ЯҢАЛЫКЛАР
Вируска каршы көрәш барган арада читтән торып нәрсәгә дә булса өйрәнү дөньякүләм модалы трендка әверелә башлады, Ford теләге булган һәркемгә Куркынычсыз йөртү академиясендә түләүсез нигездә онлайн-курс узарга тәкъдим итә. Өйрәтү барышында программа анда катнашучыларга файдалы мәгълүмат, машина белән куркынычсыз идарә итү буенча киңәшләр алып, шулай ук теория һәм практика күнекмәләрен дә яхшырта алачак.
«Ford куркынычсыз машина йөртү академиясе» – дөньяның 20 илендә йөзләгән мең машина йөртүче төрле телләрдә узган уникаль онлайн-программа. Проект 2003 елда Ford Motor Company тарафыннан эшләтеп җибәрелгән Ford Driving Skills for Life глобаль социаль инициативасының бер өлеше булып тора. Россиядә программа «Куркынычсыз хәрәкәт» эксперт үзәге белән берлектә Ford Sollers компаниясе тарафыннан 2014 елдан бирле тормышка ашырыла.
Өйрәтү кысаларында программада катнашучылар сәфәр алдыннан автомобильне карау һәм руль артында дөрес утыру, көзгеләрне дөрес итеп көйләү, дөрес идарә итү техникасы, тукталыш юлы һәм узып киткәндәге төп кагыйдәләр кебек темаларны караячак. Моннан тыш, кереш өлешкә кагылышлы тестлар, видео дәресләр һәм финал имтиханы сорауларына җавап бирү тәкъдим ителә.
Әлеге тренинг практикадан башка күнекмәләрне югалтырга курыккан яшь машина йөртүчеләргә дә, программа белән таныш булып, аңлаешлы темалар буенча белемнәрне үзе өчен яңалык белүгә сәбәп итәчәк профессионалларга да файдалы булачак. Карантин шартларында онлайн-программа юллардагы куркынычсызлык турында өстәмә белем алу һәм күнекмәләрне саклау буенча барлык мәсьәләләрдә дә ышанычлы ярдәмче булачак.
Өйрәтү тулысынча бушлай уздырыла, моның өчен бары тик «Ford куркынычсыз машина йөртү академиясе» дәресләре белән генә эшли башларга кирәк. Өйрәнә башлар өчен махсус программалар яки өстәмә җиһазлар таләп ителми.
Академиянең сайты: https://dsflford.ru/
Бүгенге катлаулы шартларда коронавирус таралуга һәм нефть котировкалары белән рубль курсы төшүгә бәйле рәвештә, республикада икътисад үсеше өчен чаралар комплексы үткәрелә. Бүген бу хакта Татарстан Республикасы Президенты Рөстәм Миңнеханов республика оператив штабы утырышы кысаларында хәбәр итте. Чара Яр Чаллыда «КАМАЗ» компаниясе мәйданчыгында узды.
Чарада РФ сәнәгать һәм сәүдә министры урынбасары Александр Морозов, ТР вице-премьеры Ләйлә Фазлыева, ТР хезмәт, халыкны эш белән тәэмин итү һәм социаль яклау министры Эльмира Зарипова, ТР икътисад министры Мидхәт Шаһиәхмәтов, «КАМАЗ» ГАҖ генераль директоры Сергей Когогин һәм Яр Чаллы мэры Наил Мәһдиев катнашты.
Рөстәм Миңнеханов билгеләп үткәнчә, республикада коронавирус инфекциясенә каршы тору буенча оператив штаб булдырылган, ул көн саен эшли. Транспортта (башка илләрдән килгән кешеләрне көчәйтелгән контрольдә тоту үткәрелә), уку йортларында (укучылар дистанцион укуга күчерелде), сәламәтлек саклау өлкәсендә (койка фонды һәм хастаханәләрне этаплап яңадан профильләштерү тәртибе расланган) кайбер чаралар гамәлгә ашырыла торган Республика профилактик чаралар планы расланган. Моннан тыш, барлык массакүләм чаралар да туктатылган.
