ЯҢАЛЫКЛАР

Татарстан Республикасы Сәнәгать һәм сәүдә министрлыгы белгечләре SICPA Швейцария компаниясе вәкилләре белән очрашу уздырды. Көн тәртибендәге төп мәсьәлә "Алабуга" МИЗ территориясендә компания производствосын гамәлгә ашыру проекты булды.

SICPA гомуми куллану товарлары (тәмәке һәм алкоголь), фармацевтика препаратлары, нефть эшкәртү продуктлары һәм азык-төлек товарлары кебек тармаклар өчен продукцияне маркировкалау, аутентификацияләү һәм күзәтеп тору буенча үз эшчәнлеген башкара.

Татарстан Республикасында SICPA хәләл продукцияне маркировкалау һәм ягулыкны маркировкалау юнәлешләре буенча "Продукцияне Маркировкалау һәм Мониторинглау буенча Экспертиза Үзәге" белән партнерлык килешүен гамәлгә ашыра.

Компания вәкилләре билгеләп үткәнчә, Татарстан территориясендә маркировкалау җиһазлары җитештерүне оештырырга планлаштыралар, бу киләчәктә җирле җитештерүчеләргә хәләл продукция белән экспортка чыгуны җиңеләйтәчәк.

Россиядә SICPA Стратегик үсеш буенча директоры Бари Мортазин фикеренчә, хәләл продукцияне маркировкалау проекты IT-проект булып тора, ул продукцияне җитештерүчедән кулланучыга кадәр күзәтеп торырга мөмкинлек бирәчәк.

Очрашу нәтиҗәләре буенча яклар уртак гамәлләрне координацияләү өчен эш төркеме төзергә, киләчәктә проектны гамәлгә ашыру буенча конкрет адымнарны күрсәтеп, юл картасын имзаларга дигән карар кабул итте.

ТР сәнәгать һәм сәүдә министры Альберт Кәримов Фәләстыйн дәүләтеннән килгән кунаклар белән очрашты.

Чит ил делегациясе Хеврон провинциясе губернаторы Джибрин Ильяс Абед Әл-Бакри әфәнде җитәкчелегендә килгән. Аның белән бергә Татарстанга Фәләстыйн бизнес-берләшмәсе вәкилләре дә килде.

Очрашуда катнашучылар Татарстан һәм Фәләстыйн дәүләтенең икеяклы хезмәттәшлеген үстерүгә үзара ризалыкларын белдерде.

Хеврон губернаторы Әл-Бакри әфәнде үзара партнерлык өчен потенциаль өлкәләрне билгеләде – икътисадый сектор, авыл хуҗалыгы, туризм, мәдәният һәм мәгариф.

Очрашу барышында Фәләстыйн дәүләте вәкилләре Татарстан предприятиеләре белән машина төзелеше, электр энергетикасы һәм авыл хуҗалыгы продукциясе (бөртекле культуралар һәм башкалар) буенча эшлекле элемтәләр урнаштыруда үз тәкъдимнәрен белдерде.

Соңыннан Фәләстыйн кунаклары Татарстан Республикасына һәм Министрлыкка кунакчыл булганнары өчен рәхмәт белдерделәр, шулай ук киләчәктә, аерым алганда, B2B форматында уртак эш алып барырга өмет белдерделәр.

Татарстан Республикасына эш визиты белән Ханкинтатукку (Финляндия) компаниясенең директорлар советы рәисе, медицина фәннәре докторы, профессор Аймо Юхани Нисканен килде.

ТР Сәнәгать һәм сәүдә министрлыгында профессор белән очрашуны министр урынбасары Алексей Савельчев үткәрде. Яклар төрле категорияләрдәге азык-төлек өстәлмәләре җитештерү өлкәсендә хезмәттәшлек турында фикер алышты.

Профессорның Татарстан Республикасына килүенең төп максаты – "Йөрәк-кан тамырлары авырулы пациентларны амбулатор алып баруның көнүзәк мәсьәләләре" дигән россиякүләм конгрессында катнашу.

Татарстан Республикасына бизнес-миссия белән Чиләбе өлкәсе һәм Краснодар крае предприятиеләре делегациясе килде. Визитның максаты – Татарстан Республикасы предприятиеләре белән ике яклы элемтәләрне җайга салу һәм тәҗрибә уртаклашу.

Делегация составында: "Агротех", "Варнаагромаш", "Уральские кондитеры" компанияләре, Златоуст сәгать заводы, "Златоуст" корал фабрикасы, "Новые Тепловые Машины" җылылыкалмаш җиһазлары җитештерүче предприятиесе, шулай ук ял итү өлкәсендәге предприятиеләр – "Урал" пансионаты, "Русь" шифаханәсе, "Солнечная Долина" пансионаты һәм башкалар.

