ЯҢАЛЫКЛАР
Бүген "Казан-Экспо" халыкара күргәзмәләр үзәгендә машина төзелеше буенча эшлекле тармак күргәзмәсе кысаларында Сәнәгать һәм локальләштерү өлкәсендә хезмәттәшлек буенча Россия-Чехния эш төркеме утырышы булды, анда Россия төркеме ягыннан рәис – РФ сәнәгать һәм сәүдә министры киңәшчесе Виктор Семенов һәм Чехия ягыннан рәис – Чехиянең Сәнәгать һәм сәүдә министрлыгы Сектор экспертизасы һәм сәнәгый сәясәт департаменты эксперты Анна Никодимова катнашты.
Шулай ук төркем эшендә Россия Федерациясенең Чехия Республикасындагы сәүдә вәкиле Сергей Безруков, Россия Федерациясе Сәнәгать һәм сәүдә министрлыгының Станок төзелеше һәм инвестицион машина төзелеше департаменты киңәшчесе Хәйрулла Җамалетдинов, Чехия Республикасының Россия Федерациясендәге Илчелеге вәкиле Давид Войтишек, Татарстан Республикасы сәнәгать һәм сәүдә министры урынбасары Илдар Мингалиев, Россия һәм Татарстан предприятиеләре җитәкчеләре, шулай ук Чехия компанияләре җитәкчеләре катнашты.
Ике яклы хезмәттәшлекнең төп темалары станок төзелеше, транспорт машина төзелеше, авиация сәнәгате һәм башка өлкәләрдә агымдагы һәм перспектив проектлар турында фикер алышу булды.
Хәзерге вакытта илдә автомобиль төзелеше һәм автокомпонентлар буенча проектлар уңышлы гамәлгә ашырыла, Чехия производстволарын локальләштерү арта. Аерым алганда, Россиядән Чехиягә "Skoda" автомобильләрен экспортлау дәрәҗәсе арткан, 2019 елның 9 аенда 160 млн доллардан артык продукция кайтартылган. 2019 елның 6 аенда капиталда катнашу күрсәткече буенча Россиядә Чехиянең җыелган инвестицияләр күләме 259 млн доллар тәшкил иткән.
Чехия һәм Россия компанияләре вәкилләре чыгышларыннан соң, Россия Федерациясе һәм Чехия Республикасы арасында икътисадый, сәнәгать һәм фәнни-техник хезмәттәшлек буенча хөкүмәтара комиссиянең сәнәгать һәм локальләштерү өлкәсендә хезмәттәшлек итү буенча Россия-Чехия эш төркеменең XII утырышы беркетмәсенә кул куелды
2019 елның 4 декабрендә Киров өлкәсенең сәнәгать сәясәте министры Андрей Перескоков Татарстан Республикасында булды.
"Машина төзелеше. Металл эшкәртү. Эретеп ябыштыру. Казан" халыкара махсуслаштырылган күргәзмәсе кысаларында Татарстан Республикасы машина төзелеше кластеры һәм Киров өлкәсе Сәнәгать сәясәте министрлыгы арасында килешү имзаланды.
Шулай ук эш сәфәре кысаларында Андрей Перескоков А.М.Горький исемендәге Яшел Үзән заводында да булды, анда аны завод генераль директорының беренче урынбасары Александр Филиппов каршы алды.
"Машина төзелеше. Металл эшкәртү. Эретеп ябыштыру. Казан-2019" күргәзмәсендә Сыйфат өчен Татарстан Республикасы Хөкүмәте премиясен тапшыру тантанасы узды.
Сыйфат өлкәсендәге премияләр – җитештерелә торган продукциянең һәм күрсәтелә торган хезмәтләрнең сыйфатын арттыруга төп юнәлешне билгеләгән оешмаларны дәүләт тарафыннан стимуллаштыруның нәтиҗәле инструменты. Бу конкурентлыкка сәләтле икътисад булдыру һәм гражданнарның тормыш сыйфатын арттыру бурычларын хәл итүнең мөһим факторы.
Тантаналы чарада Татарстан Республикасы Премьер-министры Алексей Песошин, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов, "Россия сыйфат системасы" АКО җитәкчесе Максим Протасов һәм башкалар катнашты.
