерациясе субъектларында, шул исәптән кече һәм урта эшкуарлык субъектлары өчен билгеләнгән, сәнәгать һәм технология инфраструктурасын үстерү эшен дәвам итә. Россия кластерлары һәм технопарклары ассоциациясе экспертлары тарафыннан "Белемнәр Икътисады Институты" автоном коммерциясез өстәмә һөнәри белем бирү оешмасы белән берлектә "Сәнәгый технопарклар: оештыру һәм эшчәнлегенә идарә итү" мәгариф программасы эшләнгән, ул 2019 елның 15 июленнән 26 июленә кадәр узачак.

Программа "Кече һәм урта эшкуарлык һәм шәхси эшкуарлык инициативаларына ярдәм итү" илкүләм проекты кысаларында һәм "Кече һәм урта эшкуарлык субъектлары акселерациясе" федераль проектын гамәлгә ашыру максатларында эшләнгән.

Икътисадый һәм сәнәгать сәясәте өлкәсендә башкарма хакимият органнары, КУЭ ярдәм инфраструктурасы оешмалары вәкилләре, технопарклар һәм сәнәгать технопаркларының идарә компанияләре җитәкчеләре һәм белгечләре, шулай ук сәнәгать технопаркы моделе буенча сәнәгать мәйданчыкларын үстерү белән кызыксынучы эре һәм урта бизнес вәкилләре мәгариф программасында катнашу өчен чакырыла.

Белем алу өчен гаризаларны 2019 елның 1 июленә кадәр тапшырырга мөмкин.

Тулырак мәгълүматны Россия кластерларын һәм технопаркларын үстерү ассоциациясе сайтында алырга мөмкин: www.akitrf.ru

Элемтә өчен: Александр Подковыров, мәгариф программасы җитәкчесе, 8-915-315-08-56, apodkovyrov@akitrf.ru, edprom@akitrf.ru

Бүген Татарстан Республикасы Сәнәгать һәм сәүдә министрлыгында "Полигран" ҖК" ҖЧҖ тышкы икътисадый эшчәнлеге мәсьәләсе буенча киңәшмә узды.

Компания – Россиянең кабель сәнәгате өчен полимер композицияләр җитештерә.

Киңәшмәнең темасы – Үзбәкстанга "Полигран" ҖК продукциясен экспортлау мөмкинлеге. ТР Сәнәгать һәм сәүдә министрлыгы, ТР Экспортка ярдәм үзәге һәм ТР Сәүдә-сәнәгать палатасы вәкилләре СТ-1 сертификатын алу, продукцияне Үзбәкстанга чыгарганда таможня декларациясен рәсмиләштерү, шулай ук юридик документларны тиешенчә рәсмиләштерү һәм товар паспортын бирү мәсьәләләре турында аңлатты.

Татарстанда, шул исәптән яңа эш башлаучылар өчен дә, "Халыкара кооперация һәм экспорт" илкүләм проекты составына керүче "Халыкара кооперацияне һәм экспортны үстерү буенча системалы чаралар" төбәк проекты кысаларында экспортерларга ярдәм күрсәтелә. Проект предприятиеләргә "Россия экспорт үзәге" АҖ тарафыннан күрсәтелә торган дәүләт ярдәме чаралары турында мәгълүмат бирүне, шулай ук экспортны алга этәрү максатларында Татарстан Республикасы вәкиллекләре белән хезмәттәшлекне тәэмин итүне күздә тота.

Бүген ТР Сәнәгать һәм сәүдә министрлыгында полимер продуктлар, аерым алганда, үзләре җитештергән станокларда поливинилхлорид (ПВХ) (алга таба алардан төргәкле полимер пленкалар һәм тукылмаган нигездәге эскәтерләр ясала) җитештерүче "Sanem Plastic" Төркия компаниясе вәкилләре белән киңәшмә узды.