«Хәзер безнең предприятиеләрнең дә бу эшкә актив кушылуы мөһим. «КАМАЗ» моңа мисал булып тора. Заводта индивидуаль саклану һәм антисептик чаралары кулланыла, башка илләрдән килгән хезмәткәрләр ике атналык карантинда, мөмкин булганча, белгечләрнең дистанцион эше оештырылган. Мондый чаралар республиканың барлык оешмаларында да тормышка ашырылырга тиеш. Кешеләрнең сәламәтлеге – ул иң зур байлык», – дип ассызыклады ТР Президенты.
РФ сәнәгать һәм сәүдә министры урынбасары Александр Морозовка мөрәҗәгать итеп, Рөстәм Миңнеханов республика предприятиеләренә антисептиклар һәм саклагыч битлекләр өчен материаллар җитештерү буенча ярдәм күрсәтергә чакырды.
Татарстан Президенты шулай ук шәхси саклану чараларын җитештерүне оештыру өчен республика предприятиеләре потенциалын куллану кирәклеген дә билгеләп үтте. «Мондый ресурс булганда, без үз производствобызга ия булырга тиеш. Битлекләр һәрчак кирәк, бигрәк тә бүгенге шартларда. Бу тема хәзер ниндидер спекулятив сегментка әверелде. Бу нормаль хәл түгел!» – дип белдерде ул.
Рөстәм Миңнеханов билгеләп үткәнчә, республикада икътисадның тотрыклы үсешен тәэмин итү планы кабул ителгән. Көн саен сәүдә оешмаларында беренче чиратта кирәкле товарлар булуга оператив мониторинг үткәрелә, бәяләр үсешен булдырмау өчен мониторинг үткәрелә, халыкны эш белән тәэмин итүгә ярдәм итү чаралары гамәлгә ашырыла, шулай ук җирле җитештерүчеләргә, шул исәптән кече һәм урта бизнес сегментына да, ярдәм итү чаралары карала.
ТР Президенты ассызыклаганча, хәзер республиканың система барлыкка китерүче предприятиеләренә ярдәм итү мөһим. «Федераль дәрәҗәдә ярдәм күрсәтү өчен оешмалар исемлеге төзелә. Безнең предприятиеләр бу исемлеккә максималь рәвештә керсен иде. Тармак министрлыкларына һәр предприятие белән индивидуаль эш алып барырга кирәк», – диде ул.
«Беренчел анализ күрсәткәнчә, ташламалы кредит бирү кебек чаралар аеруча актуаль булып тора. Без Сәнәгатьне үстерү фонды инструментларын һәм башка федераль программаларны актив кулланырга тиеш. Шулай ук кредит йөкләмәләрен үтәүдә ярдәм кирәк, бигрәк тә валюта кредитлары буенча, салымнар һәм бюджеттан тыш фондларга кертемнәрне түләү буенча кичектерү, халыкны эш белән тәэмин итүгә ярдәм итү, шул исәптән вакытлыча эшләр оештыру аша да», – дип билгеләп үтте Рөстәм Миңнеханов.
Ул бүгенге шартларда комплектлы җиһазлар импортын алыштыру мәсьәләсе аеруча кискен тора, дип тә өстәде. Татарстан Республикасы Президенты фикеренчә, бүген җитештерүне иң кыска вакыт эчендә башларга һәм федераль үзәк белән әлеге проектларны гамәлгә ашыру өчен финансларны җәлеп итәргә кирәк булган кискен дәрәҗәдә мөһим компонентлар исемлеген формалаштырырга кирәк.