Сыйфат өчен Татарстан Республикасы Хөкүмәте премияләренә 15 нче ачык конкурс агымдагы елның гыйнварында башланган иде. Конкурста быел 83 оешма катнашкан: шуларның 70е – "Эшлекле камиллек" номинациясендә; 13 оешма – "Җитештерү системалары" номинациясендә. Катнашучылар исемлегенә шулай ук Татарстан Республикасыннан читтә урнашкан 6 оешма да кергән: Самара, Томск, Краснодар, Түбән Новгород өлкәсе (Урень шәһәре), Башкортостан Республикасы (Белорецк шәһәре). Республикадан Казан, Яр Чаллы, Әлмәт шәһәрләрендә урнашкан оешмалар аеруча активлык күрсәткән.
Үз чыгышында Альберт Кәримов билгеләп үткәнчә, тармак буенча сәнәгать предприятиеләре, медицина учреждениеләре, мәгариф өлкәсе оешмалары, авыл хуҗалыгы һәм азык-төлек сәнәгате предприятиеләре аеруча актив булган.
"Татарстан предприятиеләрнең сыйфат күрсәткечләре буенча илдә ныклы рәвештә икенче урында тора. Сыйфат өчен РФ Хөкүмәте премиясендә катнашучы предприятиеләрнең күбесе – сәламәтлек саклау һәм машина төзелеше өлкәләреннән", – дип билгеләп үтте Максим Протасов.
2019 елда Сыйфат өчен Татарстан Республикасы Хөкүмәте премиясен алуга конкурс лауреатлары:
"Эшлекле камиллек" номинациясендә:
"ГКС" НПП" ҖЧҖ;
"Татарстан Республикасы Сәламәтлек саклау министрлыгының Балалар республика клиник хастаханәсе" ДАССУ;
"Төбәкара клиника-диагностика үзәге" ДАССУ;
"ТАТПРОМ-ХОЛДИНГ" ҖЧҖ;
"Тиссан" ҖЧҖ;
"Компетенцияләр төбәкара үзәге – Казан мәгълүмати технологияләр һәм элемтә техникумы" ДАҺБУ;
"Уютный Дом" идарәче компаниясе" ҖЧҖ.
"Җитештерү системалары" номинациясендә:
"Оргхим" ҖБ АҖ;
"ТНГ-Групп" ҖЧҖ.
2019 елда Сыйфат өчен Татарстан Республикасы Хөкүмәте премияләренә конкурс дипломантлары:
"Эшлекле камиллек" номинациясендә:
"ТР ССМ Республика клиник офтальмология хастаханәсе" ДАССУ;
Казан шәһәренең 21 нче шәһәр поликлиникасы;
"7нче шәһәр клиник хастаханәсе" ДАССУ, Казан шәһәре;
Түгәрәк Алан эксплуатацион вагон депосы – "РТЮ" ААҖ филиалы – Үзәк инфраструктура дирекциясенең структур бүлекчәсе – Куйбышев инфраструктура дирекциясенең структур бүлекчәсе;
"Татспиртпром" АҖ филиалы "Усад ликер-аракы заводы";
"Казан төзелеш, архитектура һәм шәһәр хуҗалыгы көллияте" ДАҺБУ;
"1нче номерлы стоматология сырхауханәсе" ДАССУ.
"Җитештерү системалары" номинациясендә:
"Урал пружин заводы" ҖЧҖ.
Бүләкләү тантанасы ахырында "Россия сыйфат системасы" АКОның Татарстан Республикасы Хөкүмәте белән үзара хезмәттәшлеге турында килешүгә кул куелды. Документка ТР Премьер-министры Алексей Песошин һәм "Россия сыйфат системасы" коммерциясез автоном оешмасы җитәкчесе Максим Протасов кул куйды.
"Машина төзелеше. Металл эшкәртү. Эретеп ябыштыру. Казан-2019" тармак күргәзмәсенең эш программасы кысаларында Татарстан Республикасы Президенты Рөстәм Миңнеханов җитәкчелегендә Машина төзелеше предприятиеләренең координацияләү советы утырышы узды. Тугызынчы утырышның төп темасы – "Инновацияле технологияләр һәм предприятие белән идарә итүнең заманча системаларын кертү хисабына хезмәт җитештерүчәнлеген арттыру".
Машина төзелеше комплексы безнең республика икътисадында мөһим роль уйный һәм 3 меңнән артык предприятиене үз эченә ала, шуларның 150се – эре предприятиеләр.