Төбәк эшкуарлары белән очрашуга Татарстанның кайбер оешмалары чакырылган иде: "Татнефть сәүдә-техник йорты", "Әлмәт җылылык челтәрләре", "Казанькомпрессормаш", "Метроэлектротранс", ТР Һөнәри берлекләре федерациясе һәм башкалар.

Бизнес-делегация әгъзалары үз компанияләренең продукциясен һәм хезмәтләрен тәкъдир итте. Алар арасында мини-сыр кайнату җиһазлары, авыл хуҗалыгы техникасы өчен җайланмалар һәм запас өлешләр, механик кул һәм водолаз сәгатьләре, кондитер эшләнмәләре, җылылык алмашу җиһазлары, шифаханә-курорт хезмәтләре бар.

Очрашу B2B форматында дәвам итте: республика эшкуарлары һәм төбәк кунаклары аралашуны үзара бизнес-мәнфәгатьләр юнәлешләре буенча дәвам итә алды.

Визит 2019 елның 24 октябренә кадәр дәвам итәчәк, делегация әгъзалары өчен Иннополис шәһәренә, шулай ук республиканың Чистай һәм Яшел Үзән районнарына бару планлаштырылган.

Бүген Татарстан Республикасы Сәнәгать һәм сәүдә министрлыгында, нефть сәнәгате өлкәсендә тәҗрибә уртаклашу өчен, Казакъстан Республикасы делегациясе һәм Татарстанның нефть, газ, химия тармагы компанияләре вәкилләре арасында очрашу булды.

Казакъстан делегациясе составында – Казакъстан Республикасы Энергетика министрлыгыннан вәкаләтле органы булып торучы "Карачаганак Петролиум Оперейтинг" (аббр. – КПО, дөньяда иң эре нефть-газ конденсат ятмалары операторы) компанияләре консорциумы вәкилләре, шулай ук Казакъстан Республикасының Бурлы районы Акиматы вәкилләре катнашты.

Очрашуны башлап, министр урынбасары Алексей Савельчев республиканың нефть, газ, химия комплексының үзенчәлекләре, Татарстанда нефть чыгару һәм нефть эшкәртү өлкәсендәге төп эшләнмәләр һәм булган компетенцияләр турында сөйләде.

Министр урынбасары кереш сүзләреннән соң очрашуда катнашучыларга Көнбатыш Казакъстан өлкәсенең Бурлы районы Хакиме Мирҗан Сатканов мөрәҗәгать итте. Ул нәтиҗәле хезмәттәшлеккә өмет белдерде һәм "производствоны локальләштерү һәм импортны алыштыру максатларында без теләсә нинди инвестиция тәкъдимнәрен карарга әзер", дип билгеләп үтте.

Теманы дәвам итеп, Казакъстанның Энергетика министрлыгыннан вәкаләтле орган вәкиле Дастан Абишев болай дип ассызыклады:

"Без Татарстан предприятиеләре белән тармак кооперациясен үстерүдә мәнфәгатьле, киләчәктә КПО һәм Көнбатыш Казакъстанның башка эре тармак операторларына – "Тенгизшевройл" һәм "Норт Каспиан Оперейтинг Компани Н.В." мисалында икеяклы хезмәттәшлек тәҗрибәсен кулланырга әзер".

Очрашуда катнашучылар алдында сәламләү сүзе белән КПО генераль директоры Эдвин Блом чыгыш ясады:

"Безнең өчен Татарстан Республикасына бу визит уникаль булып тора, чөнки без беренче тапкыр Казакъстан Республикасыннан читтә шундый эшлекле очрашулар уздырабыз. Бүгенге очрашуның максаты – хезмәттәшлекнең потенциаль юлларын билгеләү".

"Карачаганак Петролиум Оперейтинг" эшчәнлеге турында КПОның Казакъстан бизнесын үстерү буенча идарәчесе Бейбит Сабиров сөйләде.

Карачаганак чыганагы Казакъстанның төньяк-көнбатышында урнашкан. Нигез салынган (1997 ел) көненнән башлап компания ятманы үзләштерүгә АКШ доллары белән 25 млрд. инвестицияләгән. "КПО" Карачаганак-Атырау торбаүткәргеченең хуҗасы булып тора, аның проект үткәрү сәләте елына 10 млн. тонна тәшкил итә. Компания өлешенә шулай ук Казакъстан Республикасы территориясендә чыгарылган ресурсларның гомуми күләменнән 45% газ һәм 16% нефть һәм конденсат туры килә.