"Sanem Plastic" Татарстан Республикасы территориясендә производство урнаштырырга планлаштыра. "Без сезнең республикада үзебезнең производствоны ачарга телибез һәм безгә Татарстан Хөкүмәте ягыннан ярдәм булуы бик мөһим", – дип ассызыклады компаниянең генераль директоры Ялчын Кутай.

Татарстан Республикасы сәнәгать һәм сәүдә министры урынбасары Алексей Савельчев "Sanem Plastic" вәкилләренә Татарстанда предприятиене локальләштерү өстенлекләре турында җентекләп аңлатты: компаниягә төрле салым һәм таможня преференцияләре тәкъдим ителергә мөмкин, җитештерүне ачуда ярдәм күрсәтелә, консультация ярдәме һәм озата бару хезмәтләре күрсәтелә.

Предприятие вәкилләренә завод ачу өчен берничә мәйданчык тәкъдим ителгән: "Алабуга" махсус икътисадый зонасы, шулай ук алгарышлы социаль-икътисадый үсеш территорияләре (Татарстан территориясендә берничә шундый территория бар – Яр Чаллы, Яшел Үзән, Түбән Кама, Чистай һәм Менделеевск шәһәрләрендә).

Очрашу ахырында Алексей Савельчев "Sanem Plastic" вәкилләрен 2019 елның 2-4 сентябрь көннәрендә республикада узачак Татарстанның нефть, газ, химия форумында катнашырга чакырды, биредә Төркия компаниясе үз предприятиесенең продукциясен презентацияли алачак.

27 июньдә Татарстан Республикасы Сәнәгать һәм сәүдә министрлыгында Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов рәислегендә эш киңәшмәсе узды.

Киңәшмәдә Татарстан Республикасы Президент Аппараты җитәкчесе урынбасары – Татарстан Республикасы Президентының Эксперт департаменты җитәкчесе Игорь Леонидович, шулай ук Татарстан Республикасы предприятиеләре һәм сәнәгатьчеләре ассоциациясе, Татарстан китап нәшрияты, Татарстан Республикасы Дәүләт архивы һәм С.П.Горбунов исемендәге Казан авиация заводы вәкилләре катнашты.

Киңәшмәдә катнашучылар Бөек Ватан сугышы чорында һәм аннан соңгы елларда эшләгән күренекле шәхесләр – сәнәгать предприятиеләре җитәкчеләре турында китаплар һәм җыентыклар чыгару һәм аларны яңадан бастыру мәсьәләләре турында фикер алышты.

Киңәшмәдә шулай ук әлеге мәсьәләләр буенча махсус оештыру комитеты һәм эшче төркем төзү турында карар да кабул ителде.

Россия Сәнәгать һәм сәүдә министрлыгы тарафыннан сәнәгатьне цифрлы үзгәртеп коруга дәүләт ярдәменең яңа чарасы – югары технологияле сәнәгать продукциясе җитештерүне булдыру һәм (яки) үстерү максатларында цифрлы платформалар һәм программа продуктларын эшләү чыгымнарының бер өлешен субсидияләү гамәлгә ашырылачак.

Субсидия бирү кагыйдәләре Россия Федерациясе Хөкүмәтенең 2019 елның 30 апрелендәге 529 номерлы карары белән расланган.

Конкурс аша сайлап алу 2019 елның 1 августыннан 20 августына кадәр планлаштырыла.

Тулырак мәгълүмат алу өчен Россия Сәнәгать һәм сәүдә министрлыгына мөрәҗәгать итәргә мөмкин:

• Семёнов Константин Викторович, тел. +7 495 870 29 21, өст. 22575, semenkovkv@minprom.gov.ru;
• Иванова Альбина Айрат кызы, тел. +7 495 870 29 21, өст. 22774, ivanovaala@minprom.gov.ru;
• Мардер Семён Наумович, тел.  +7 495 870 29 21, өст. 23601;
• Смольянинов Кирилл Вячеславович, тел. +7 495 870 29 21, өст. 22360.