Татарстан Республикасы Президенты Рөстәм Миңнеханов сәламләү сүзендә болай дип билгеләп үтте:
"Хәзерге вакытта без барыбыз да диярлек сәнәгатьне цифрлаштыру, җитештерү процессын оптимальләштерү, хезмәт җитештерүчәнлеген арттыру һәм технологик процессларның нәтиҗәлелеге кебек проблемаларны исәпкә алып, үсеш векторын үзгәртергә кирәк булган күренешләр белән очрашабыз".
Сәламләү сүзе белән шулай ук Тюрингия (Германия) икътисади үсеш агентлыгы генераль директоры Андреас Край, Россия сәнәгать һәм сәүдә министры урынбасары Дмитрий Овсянников һәм башка рәсми затлар чыгыш ясады.
Утырышта инновацияле технологияләр һәм предприятие белән идарә итүнең заманча системаларын кертү хисабына хезмәт җитештерүчәнлеген арттыруда реаль тәҗрибәгә ия булган компанияләрнең һәм предприятиеләр җитәкчеләренең докладлары тәкъдим ителде.
"Лин Коучинг" идарәче директоры Герт Хаар-Йоргенсен "Лин Коучинг" компаниясенең җитештерү предприятиеләрендә хезмәт җитештерүчәнлеген арттыруга якын килүе турында сөйләде:
"Кешеләрне укыту мөһим, алар практика алырга, эш урыннарында шөгыльләнергә тиеш. Без предприятие эчендә нинди проблемалар булуын күрергә ярдәм итәбез".
"Лин Вектор" ҖЧҖ директоры Марат Хөсәенов, үз чиратында, оешмаларның операцион нәтиҗәлелеген арттыру турында сөйләде:
"Системалы моментларга игътибар итәргә кирәк, мәсәлән, компаниядә нинди мотивация бар, шул исәптән финанс системасы, нинди хисап системасы һ.б. Лидер компанияләргә персоналны дөрес җәлеп итәргә мөмкинлек бирүче техникалар бар. Шулай ук без төрле төбәкләрдә дәүләт секторы һәм югары уку йортлары белән дә эшлибез".
СПбПУ ректоры Андрей Рудской машина төзелешендә инновацияле технологияләр һәм станоклар төзелешендә булган эшләнмәләр турында сөйләде, ә "Ямазаки Мазак" ҖЧҖ генераль директоры Макото Хасуо – җитештерүче Япония компаниясенең станок җиһазларын кулланып хезмәт җитештерүчәнлеген арттыру темасына тукталды.
"А.М.Горький исемендәге Яшел Үзән заводы" АҖ генераль директоры Александр Карпов хезмәт җитештерүчәнлеген арттыру проектларын гамәлгә ашыру буенча завод тәҗрибәсе турында сөйләде.
Утырышны тәмамлап, ТР Президенты Рөстәм Миңнеханов болай дип ассызыклады:
"Без техник вузларга таянырга тиеш, безнең республикада сәнәгатьнең төрле тармак предприятиеләре бар, анда илебез фәнни базасының техник эшләнмәләрен куллану мөһим".
2019 елның 4 декабрендә "Казан Экспо" халыкара күргәзмәләр үзәге мәйданчыгында машина төзелеше, металл эшкәртү һәм эретеп ябыштыру тармаклары өчен "Машина төзелеше. Металл эшкәртү. Эретеп ябыштыру. Казан" дигән 19нчы халыкара күргәзмә эшли башлады.
Күргәзмәне оештыручылар – ТР Президенты ярдәмендә ТР Сәнәгать һәм сәүдә министрлыгы, "Станкоинструмент" Россия станокоинструменталь продукция җитештерүчеләр ассоциациясе һәм "Казан ярминкәсе" ААҖ.
Быел күргәзмәдә Россия төбәкләреннән һәм чит илләрдән 200дән артык компания катнаша. Үз продукциясен Татарстан Республикасы, Алтай крае, Новосибирск өлкәсе, Кырым Республикасы, Мәскәү һәм Санкт-Петербург һәм башка төбәкләрдән предприятиеләр тәкъдим итәчәк. Күргәзмәдә катнашучылар арасында – Беларусь, Германия, Чехия һәм Швейцария компанияләре.