Александр Морозов искәртеп узганча, 17 нче март көнне Россия Премьер-министры сәнәгать тармакларында тотрыклылыкны саклауга юнәлдерелгән беренче чираттагы чаралар планын раслаган. Автосәнәгатькә махсус игътибар бирелә. Әлеге план кысаларында салым хезмәте 3 айга салым түләүләре буенча кичектереп торуны күздә тоткан норматив акт эшли. Шулай ук аерым контрактларны үтәгәндә яклар килешүе буенча билгеләнгән срокларны үзгәртү рөхсәт ителә. Александр Морозов шулай ук быел РФ Хөкүмәте илебезнең машина төзелеше ихтыяҗына ярдәм итүгә 18 млрд.сумнан артык акча юнәлдерде, дип тә өстәде. Бу сегментта «КАМАЗ» да бар.
«КАМАЗ» генераль директоры Сергей Когогин коронавирус инфекциясе таралуга каршы тору максатларында үткәрелгән чаралар турында сөйләде. Шулай итеп, «КАМАЗ» – республикада бу юнәлештә актив чаралар күрә башлаган беренче предприятиеләр арасында. Компаниядә коронавирус таралуның икътисадый куркынычларына каршы тору буенча оператив штаб төзелгән. Чит ил командировкалары чикләнгән, чит илләрдә булган хезмәткәрләр тикшерелә. РР2 һәм РР3 фильтрлары белән битлекләр, саклагыч костюмнар һәм күзлекләр сатып алынган. Гигиена чаралары сатып алынган. «Эре бизнес үз хезмәткәрләре өчен җаваплы, без кешеләрне мөмкин кадәр саклап калырга тиеш. Шуңа күрә гыйнвар башында ук, Россиядә Covid-19 вирусы белән зарарланган очраклар теркәлмәгәндә, без, киләчәктә безнең предприятиедә яңа өйрәнелмәгән вирус таралуга юл куймас өчен, хәзер үк нинди оператив чаралар күрергә кирәклеге турында фикер алыша башладык. Моның өчен мөмкин булганның барысын да эшлибез», – дип ассызыклады Сергей Когогин. Шулай ук ул КХР һәм Европа белән йөк әйләнешен контрольдә тоту һәм йогынты ясау мәсьәләләренә дә кагылды.
Мидхәт Шаһиәхмәтов икътисадны тотрыклы үстерүне тәэмин итү буенча республика планында каралган бизнеска һәм хезмәт базарына ярдәм итү чаралары турында сөйләде. Коронавирус таралуны булдырмау максатында республикада күрелә торган чаралар һәм республика предприятиеләрендә махсус режим оештыру турында коронавируска каршы көрәш буенча республика штабы җитәкчесе Ләйлә Фазлыева хәбәр итте.
Бөтендөнья коронавирус йогышы пандемиясенә бәйле хәл кискенләшкән мәлдә «Россия экспорт үзәге» АҖ фонында кризиска каршы штаб булдырган.
Ул экспортерларга оператив ярдәм күрсәтү һәм кайбер дәүләтләрдә карантин кертү нәтиҗәсендә тышкы сәүдә чылбырлары өзелү аркасында килеп чыккан проблемаларны хәл итү, шулай ук экспортерларның мөрәҗәгатьләрен җыю һәм эшкәртү өчен оештырылган. Кризиска каршы штаб экспорт географиясенең үзгәрешен анализлаячак һәм Россия экспортерлары өчен потенциаль базарларны билгеләячәк.
Штаб кысаларында халыкара сәүдә конъюнктурасы үзгәрүгә бәйле рәвештә экспорт юнәлешләрен оператив ачыкларга, яңа экспорт белән тәэмин итү мөмкинлекләрен верификацияләргә мөмкинлек бирүче аналитик платформа төзеләчәк.
Экспортерларның төп проблемаларын мониторинглау системасы РЭҮдә формалаштырылган инде. Даими нигездә Россия Федерациясе субъектларының башкарма хакимияте органнары, экспортка ярдәм итү үзәкләре, бизнес-җәмәгатьчелек вәкилләре катнашында видеоконференцэлемтә сеанслары үткәреләчәк.