Очрашу дәвамында презентацияләр белән Татарстанның "Татнефть" һәм "ТАНЕКО" компанияләре вәкилләре чыгыш ясады. Алар предприятиеләрдә тормышка ашырыла торган төп проектлар, инновацияле эшләнмәләр һәм аларның нәтиҗәләре турында сөйләде. Фикер алышуда шулай ук "Татнефтехиминвест-холдинг" вәкилләре дә катнашты.

Шулай ук чит ил кунакларына "Татнефть" ГАҖ тарафыннан гамәлгә ашырыла торган "Сәнәгый куркынычсызлыкка һәм хезмәтне саклауга производство контроле" автоматлаштырылган мәгълүмат системасы проекты тәкъдир ителде. Система хокук бозуларны ачыкларга, анализларга һәм рәсмиләштерергә мөмкинлек бирә, шуның аркасында сәнәгать иминлеген һәм хезмәт куркынычсызлыгын тикшерү вакыты шактый кими.

Көннең икенче яртысында Казакъстан делегациясе Татарстанның башка сәнәгать предприятиеләре вәкилләре белән очрашты, алар арасында – "Таграс-Холдинг", "ТатПром-Холдинг", "ТАТИНТЕК", "ИПЦ", "ГКС", "КМПО", "Казанкомпрессормаш", шулай ук "КЭР-Холдинг" ИК".

Предприятиеләр эшчәнлеген тәкъдир иткәннән соң, очрашуда КНИТУ ректоры каршындагы киңәшче Николай Абруков чыгыш ясады:

"Без киләчәктә предприятиеләрдә кирәкле белгечләрне укытырга тырышабыз. Студентларны әзерләү өчен без компания белгечләрен җәлеп итәбез, укучыларны әлеге компанияләрдә практика узу өчен җибәрәбез – болар барысы да студентларга һәм укытучыларга бер телдә сөйләшергә мөмкинлек бирә. Студентлар һәм аспирантларның квалификация эшләре предприятиеләр таләпләренә туры китереп гамәли характерда".

Иртәгә Казакъстан делегациясе шулай ук "Алабуга" МИЗ предприятиеләрен карарга планлаштыра, шуннан соң визит нәтиҗәләре ТР Сәнәгать һәм сәүдә министрлыгында узачак эшлекле очрашуда ясалачак.

Татарстан Республикасы Сәнәгать һәм сәүдә министрлыгында бүген Харбин шәһәре (КХР, Хэйлунцзян провинциясе) делегациясе вәкилләре белән очрашу булды.

Министрлыкта кунакларны министр урынбасары Герман Лернер каршы алды.

Кытай делегациясен Харбин шәһәренең Халык хөкүмәте мэры урынбасары Чжан Ванпин җитәкләде.

Очрашуның көн тәртибендә ике төбәкнең төрле өлкәләрдәге партнерлыгы буенча фикер алышу төп мәсьәлә булды.

Кытай делегациясе вәкилләре Татарстан Республикасы һәм Харбин шәһәре арасындагы хезмәттәшлекне үстерү өчен "Харбинның яңа районы" (Харбин шәһәрендәге махсус икътисадый зона) белән эшлекле элемтәләрне җайга салырга тәкъдим иттеләр.

Эшлекле визит кысаларында Кытай кунаклары ТР Инвестицияле үсеш агентлыгында булдылар. 2019 елның 25 сентябрендә Казан мэриясендә эшлекле очрашу планлаштырыла.

Бүген Татарстан Республикасы Сәнәгать һәм сәүдә министрлыгында текстиль, энергетика һәм машина төзелеше өлкәсендә Төркия предприятиеләре белән очрашу узды.

Компания вәкилләре үз производстволарын тәкъдир итте һәм предприятиеләр эшчәнлеге турында сөйләде.

Чакырылган Төркия җитештерүчеләре арасында мондый компанияләр дә бар иде:

• "Башязыжиоглу эт ве эт урунлери" – ит эшкәртү һем текстиль җепләр җитештерү белән шөгыльләнә;
• "Эмре Рай Энержи ве Иншаат" –  тимер юл системалары өлкәсендә "Энергетика, төзелеш, транспорт, элемтә" секторларында эшли;
• "Озтюрклер Ун Санайи" – бодайның югары сортларыннан он җитештерә, он җитештерү күләме тәүлегенә 500 тонна тәшкил итә;
• "Меркон Макина" – җыелма тимер-бетон җитештерү, бетон өслеге өчен тулысынча һәм ярымавтоматик машиналар, барлык диаметр һәм формадагы бетон торбалар, шулай ук катнашма һәм конвейер тасмалары җитештерү өчен автоматлаштырылган заводлардан гыйбарәт.