Күргәзмәне ачу тантанасында Татарстан Республикасы Президенты Рөстәм Миңнеханов, Төркия сәнәгать һәм технологияләр министры Мостафа Варанк, Россия сәнәгать һәм сәүдә министры урынбасары Дмитрий Овсянников һәм башка рәсми затлар катнашты.
Күргәзмәне ачу тантанасында TTAF Elektronik Төркия компаниясе һәм ТР Инвестицияле үсеш агентлыгы хезмәттәшлек турында килешү имзалады.
Күргәзмәдә катнашучылар һәм кунаклар өчен эшлекле һәм фәнни чаралар планлаштырылган. 4 декабрьдә "Казан Экспо" мәйданчыгында Татарстан Республикасы Машина төзелеше предприятиеләренең координацияләү советы утырышы һәм "Россия технологияләре һәм җиһазлары – Татарстан Республикасының машина төзелеше комплексы" темасына конференция узды.
Моннан тыш, Татарстан Республикасы Премьер-министры Алексей Песошин, Татарстан Республикасы сәнәгать һәм сәүдә министры Альберт Кәримов һәм "Россия сыйфат системасы" коммерциясез автоном оешмасы җитәкчесе Максим Протасов катнашында сыйфат өчен Татарстан Республикасы Хөкүмәте премияләренә ачык конкурста җиңүчеләрне бүләкләү тантанасы булды.
Күргәзмәне ачу белән берлектә, халыкара күргәзмәләр үзәге мәйданчыгында "ЧПУлы станокларда фрезер эшләре", "ЧПУлы станокларда токарь эшләре", "Эретеп ябыштыру технологияләре", "Мехатроника" һәм "Әйберләр интернеты" компетенцияләре буенча Татарстан Республикасы "Яшь профессионаллар" төбәк чемпионатының өченче этабын ачу тантанасы узды.
Күргәзмә 6 декабрьгә кадәр эшләячәк. Программада Чехия һәм Россия арасында сәнәгать өлкәсендә хезмәттәшлек итү буенча эшче төркем утырышы, "Инновацияле машина төзелеше технологияләре, җайланмалар һәм материаллар-2019" халыкара фәнни-техник конференциясен, шулай ук Татарстан Республикасының машина төзелеше предприятиеләре белгечләренең бизнес-очрашуларын уздыру планлаштырыла.
ТР Сәнәгать һәм сәүдә министрлыгында Татарстан Республикасында электр белән тәэмин итү куркынычсызлыгын тәэмин итү буенча штаб утырышы узды. Көн тәртибендәге төп мәсьәләләр – электр энергетикасы предприятиеләрен 2019-2020 елларда ягып җылыту сезонына әзерләү һәм Урыссу энергия районындагы кулланучыларны энергия белән тәэмин итү.
Министр урынбасары Алмаз Хөсәенов 2020-2025 елларга Татарстан Республикасында электр энергетикасын үстерү схемасын һәм программасын эшләүгә техник бирем эшләү һәм раслау турында доклад белән чыгыш ясады.
Утырыш ахырында чарада катнашучылар 2020 елга төбәк штабының төп чаралар планы турында фикер алышты.
"Татэнергосбыт" АҖ виртуаль музее" проекты "МедиаЛидер–2019" корпоратив массакүләм мәгълүмат чаралары халыкара конкурсында "Клиентлар өчен иң яхшы digital-басма" номинациясендә җиңүчеләр арасына кергән.
Бүләкләү тантанасы 29 ноябрьдә Мәскәүдә "Матбугат хезмәте-2019: PR-эшнең яңа технологияләре" дигән халыкара гамәли конференция кысаларында узган.
"Татэнергосбыт" АҖ рәсми сайтындагы "Виртуаль музей" бүлеге Татарстан компаниясе һәм энергетика үсешенә багышланган. Бу – предприятиенең казанышлары һәм кыйммәтләре тарихы, ул иллюстрацияләрдә, видеороликларда, автобиографияләрдә һәм фотографияләрдә чагылдырылган.
Рәсми сайтта "Компаниянең үсеш тарихы" дигән махсус өстәлмә белән Татарстан Республикасы энергосистемасын формалаштыру һәм "Татэнергосбыт" предприятиесе барлыкка килү чорлары белән 1930 еллардан алып безнең көннәргә кадәр танышырга мөмкин.
Проект кысаларында хикәяләре виртуаль музей битләрендә очерклар рәвешендә урнаштырыла торган ветераннар белән очрашулар оештырыла. Татэнергосбыт үсешенә шәхси өлеш таныклыклары компаниянең элеккеге җитәкчеләре белән интервьюда ачыла.