РЭҮ, кайбер субсидиар программалар буенча Россия Федерациясе Хөкүмәте агенты буларак эшләгән вакытта, бизнес-берләшмәләр белән тыгыз хезмәттәшлек итеп, норматив хокукый актларга төзәтмәләр тупланмасын эшләгән, ул агымдагы икътисадый вәзгыятьтә экспортерларга ярдәм итүдә беренче чиратлы бурыч итеп механизмнарны үзгәртү өлешендә ярдәм һәм логистик субсидия бирүне көйли.
«Безгә чит ил базарларының ябылуы аркасында үз коммерция эшчәнлегендә проблемалар кичергән һәр экспортерның үзләре турында РЭҮ хәбәр итә алуы мөһим.
Без системалы дәрәҗәдә дә, эш режимында да ярдәм итәргә әзер. Моның өчен безнең Россиядә дә, чит илләрдә дә бөтен кирәкле инфраструктура бар. РЭҮ ярдәм чараларын киметергә җыенмый – киресенчә, финанс һәм финанс булмаган продуктларның, субсидиар ярдәм чараларының нәтиҗәлелеген арттырачак, аларның линейкасын киңәйтеп, бизнес өчен җайлаштырачак. Шуны аңларга кирәк, хәзер барган хәлләр базардагы сәүдә элемтәләрен кардиналь рәвештә үзгәртергә һәм аларны диверсификацияләү өчен триггер булырга мөмкин. Ә бу исә Россия экспортерлары өчен яңа мөмкинлекләр бирергә мөмкин», – дип белдерде РЭҮ генераль директоры Вероника Никишина.
Коронавирус йогышы таралуга бәйле рәвештә хәл начарланган шартларында икътисадны тотрыклы үстерү чаралары турында тулырак мәгълүматны сылтама буенча белергә мөмкин.
Бүген Татарстан Республикасы Президенты Рөстәм Миңнеханов «Полиматиз» заводының җитештерү куәтләре белән танышты.
«Полиматиз» заводы «Алабуга» махсус икътисадый зонасы территориясендә урнашкан (ТР Алабуга муниципаль районы).
«Полиматиз» АҖ «Спанбонд» тибындагы заманча тукылмаган материаллар җитештерү буенча инвестиция проектын гамәлгә ашыру өчен 2007 елның апрелендә «Алабуга» МИЗ резиденты сыйфатында теркәлгән. Компания «Нижнекамскнефтехим» ГАҖ бүлендек предприятиесе булып тора, «ТАИФ» компанияләре төркеменә карый.
2009 елның июлендә «Полиматиз» АҖ рәсми рәвештә ачыла, продукция чыгара башлый. Тукылмаган материаллар җитештерү өчен полипропиленны «Нижнекамснефтехим» ГАҖ заводына җибәрә.
«Полиматиз» АҖ тулы технологик цикл предприятиесе булып тора, төп продукция – күп тармакларда кулланыла торган полипропиленлы тукылмаган материал. Шул исәптән медицина битлекләре җитештерү өчен дә. Предприятиенең куәте бер сәгать эчендә 500 мең битлек продукция җитештерү өчен җитәрлек.
Татарстан Президенты Рөстәм Миңнеханов «Полиматиз» АҖ заводы җитәкчелеге белән медицина битлекләре өчен материал әзерләү мәсьәләсе турында фикер алышты.
Завод җитәкчелеге һәм эшчеләр белән очрашуда Рөстәм Миңнехановка хәбәр ителгәнчә, җитештерүне 10 тапкыр арттырырга әзерләр. Март башыннан алып бүгенге көндә завод 67,4 тонна материал чыгарган, җитештерүне айга 600 тоннага кадәр җиткерергә әзер.