Бүген Татарстан Республикасы Сәнәгать һәм сәүдә министрлыгында министр урынбасары Алмаз Хөсәенов рәислегендә Татарстан Республикасының машина төзелеше кластеры белән эшлекле киңәшмә узды.

Кластер вәкилләре, тәэмин итү географиясен киңәйтү, элемтәләрне җайга салу һәм үз продукциясен алга этәрү максатында, Татарстан Республикасы Сәнәгать һәм сәүдә министрлыгы хезмәткәрләренә үз проектлары турында сөйләде.

Аерым алганда, Яр Чаллының "КОМ" компанияләре төркеме вездеходлар буенча проект тәкъдир итте. Әлеге техника үзебезнең комплектлау җиһазларыннан эшләнгән, җыю эше Чаллыда башкарыла. Компания продукцияне Европа базарына чыгару белән кызыксына.

"КОМ" ДК шулай ук техника берәмлеген, аерым алганда, Росгвардия, Гадәттән тыш хәлләр министрлыгы һәм республика территориясендә башка ведомстволар өчен "ХОРТ" машинасын тәкъдим итәргә әзер.

"КОМ" ДК үзе җитештергән вездеходларны бер елга кадәр бушлай бирергә әзер. "Кагыйдә буларак, әлеге техника республиканың үтеп керүе авыр булган территорияләренә, шул исәптән халыкның гомерен саклап калу өчен, үтеп керү мөмкинлеген шактый җиңеләйтә", – дип ассызыклады "КОМ ИК" ҖЧҖ коммерция директоры Игорь Козлов.

"КОРА" ҖЧҖ предприятиесе робототехника комплексында композит материаллардан эшләнмәләр җитештерү белән шөгыльләнә. "Әлеге технология Азия илләре һәм якын чит илләр өчен уникаль. Мондый технология француз компанияләрендә бар, әмма безнең эшләнмәнең бәясе дүрт тапкыр арзанрак. Нәкъ менә шуңа күрә без үз технологияләребезне экспортлауны зур ышаныч белән киңәйтергә әзер", – дип билгеләп үтте "КОРА" ҖЧҖ директоры Евгений Коган.

"Кориб" ДК проект менеджеры Владислав Свидетелев ТР Сәнәгать һәм сәүдә министрлыгы җитәкчелегенә төбәк һәм чит ил партнерлары белән элемтәләрне җайга салуда ярдәм күрсәткәне, шулай ук Төрекмәнстанда беренче Каспий икътисадый форумында катнашырга чакырганы өчен рәхмәт белдерде. Предприятие Россия төбәкләре, аерым алганда, Башкортостан Республикасы, Смоленск, Әстерхан өлкәсе белән эшлекле элемтәләрне актив киңәйтә. Алар өчен чит ил базарлары да, аерым алганда – Кытай, кызыклы.

Шулай ук Татарстан Республикасы Машина төзелеше кластерының инженер клубы һәм "Энергопрогресс" ИҮ ҖЧҖ үз проектларын тәкъдир итте. 

Министр урынбасары Алмаз Хөсәенов машина төзелеше кластерындагы хезмәттәшләренә үз проектларын тәкъдир итүләре өчен рәхмәт белдерде: "Без сезгә, һичшиксез, яңа чаралар һәм республика экспортын арттыру максатында чит ил базарларына продукция чыгару өчен мөмкинлекләр турында хәбәр итүне дәвам итәчәкбез".

Бүген "ИНВЭНТ" технополисы мәйданчыгында Татарстан Республикасы Сәнәгать һәм сәүдә министрлыгы һәм республиканың сәнәгать предприятиеләре вәкилләре катнашында күчмә утырыш узды.

Чакырылган предприятиеләр арасында – "ТАИФ", "Татэнерго", "ТАНЕКО", "Татнефть", "КАМАЗ", "Челтәр компаниясе" һәм "КЭР-Холдинг" ИК".

Көн тәртибендә "ИНВЭНТ" ДК мәнфәгатьле потенциаль партнерлар, аерым алганда, Татарстан Республикасының энергетика комплексы вәкилләре белән үзара хезмәттәшлек итү мәсьәләсе торды.

Кереш сүз белән "ИНВЭНТ" ҖЧҖ генераль директоры Леонид Резников чыгыш ясады. Ул предприятиенең агымдагы эшчәнлеге турында җентекләп сөйләргә һәм барлык сорауларга җавап бирергә әзер булуын белдерде.