"Татэнергосбыт" АҖ матбугат хезмәте материаллары буенча
2019 елның 4-6 декабрендә "Казан Экспо" МКҮ территориясендә "Машина төзелеше. Металл эшкәртү. Эретеп ябыштыру. Казан" дигән 19 халыкара махсуслаштырылган машина төзелеше күргәзмәсе узачак, әлеге чара материаллар эшкәртү, машина төзелеше технологияләре өлкәсендә әһәмиятле булып тора һәм Татарстан Республикасы белән Идел буе сәнәгате үсешенә зур өлеш кертә.
Күргәзмәне оештыручылар – Татарстан Республикасы Сәнәгать һәм сәүдә министрлыгы, "Станкоинструмент" Россия станок-инструменталь продукция җитештерүчеләр ассоциациясе, Казан шәһәре мэриясе, "Казан ярминкәсе"ААҖ. Чаралар Татарстан Республикасы Президенты Рөстәм Миңнеханов ярдәмендә уза.
2019 елда "Машина төзелеше. Металл эшкәртү. Эретеп ябыштыру. Казан" күргәзмәсендә Россия һәм дөньяның төрле илләреннән 180 артык предприятие катнашачак, алар яңа буын интеллектуаль станок системаларын, алдынгы металл кисүче инструментны, контроль-үлчәү машиналарын, технологик җиһазларны һәм комплектлау җайланмаларын, инновацион конструктор эшләнмәләрен, эретеп ябыштыру җиһазларын һ.б. күрсәтәчәк.
Германия, Беларусь һәм Чехия Республикалары, Кырым Республикасы, Самара һәм Брянск өлкәләре предприятиеләре коллектив белән тәкъдим ителәчәк. Күргәзмә җиһазларының күп өлеше, күп тонналы станокларны да кертеп, эшләгән хәлендә күрсәтеләчәк.
Гадәттәгечә, күргәзмә зур тармак чараларына бай эш программасы белән үрелеп барачак.
Күргәзмә кысаларында түбәндәге чаралар оештырылачак:
- Татарстан Республикасы Президенты Рөстәм Миңнеханов катнашында Татарстан Республикасы Машина төзелеше предприятиеләренең координация советы утырышы
- сәнәгатьне техник үстерү мәсьәләләре буенча фикер алышуга багышланган халыкара фәнни-техник конференция
- "Станкоинструмент" ассоциациясеннән "Россия технологияләре һәм җиһазлары – Татарстан Республикасының машина төзелеше комплексы" конференциясе
- баш белгечләрнең бизнес-очрашулары, "Күргәзмәнең иң яхшы продукциясе", 5 компетенция буенча Татарстан Республикасы "Яшь профессионаллар" ярышлары.
Күргәзмә сәнәгатьнең барлык тармаклары белгечләре өчен бик мөһим.
Заманча технологияләр һәм җиһазлар турында мәгълүмат алу, яңа эшлекле элемтәләр урнаштыру, партнерлык элемтәләрен алга таба ныгыту һәм үстерү максатыннан, 2019 елның 4-6 декабрендә күргәзмәне карарга чакырабыз!
Ел саен әлеге чарага 8000нән артык җитәкче, инженер, машина төзелеше һәм металл эшкәртү предприятиеләре технологлары, фәнни-техник оешмалар хезмәткәрләре, Татарстан Республикасы министрлыклары һәм ведомстволары, күрше Россия Федерациясе төбәкләре һәм чит илләрдән вәкилләр килә.
Әлмәт, Ижевск, Йошкар-Ола, Яр Чаллы, Түбән Кама, Түбән Новгород, Самара, Сызрань, Тольятти, Ульян, Чебоксар шәһәрләрендә яшәүчеләр өчен "Казан Экспо" күргәзмә үзәгенә кадәр бушлай трансфер оештырылачак.