Рөстәм Миңнеханов шулай ук Татарстанда битлек җитештерү өчен чимал сатып алучы предприятиеләр белән медицина битлекләрен китертү мәсьәләсен дә хәл итәргә кушты. Бу заводларның барысы да республикадан читтә урнашкан. Татарстан әзер продукцияне сатып алырга әзер.
Предприятие турында – https://www.polymatiz.ru/polispan-medi
Цифрлы грамоталылыкка мониторинг ясау һәм «Россия Федерациясенең цифрлы икътисады» илкүләм программасының «Цифрлы икътисад өчен кадрлар» федераль проекты кысаларында халыкны чараларны гамәлгә ашыруга җәлеп итү максатында «Санлы диктант» үткәрелә.
«Санлы диктант» база интернет-программаларын белү, интернет сервисларында ориентлашу һәм алардан файдалану, компьютер белеме нигезләре, интернетта куркынычсызлык, халыкның цифрлы грамоталылык дәрәҗәсен арттыруга бәйле программаларны һәм проектларны туплау һәм анализлаудан гыйбарәт һәм 2020 елның 28 мартыннан 11 апреленә кадәр Россия Федерациясенең барлык төбәкләрендә үткәрелә, анда ике яшь төркеме: 14-18 яшьлекләр, 18 яшь һәм аннан өлкәнрәкләр катнаша.
Цифрлы грамоталылык дәрәҗәсен билгеләү өчен онлайн-тестлар, шулай ук төбәкләрдәге халыкларның цифрлы грамоталылыгын арттыру буенча проектлар һәм программалар турында мәгълүмат туплана торган Төбәкләрнең цифрлы мөмкинлекләр картасы «Цифрлы диктант» сайтында урнаштырылган: https://цифровойдиктант.рф/.
Татарстандагы эш бирүчеләргә югары температуралы хезмәткәрләрне эшеннән читләштерергә кирәк. Шулай ук кулларны эшкәртү өчен дезинфекция чаралары белән дозаторлар урнаштырыру зарур. Хезмәткәрләргә кул юу урыннарына ирекле керү мөмкинлеген тәэмин итәргә, тән температурасын үлчәтүне оештырырга, хезмәткәрләргә үз-үзеңне изоляцияләү режимын үтәүдә ярдәм итәргә һәм имин булмаган хәлдәге төбәкләргә хезмәткәрләрнең командировкалары графигын яңадан карарга киңәш ителә.
Коронавирус буенча имин булмаган илләрдән (Кытай, Көньяк Корея, Италия, Иран, Франция, Германия) кайткан кешеләр кайткан көннән башлап ике атна дәвамында өйдә булырга тиеш. Республика хөкүмәтендә билгеләнгәнчә, хасталык кәгазен медицина учреждениесенә мөрәҗәгать итмичә дә алырга була.
Чит илләрдән кайтучыларга шулай ук кайнар линия номерлары буенча шалтыратырга киңәш ителә: 8 (843) 296-02-24, 8 (843) 231-20-70 һәм авыру билгеләре барлыкка килгәндә өйдә медицина ярдәме күрсәтүне сорап мөрәҗәгать итәргә кирәк.
Исегезгә төшерәбез, узган атнада Татарстан Республикасы Президенты Рөстәм Миңнеханов республика территориясендә махсус санитар-эпидемиологик режим кертте. Ул 15 апрельгә кадәр дәвам итәчәк. Режим күп кеше катнашында чаралар үткәргәндә кайбер чикләүләрне күздә тота. Халыкара спорт чаралары иминрәк санитар-эпидемиологик хәл булганчыга кадәр кичектерелә. Спорт матчлары (даими уеннар) тамашачылар катнашыннан башка гына узачак, ә мәдәни чаралар соңрак вакытка күчерелә.
Министрлыкта беренче чиратта кирәкле товарларны китерүгә бәйле проблемаларны карау, бәяләрне нигезсез арттыру, әзер продукцияне сатудагы проблемалар һ.б. буенча кайнар линия эшли (843) 210-05-77, +7 (917) 264-13-27 (WhatsApp).