Кунаклар өчен компанияләр төркеме составына керүче "ТАТКАБЕЛЬ", "Таттеплоизоляция" һәм "ИНВЭНТ-Электро" производстволары буенча экскурсия оештырылды.

 "Бүген сезнең күбегез әлеге компания белән хезмәттәшлек иткәндә ачыла торган яңа мөмкинлекләрне күреп алыр дип ышанабыз", – дип билгеләп үтте Татарстан Республикасы сәнәгать һәм сәүдә министры урынбасары Алмаз Хөсәенов.

Тэглар: сотрудничество партнерство ИНВЭНТ

Бу якшәмбедә Альберт Кәримов Татарстан Республикасы делегациясе составында Төрекмәнстанга килде.

Татарстан Республикасы Президенты Рөстәм Миңнеханов җитәкчелегендәге делегация Беренче Каспий икътисадый форумында катнашу өчен Төркмәнбаш шәһәренә килде. Делегация составына ТР Сәнәгать һәм сәүдә министрлыгы, Татарстан Республикасының сәнәгать предприятиеләре һәм профильле университетлар вәкилләре керә.

11 августта Альберт Кәримов Төрекмәнстан финанс һәм икътисад министры Батыр Базаров белән очрашты. Яклар уртак проектлар һәм эш юнәлешләре, шул исәптән, Татарстан һәм Төрекмәнстан сәнәгать предприятиеләре арасындагы хезмәттәшлек кысаларында фикер алышты.

Форумны үткәрү турында карар Актау шәһәрендә (Казакъстан Республикасы) Бишенче Каспий саммитында кабул ителгән. Әлеге чара Каспий буе дәүләтләренең килешүләрен тормышка ашыру һәм киләчәктә хезмәттәшлекне ныгыту процессында мөһим звено булырга тиеш.

Каспий икътисадый форумы "Аваза" илкүләм туристик зонасы территориясендә уза һәм берничә чараны үз эченә ала: Халыкара конференция, Каспийның инновацион технологияләр күргәзмәсе һәм шартнамәләр, килешүләр һәм контрактлар имзалау.

Күргәзмәдә Татарстан Республикасы берничә экспозиция тәкъдим итә. Бина эчендә "КМПО", "Эйдос-медицина", "Татхимфармпрепараты", КНИТУ-КХТИ, К(Идел буе)ФУ продукциясе белән гомуми стенд урнаштырылган. Урам экспозициясендә "КВЗ", "МВЕН" фирмасы", "РариТЭК" һәм башка предприятиеләр продукциясе тәкъдим ителгән.

Үз стендлары белән "Татнефть" һәм "КАМАЗ" чыгыш ясады, потенциаль клиентларга үз эшчәнлегенең төп бизнес-юнәлешләрен күрсәтте.

Татарстан Республикасы делегациясе "Каспий диңгезе: халыкара икътисадый хезмәттәшлекне ныгыту файдасы" дигән Халыкара конференциядә катнашты. Чара барышында уртак инвестицион проектларны һәм программаларны гамәлгә ашыру, махсус икътисадый зоналар оештыру һәм аларны үстерү өлкәсендә тәҗрибә уртаклашу, цифрлы икътисад өлкәсендә хезмәттәшлек мәсьәләләре турында сүз барды.

Төрекмәнстанга килүнең чираттагы этабы булып полиэтилен һәм полипропилен җитештерү буенча газ-химия комплексына бару булды. Завод 2018 елда ачылган. Бүгенге көндә заводның куәте елына 5 млрд кубометр табигый газ эшкәртү һәм 13 төр полимер чыгару мөмкинлеген бирә.

Визит ахырында Татарстан делегациясе халыкара инновацион технологияләр күргәзмәсендә булды.

Шуны да билгеләп үтәргә кирәк, Каспий икътисадый форумы мәйданчыкларында "ОПК "Ак Барс" АҖ, "КЭР-Холдинг" ИК" ҖЧҖ, "КАМАЗ" ГАҖ (Татарстан Республикасы) һәм "Туркмендениздеряеллары" агентлыгы, "Балкан" суднолар төзү һәм суднолар ремонтлау заводы" АҖ, "Туркменхимия" дәүләт концерны (Төрекмәнстан) катнашында хезмәттәшлек турында берничә мөһим килешү төзелде.

Тэглар: Туркменистан сотрудничество Каспийский экономический форум

ТР Президенты матбугат хезмәте материаллары буенча