Бушлай трансферга заказ бирү өчен монда теркәлергә кирәк
Күргәзмәгә моннан бушлай чакыру билеты алырга була
"Казан ярминкәсе" ААҖ матбугат хезмәте материаллары буенча
Татарстан Республикасы Сәнәгать һәм сәүдә министрлыгында сәнәгать һәм сәүдә предприятиеләрендә хезмәтне саклау һәм куркынычсызлык техникасы буенча ведомствоара эшче төркем утырышы узды. Киңәшмә министр урынбасары Алмаз Хөсәенов рәислегендә узды. Эшче төркем составына ТР Хезмәт министрлыгы, ТР Сәламәтлек саклау министрлыгы, ТР Дәүләт хезмәт инспекциясе, һөнәри берлекләр һәм республиканың башка мәнфәгатьле оешмалары вәкилләре керде.
Утырышта агымдагы елның 10 аенда эш урыннарындагы травматизм буенча нәтиҗәләр ясалды. Татарстан Республикасының Дәүләт хезмәт инспекциясе мәгълүматына караганда, 10 ай эчендә республиканың төрле производстволарында 151 бәхетсезлек очрагы теркәлгән, аларда 177 кеше зыян күргән. Алар арасыннан 38 очрак сәнәгать һәм сәүдә предприятиеләренә туры килә, ягъни барлык очракларның – 25,2 проценты.
Производствода травматизмның төп сәбәпләре – хезмәткәрләрнең куркынычсызлыгына игътибарсыз карау, хезмәткәрләрнең хезмәтне саклау буенча инструкцияләрдәге таләпләрне үтәвен тиешле дәрәҗәдә контрольдә тотмау, эшләрне тиешенчә оештырмау, төзек булмаган машиналарны һәм җайланмаларны эксплуатацияләү, технологик процессны бозу, юл хәрәкәте кагыйдәләрен бозу, хезмәткәрнең шәхси саклану чараларыннан файдаланмавы.
Утырышта катнашучыларның барысы өчен дә хезмәтне саклау торышын, хезмәткәрләрнең куркынычсызлык техникасын тайпылышсыз үтәвен контрольдә тоту эшен көчәйтү кирәклеге билгеләп үтелде.
Ноябрь аенда "КАМАЗ" ГАҖ "Ел экспортеры - 2019" премиясе кысаларында "Эре бизнес: югары технологияләр өлкәсендә ел экспортеры" дигән абруйлы номинациядә икенче урынны яулады.
Россия Федерациясе Хөкүмәте тарафыннан гамәлгә куелган "Ел экспортеры" премиясен алу өчен барлык федераль округлардан барлыгы 1600дән артык гариза тапшырылган булган. Экспортерлар түбәндәге номинацияләрдә җиңү яулау өчен дәгъва белдергән: "Сәнәгать өлкәсендә ел экспортеры", "Югары технологияләр өлкәсендә ел экспортеры", "АСК өлкәсендә ел экспортеры", "Хезмәт күрсәтү өлкәсендә ел экспортеры", "Яңа география" һәм "Ел ачышы". Катнашучыларның 70%тан артыгы – кече һәм урта бизнес субъектлары.
Бөтен дөньяга үзенең йөк автомобильләре һәм автодетальләре белән танылган "КАМАЗ" ГАҖ киеренке көрәштә "Эре бизнес: югары технологияләр өлкәсендә ел экспортеры" номинациясендә көмеш медаль алган. Дөньяның 50дән артык иленә продукциясе китерелә торган компания яңа экспорт продуктлары булдыруы һәм Европаның биш хуплау сертификатына ия булуы белән билгеләп үтелгән. Моннан тыш, завод Евро-6 экологик стандартындагы КАМАЗ-5325 автомобильләренең сынау өчен җитештерелгән партиясен Литвага илтте.
Җиңүчеләр РЭҮ тарафыннан төрле бонуслар алачак. Алар арасында: чит ил базарларында чит ил партнерлары белән сөйләшүләрне шәхси рәвештә алып бару; экспорт контрактына хезмәт күрсәтүгә бонус тарифы; чит ил маркет-плейсында теркәлү; Мәскәүдә Экспорт мәктәбе базасында акселерация программасы буенча уку, шулай ук экспортерларга мәгълүмати ярдәм чараларының киң исемлеге.
Премия ике этапта, конкурс нигезендә үткәрелде. Башта җиңүчеләр 8 федераль округ дәрәҗәсендә бүләкләнгән, алга таба һәр номинациядә илкүләм дәрәҗәдә иң яхшылары билгеләнгән.
Киләсе елда премиядә катнашу өчен гаризаларны Россия экспорт үзәге сайтында бирергә мөмкин.
"Россия экспорт үзәге" АҖ материаллары буенча