Коронавирус йогышы таралуга бәйле рәвештә хәл начарланган шартларда икътисадны тотрыклы үстерү чаралары турында тулырак мәгълүматны сылтама буенча белергә мөмкин.
Сәнәгатьне үстерү фонды предприятиеләргә «Эпидемия авыруларына каршы тору» программасы буенча 2 елга кадәр 1% белән 50-500 млн. сумга кадәр ташламалы кредит бирәчәк.
Әлеге программа эпидемия авыруларын ачыклау, профилактикалау һәм дәвалау өчен җиһазлар һәм продукция җитештерүче компанияләрне, шулай ук шәхси саклану чаралары, дару чаралары һәм медицина эшләнмәләре җитештерүче компанияләрне финанслауга юнәлдерелгән.
Займның максатчан билгеләнеше:
- җиһазлар сатып алу;
- чимал, материаллар һәм комплект әйберләре сатып алу өчен әйләнештәге акчаны тулыландыру;
- чит илләрдән аеруча кирәкле әзер продукцияне сатып алу.
Үзенчәлекләре:
- өстәмә финанслауны таләп итми;
- 1 елга кадәр төп бурычны түләүдән азат итү;
- финанс яктан тотрыклы дәүләт корпорацияләре һәм ГАҖ өчен тәэмин итү таләп ителми;
- башка финанс яктан тотрыклы компанияләргә кредитны тәэмин итү өчен бары тик бенефициар поручительлеге генә кирәк, калганнарына – Фонд стандарты нигезендә.
Проектларны карау тизләтелгән режимда үткәрелә.
Өстәмә мәгълүматны Сәнәгатьне үстерү фондының консультация үзәгендә: +7 495-120-24-16, 8 800 500-71-29, E-mail: frp@frprf.ru, яки https://frprf.ru/protivodeystvie-epidemiologicheskim-zabolevaniyam/ сайтыннан алырга була.
23 нче март көнне Кремльдә Сәнәгать һәм сәүдә министрлыгы башлыгы Денис Мантуров белән узган эшлекле очрашу кысаларында Владимир Путин гражданнарны һәм белгечләрне коронавируска каршы көрәштә кирәкле материаллар белән тәэмин итүне йөкләгән. Президент махсус ассызыклаганча, җитештерү күләмнәрен арттырырга кирәк, бу, аерым алганда, саклагыч битлекләргә, йогышсызландыра торган сыеклыкларга, приборлар һәм медтехникага кагыла. Дәүләт башлыгы бу хәлне шәхси контрольдә тотарга ниятли.
«Коронавируска каршы көрәш шартларында һәм моңа белән бәйле хәлдә сәнәгать белән сәүдә торышы ничегрәк?» — дип башлады әңгәмәне дәүләт башлыгы.
«Бездә, гадәттәгечә, иң беренче чиратта битлекләр җитештерә торган 18 предприятие бар. Апрельнең беренче яртысында тәүлегенә биш миллион битлек җитештерә башларга ниятлибез. Башка номенклатурага килгәндә, бу – медицина техникасы, үпкәләрне ясалма җилләтү аппаратлары, тепловизорлар, дистанцион температура үлчәгечләр, биналарны йогышсызландыру өчен УВЧ-нурландыргычлар, күләмнәрне шулай ук максималь арттырырга тырышабыз. Дезинфекторларга килгәндә дә шул ук хәл», — дип хәбәр итте Денис Мантуров.
«Сез хәзерге вакытта бу инфекциянең мөмкин булган үсешен, аны тарату ихтималын чикләү өчен максималь көч куярга кирәк булган шартларда эшнең иң мөһим элементларын атадыгыз. Шуңа күрә Сез дә, Сезнең коллегалар да, сәнәгать вәкилләре дә, моны аңлап, мохтаҗлык кичергән гражданнарны, махсус хезмәтләрне аларның эшен оештыру өчен кирәкле барлык материаллар, приборлар, медицина техникасы белән тәэмин итү өчен барысын да эшләрсез, дип өметләнәм. Әлеге җитештерү күләмнәрен арттырган саен, Сездән бу хакта даими рәвештә җиткереп торуыгызны сорыйм», — диде Владимир Путин.
Татарстан Республикасы Президенты Рөстәм Миңнеханов Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов белән бергә «Аромат» АҖ предприятиесендә булды. Предприятие җитәкчелеге белән йогышсызландыру чараларын җитештерүне арттыру мөмкинлекләре турында фикер алыштылар.
Рөстәм Миңнехановка хәбәр ителгәнчә, предприятиенең җитештерү куәтләре зарарсызландыру (йогышсызландыру чаралары, куллар һәм өслекләр өчен гигиена гельләре һәм спрейлар), шул исәптән сәнәгать һәм автотранспорт предприятиеләре өчен зур савытларда җитештерү мөмкинлеген бирә. Моның өчен махсус акциз кирәк.
Махсус санитар-эпидемиологик режим шартларында кешеләрнең иминлеген тәэмин итү турында сүз барганга күрә, Рөстәм Миңнеханов бу мәсьәләне шәхси контрольгә алды. Якын арада әлеге мәсьәлә федераль дәрәҗәдә тикшереләчәк.
Исегезгә төшерәбез, йогышсызландыру чаралары, шул исәптән куллар өчен зарарсызландыра торган гельләр – хәзерге вакытта «Аромат» АҖ тарафыннан чыгарыла торган иң кирәкле продуктларының берсе.
«Интернетта хәзер кыйммәтле бәяләрдән антисептик чаралар тәкъдим итүче спекулянтлар артты. Бу ярый торган эш түгел. Зарарсызландыргыч чараларны сәүдә һәм даруханә челтәрләре аша тиешле күләмдә сатуны тәэмин итәргә кирәк», - дип билгеләп үтте Татарстан Президенты.
Товар калдыкларын 2020 елның 1 мартына кадәр маркалап бетерүнең мөмкин булмавы турында йөк товарлары әйләнешендә аерым катнашучыларның күпсанлы мөрәҗәгатьләренә бәйле рәвештә, Россия Сәнәгать министрлыгы тарафыннан Россия Федерациясе Хөкүмәтенең 860 номерлы карарына үзгәрешләр кертү турындагы карары проектының яңа редакциясе эшләнгән.
Әлеге карар проектының яңа редакциясенә ярашлы рәвештә, идентификацияләү чаралары белән тамгаламыйча һәм идентификация чаралары белән аяк киеме товарларын маркалау турындагы белешмәләрне маркалау буенча мәгълүмат системасына тапшырмыйча аяк киеме товарларын әйләнешкә кертү, шулай ук идентификация чаралары белән маркаланмаган аяк киеме товарларын әйләнештә йөртү һәм әйләнештән чыгару 2020 елның 1 июленә кадәр рөхсәт ителә.
2020 елның 1 июленә кадәр сатылмаган һәм әйләнештә булган аяк киеме товарлары, мондый аяк киеме товарларын маркалау турындагы белешмәләрне маркалау буенча мәгълүмат системасына тапшырып, 2020 елның 1 сентябренә кадәр маркаланган булырга тиеш.
Шулай ук карар проектының яңа редакциясендә каралганча, әйләнештә катнашучылар Россия Федерациясенә 2020 елның 1 июленнән соң кертелгән, ләкин 2020 елның 1 июленә кадәр сатып алынган аяк киеме товарларын 2020 елның 1 августына кадәр маркаларга һәм мондый аяк киеме товарларын маркалау турындагы белешмәләрне маркалау буенча мәгълүмат системасына тапшырырга тиеш.